WAF-2017 بۇكىلالەمدىك ساۋلەت فەستيۆالىنىڭ ۇيىمداستىرۋشىلارى فينالعا شىققانداردىڭ ءتىزىمىن جاريالادى. شورت-پاراقتا 400 نىساننىڭ اتى جازىلعان، ونىڭ قاتارىندا جاقىندا عانا پايدالانۋعا بەرىلگەن استانا ۆوكزالى بار ەكەن، دەپ حابارلايدى Qamshy.kz اقپارات اگەنتتىگى كرىشا سايتىنا سىلتەمە جاساپ.

ۇمىتكەر وزگە 13 جۇزەگە اسىرىلعان جوبالاردىڭ ىشىندە «كولىك» نوميناسياسى بويىنشا ۇسىنىلعان.

كونكۋرس تالاپتارىنا ساي، Tabanlioglu ساۋلەت بيۋروسى قاتاڭ ىرىكتەۋدەن ءوتىپ، اعىمداعى جىلدىڭ كۇزىندە بەرليندە وزدەرىنىڭ جوبالارىن ۇسىنباق. ءادىلقازى القالارى 15 جانە 17 قاراشادا بولاتىن فەستيۆال كەزىندە جەڭىمپازدىڭ كىم ەكەندىگىن جاريالايدى.

اتالمىش ءىس-شارا جىل سايىن ءوتىپ تۇرادى، سونىمەن قاتار، بيىل ولار 10 جىلدىق مەرەيتويىن تويلايدى ەكەن. بەلگىلى بولعانداي، ۇيىمداستىرۋشىلار بيىل مىڭنان اسا ۇسىنىس كەلىپ تۇسكەندىگىن حابارلايدى.

WAF فەستيۆالىن، ادەتتە، ساۋلەت وسكارى دەپ اتايدى. ساتاناتتى ءراسىم بارىسىندا ەڭ ۇزدىك دەپ تانىلعان 30 جوبانى ءتۇرلى نوميناسيالاردا ماراپاتتاپ، جالعىز ەڭ ۇتىمدى شىققان ءبىر جوبانى «جىل عيماراتى» تيتۋلىمەن ماراپاتتايدى. فيناليستەر الەمدىك داڭققا جانە ءتۇرلى پرەفەرەنسيالارعا قول جەتكىزەدى.

ەستەرىڭىزگە سالا كەتسەك، استاناداعى جاڭا ۆوكزالدىڭ قۇرىلىسى 2014 جىلى باستالعان بولاتىن. ول الەمدىك كورمەنىڭ باستالۋىنا از ۋاقىت قالعاندا، 2017 جىلدىڭ مامىر ايىندا اياقتالىپ، كوپشىلىككە پايدالانۋعا بەرىلدى.

اتالمىش جوبا «نۇرلى جول» دەگەن اتقا يە بولدى. ول الماتى اۋدانىنداعى مۇستافين كوشەسىندە ورنالاسقان. جالپى عيمارات الاڭى 120 مىڭ شارشى مەتردەن اسادى جانە تاۋلىگىنە 35 000 جولاۋشىعا دەيىن قابىلداي الادى.

شولۋشى: نازەركە لابيحان