بيىلعى جىلى وقۋ ورنى موتواتقىش، دەسانتتىق-شابۋىلداۋ اسكەرلەرى جانە اسكەري بارلاۋ ماماندىقتارى بويىنشا وقىتۋ ءۇشىن كادەتتەردى وقۋعا قابىلداۋعا ءازىر دەپ حابارلايدى Qamshy.kz اقپارات اگەنتتىگى قازاقستان رەسپۋبليكاسى قورعانىس مينيسترلىگىنە سىلتەمە جاساي وتىرىپ.
جىل سايىن ورتاشا ەسەپپەن العاندا 1 500 جاس قازاقستاندىق وقۋعا قۇجاتتارىن تاپسىرادى. كادەت كورپۋسىنا 17 جاستان كىشى ەمەس جانە 25 جاستان اسپاعان ازاماتتار قابىلدانادى. كادەت كورپۋسىنا وقۋعا تۇسۋگە نيەت بىلدىرگەندەر تۇرعىلىقتى جەرى بويىنشا جەرگىلىكتى اسكەري باسقارۋ ورگاندارىندا مەديسينالىق كۋالاندىرۋدان وتەدى. ءارى قارايعى كەزەڭدەر الدىن الا مەديسينالىق كۋالاندىرۋ، الدىن الا كاسىپتىك-پسيحولوگيالىق ىرىكتەۋ، دەنە دايىندىعىن تەكسەرۋ، تۇپكىلىكتى مەديسينالىق كۋالاندىرۋ جانە تۇبەگەيلى كاسىبي-پسيحولوگيالىق ىرىكتەۋ. سودان كەيىن كونكۋرستىق ىرىكتەۋ جانە كانديداتتاردىڭ وقۋعا ءتۇسۋى تىكەلەي كادەت كورپۋسىندا جۇزەگە اسىرىلادى. قابىلداۋدىڭ ءاربىر كەزەڭىنەن وتۋگە ءبىر-اق رەت رۇقسات ەتىلەدى. الدىڭعى كەزەڭنەن وتپەگەن وقۋعا ءتۇسۋشى كەلەسى كەزەڭگە جىبەرىلمەيدى. بارلىق كەزەڭدەر شىلدەنىڭ 20-ى مەن اعىمداعى جىلعى تامىزدىڭ ورتاسىنا دەيىن وتكىزىلەدى. قابىلداۋ كەزەڭىندە وقۋعا تۇسۋشىلەر كادەت كورپۋسىنىڭ اۋماعىندا ورنالاسادى جانە تاماقپەن قامتاماسىز ەتىلەدى.
جالپى وقۋ مەرزىمى 1 جىل 10 ايدى قۇرايتىنىن ايتا كەتكەن ءجون. بۇل ۋاقىت ىشىندە كادەتتەر تەوريا جانە ءىس جۇزىندە اسكەري عىلىمنىڭ قىر-سىرىن مەڭگەرىپ، تەحنيكالىق جانە كاسىبي ءبىلىم الادى. بۇل كوللەدج دەڭگەيىنە سايكەس كەلەدى جانە ولارعا «اسكەري باسقارۋدىڭ كىشى مامانى (مەنەدجەر)، «ۆ»، «س» ساناتىنداعى جۇرگىزۋشى جانە 3-سىنىپتى ءجاجم مەحانيك-جۇرگىزۋشىسى بىلىكتىلىگى بەرىلەدى. وقىتۋ اياقتالعاننان كەيىن ارقايسىسىمەن 10 كۇنتىزبەلىك جىلعا سەرجانتتار قۇرامى لاۋازىمىندا اسكەري قىزمەت وتكەرۋ تۋرالى كەلىسىمشارت جاسالادى. ودان كەيىن كادەتتەر اسكەري بولىمدەرگە بولىمشە كومانديرلەرى لاۋازىمدارىنا تاراتىلادى. العان بىلىمدەرى جاس سەرجانتتاردىڭ بولىمشەلەردى باسقارۋداعى سەنىمدىلىگىن ارتتىرادى. بۇل اسكەري بولىمدەردەگى ءارى قارايعى قىزمەتتەرىنە قولايلى ىقپال ەتەدى جانە بولىمشە كومانديرىنەن باستاپ قارۋلى كۇشتەردىڭ باس سەرجانتىنا دەيىن قىزمەتتىك مانساپ بويىنشا كوتەرىلۋگە مۇمكىندىك بەرەدى. سونداي-اق مەملەكەت تاراپىنان بارلىق اسكەري قىزمەتشىلەرگە الەۋمەتتىك قولداۋ قاراستىرىلعان.
بۇگىندە كادەت كورپۋسى كاسىبي سەرجانتتاردى دايىنداۋداعى نەگىزگى ءبىلىم وشاعى بولىپ تابىلادى. كادەت كورپۋسىنىڭ تۇلەكتەرى قارۋلى كۇشتەردە بولسىن، وزگە دە الەۋەتتى قۇرىلىمداردا بولسىن قىزمەتتەرىن ويداعىداي وتكەرۋدە. 1996 جىلدان باستاپ كادەت كورپۋسى بارلىعى 2800-دەن اسا كاسىپقوي سەرجانتتى دايىنداپ شىعاردى. وقۋعا قابىلداۋ ەرەجەلەرى تۋرالى تولىققاندى اقپاراتتى www.mod.gov.kz سىلتەمەسى ارقىلى ق ر قورعانىس مينيسترلىگىنىڭ («ءبىلىم بەرۋ» تاراۋى) الۋعا بولادى.
