ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان يگى باستامالاردىڭ ورىندالۋىن «نۇر وتان» پارتياسى ءوز نازارىندا ۇستايدى. بۇل تۋرالى پارتيا ءتوراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ قىزىلوردا وبلىسىنا ساپارى بارىسىندا بەلگىلى بولدى.
ساپار بارىسىندا مۇحتار قۇل-مۇحاممەد وبلىس اكىمى قىرىمبەك كوشەربايەۆپەن بىرگە وڭىردەگى تاريحي ورىندار – «قورقىت اتا» مەموريالدى كەشەنىندە بولدى جانە ورتاعاسىرلىق سىعاناق قالاسىن قايتا قالپىنا كەلتىرۋ جۇمىستارىمەن تانىستى. مۇنداي تاريحي ورىنداردىڭ وتانشىلدىق پەن ۇلتتىق بىرەگەيلىكتى ساقتاپ، نىعايتۋدا ماڭىزدى رولگە يە ەكەنىن ايتقان «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد: «تاۋەلسىز ەلىمىز شيرەك عاسىر ىشىندە قارىشتاپ دامىپ، قازاقستان الەم تانىعان ابىرويلى مەملەكەتكە اينالعاندا ەلباسىمىز رۋحاني جاڭعىرۋ باعدارلاماسىن ۇسىندى. ونىڭ ماقساتى جاس ۇرپاقتى بابالار تاريحىنان تاعىلىم العان ەلىن، جەرىن سۇيەتىن وتانشىل رۋحتا تاربيەلەۋ. سوندىقتان «نۇر وتان» ۇلت رۋحانياتىن تۇلەتۋگە ارنالعان ەلباسى تاپسىرماسىنىڭ ەلىمىزدىڭ بارلىق وڭىرلەرىندە ويداعىداي جۇزەگە اسۋىن ەرەكشە نازاردا ۇستايتىن بولادى»، – دەدى.
سونىمەن قاتار، مۇحتار قۇل-مۇحاممەد سىر وڭىرىنە جاساعان ساپارى بارىسىندا كىشى ارالدى قايتا قالپىنا كەلتىرۋ جۇمىستارىمەن دە تانىستى.
قازىرگىدەي جاھاندانۋ زامانىندا ۇلتتىق قۇندىلىقتى ناسيحاتتاپ، تاريحي مۇرالاردى قايتا جاڭعىرتۋدىڭ ماڭىزى زور. وسى تۇرعىدان كەلگەندە ەلىمىزدەگى باستى ساياسي كۇش بولىپ تابىلاتىن «نۇر وتان» پارتياسى رۋحاني جاڭعىرۋ باعدارلاماسىن نازاردا ۇستاۋى كوڭىل قۋانتادى.
پىكىر قالدىرۋ