كۇنى كەشە مۇحامەدجان تازابەك راديكالدى توپتىڭ مۇشەسىنىڭ ءسوزىن سويلەيدى دەگەن ماتىندەگى ماقالا جاريالانىپ، الەۋمەتتىك جەلى قولدانۋشىلارىنىڭ اراسىندا داۋ تۋعان ەدى. مۇحامەدجان تازابەكتى ۋاحابيلىك اعىمدى ناسيحاتتاپ ءجۇر دەپ جالا جاپقان اۆتور بۇركەنشىك ەسىمدى قولدانعان. وسى ماسەلەگە بايلانىستى مۇحمەدجان تازابەكپەن Qamshy.kz اقپارات اگەنتتىگىنىڭ  ءتىلشىسى حابارلاسقان بولاتىن.  

«ەڭ الدىمەن، ماعان تاعىلعان ايىپتاۋلاردى جوققا شىعارامىن. فەيسبۋكتە ميللياردقا جۋىق قولدانۋشى بار دەسەك، الەۋمەتتىك جەلى قولدانۋشىلارىن جەتە تانىپ، ولاردىڭ باعىتتارىن ءبىلىپ ءجۇرۋ مۇمكىن ەمەس. ادەتتە، الەۋمەتتىك جەلىدە اقپارات بولىسكەن ۋاقىتتا اۆتورى ەمەس، جازبا كونتەنتىنە كوڭىل بولەمىز. ال اتالعان جازبا جانازا تۋرالى جانە وندا زاڭعا قايشى كەلەتىن، «قۇتىلىپ كەتۋىم نەعايبىل» دۇنيە بولماعانىن ايتقىم كەلەدى.

پوست اۆتورىمەن تانىس ەمەسپىن جانە ونىڭ باسقا جازبالارىمەن تانىسىپ، ۇستانىمىن بىلگەن بەتتە، جىلدام پاراقشامنان الىپ تاستادىم. تيىسىنشە، ونىڭ "ءقاۋىپتى ادام ەكەنىن" ءبىلىپ تۇرىپ جاريالاۋىم جانە از ۋاقىتتىڭ ىشىندە "ون مىڭداعان ادامدى جات اعىممەن ۋلاپ جىبەرۋىم" استە مۇمكىن ەمەس.

سوندىقتان زاڭ الدىندا جاۋاپ بەرسىن دەگەن «ۇمىتتەردىڭ» دە ورىنسىز ەكەنىن ايتقىم كەلەدى.

كەرىسىنشە، ماقالا مەن ونى بولىسۋشىلەردىڭ مەنىڭ اتىمدى اقتوبە مەن باسقا ايماقتاردا بولعان تەررورلىق اكتىلەرمەن بايلانىستىرۋى جانە ۋاحابيلىك ۋاعىزدى تىقپالاپ ءجۇر دەۋى - كورىنەۋ جانە بەدەلىمدى تۇسىرەتىن اقپارات دەپ بىلەمىن.

اتالعان جاعدايعا بايلانىستى ق ر كونستيتۋسياسى مەن زاڭدارىنا سايكەس ءوز ابىرويىمدى قورعاۋ ماقساتىندا قۇقىق قورعاۋ ورگاندارىنا شاعىم ءتۇسىرۋ قۇقىعىم بار»، - دەپ اسىل ارنا تەلەارناسىنىڭ ديرەكتورى وزىنە بايلانىستى پىكىر بىلدىرگەندەرگە جاۋاپ بەردى. قازىرگى كەزدە زاڭگەرلەرمەن كەڭەسىپ جاتقاندىعىن دا ايتقان بولاتىن.