ورتا سالماقتا WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق گەنناديي گولوۆكيننىڭ باپكەرى ابەل سانچەس شاكىرتىنىڭ قارسىلاسى - مەكسيكالىق ساۋل الۆارەستىڭ سوققىسى مىقتى دەگەنگە كۇمان كەلتىردى، - دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە جاساپ.

"كانەلو" - بوقمۇرىن. ول جىلدام كومبيناسيا جاسايدى، ءبىراق گولوۆكيندى وزىنەن الشاق ۇستاۋ ءۇشىن شاپالاق بوپ قانا تيەتىن سوققىلارىنان دا ارتىق كۇش جۇمساۋى قاجەت. "كانەلو" - مىقتى پانچەر ەمەس، تاياۋدا ول ناعىز پانچەردىڭ قانداي بولاتىنىن بىلەدى"، - دەپ مالىمدەدى سانچەس Yahoo Sports باسىلىمىنا بەرگەن سۇحباتىندا. 

باپكەر گولوۆكيننىڭ سوڭعى جەكپە-جەكتە امەريكالىق دەنيەل دجەيكوبسقا قارسى بار كۇشىن سالىپ جۇدىرىقتاسپاعانىن ايتىپ ءوتتى. سانچەستىڭ ايتۋىنشا، بۇعان ءوز سەبەپتەرى دە بولعان.

"قالاي ويلايسىزدار، گولوۆكين رينگكە كوتەرىلىپ، دجەيكوبستى سوققىنىڭ استىنا السا، ءقازىر "كانەلومەن" جەكپە-جەك بولار ما ەدى؟ مەن بۇلاي ويلامايمىن، سوندىقتان وسكار دە لا حوييا (الۆارەستىڭ پروموۋتەرى - اۆت.) 2018 جىلى جۇدىرىقتاسسىن دەۋمەن بولدى. گەنناديي دەننيدى نوكاۋتقا تۇسىرسە، بۇل جەكپە-جەگىمىز بولماي قالار ەدى. بۇل كۇلكىلى، ءبىراق دجەيكوبسپەن كەزدەسۋ وتكىزگەننەن كەيىن الۆارەستىڭ كومانداسى كەنەت بىزبەن جەكپە-جەك ۇيىمداستىرۋ تۋرالى ايتا باستادى. بۇل كەزدەيسوقتىق دەي المايمىن. بۇل ورتا سالماقتاعى چەمپيون مەن قولى جىلدام بالانىڭ كەزدەسۋى. گولوۆكين قاشىقتىقتى ازايتسا جانە تايمينگتى تۇسىنسە، ول "كانەلونى" تاپتاپ تاستايدى دەپ ويلايمىن"، - دەدى گولوۆكيننىڭ باپكەرى. 

گولوۆكين مەن الۆارەس اراسىنداعى كەزدەسۋ 16 قىركۇيەك كۇنى لاس-ۆەگاستاعى T-Mobile سپورت كەشەنىندە وتەدى. ءقازىردىڭ وزىندە بۇل بوكس كەشىنىڭ بيلەتتەرى ساتىلىپ كەتكەن. اقش جەرىندە جەكپە-جەكتى نۆو ارناسى اقىلى جۇيە بويىنشا كورسەتەدى.