18 تامىز كۇنى ق ر قارۋلى كۇشتەرى اۋە قورعانىسى كۇشتەرىنىڭ قۇرىلعانىنا — 19 جىل تولادى. وسىعان وراي اۋە قورعانىسى كۇشتەرىنىڭ ارنايى وقۋ-جاتتىعۋىنا الماتى قالاسىنىڭ قورعانىس ىستەرى جونىندەگى دەپارتامەنتىنىڭ ۇيىمداستىرۋىمەن جۋرناليستەر قوسىنى قاتىستى دەپ حابارلايدى Qamshy.kz ءتىلشىسى.

قاپشاعاي كولىندەگى سۋ بەتىنە پاراشيۋتتەن سەكىرۋ وقۋ-جاتتىعۋىنا جۋرناليستەر الماتىدان UH-1 Iroquois / HU-1 "Huey" اسكەري تىكۇشاعىمەن باردىق.

ءبىزدى الىپ ۇشقان كوماندير مايور ايدار اجىبەكوۆ جانە كومەكشى مايور ۆيتاليي ليۋگاي بولدى.

53975 اسكەري ءبولىمىنىڭ ق ر قك ءپاراشيۋتتى دايارلىق ورتالىعىنىڭ اسكەري قىزمەتشىلەرى قاتىسقان وقۋ جاتتىعۋ تۋراسىندا ق ر قك پاراشيۋت دايارلىعى ورتالىعىنىڭ باستىعى پودپولكوۆنيك لەونيد دۋدكين:

«بۇگىنگى وقۋ-جاتتىعۋعا 53975 اسكەري ءبولىمى جانە 32356 اسكەري ءبولىمى قاتىسىپ جاتىر. بۇگىنگى جاتتىعۋدىڭ ماقساتى ولار پاراشيۋتتەن سۋ بەتىنە سەكىرۋ جانە قۇتقارۋ جەلەتىن پايدالانىپ امان قالۋ تاپسىرمالارىن ورىندايدى. ودان بولەك قۇتقارۋشى توپپەن سايكەسىپ جۇمىس ىستەيدى. بارىمىزدە بىلەتىندەي قازاقستاننىڭ جەرى كەڭ، تاۋلى، ءشولدى، ورماندى، دالالى، تەرريتوريامىز بار. سوندىقتان ءتۇرلى جاعدايدا پاراشيۋتپەن ءتۇسىپ، قاجەتتى تاپسىرمالاردى ورىنداۋ پاراشيۋت دايارلىعىنان وتكەندەردىڭ باستى مىندەتى. بۇل وقۋ-جاتتىعۋدى اسكەريلەردى سوعان تاربيەلەيدى. سۋ بەتىنە پاراشيۋتتەن سەكىرگەندەردىڭ ەستە ساقتاۋعا ءتيىستى ەڭ باستى ءىسى سۋعا قونباستان بۇرىن پاراشيۋتتەن قۇتىلۋ، ولاي ەتپەگەن جاعدايدا سوڭى قايعىلى اياقتالۋى مۇمكىن. بۇگىن 4m/s جىلدامدىققا دەيىنگى پاراشيۋتتەن سەكىرۋ ءجۇرىپ جاتىر»، - دەپ اتاپ ءوتتى.

ال، 53975 اسكەري ءبولىمىنىڭ تاربيە جانە يدەولوگيالىق جۇمىستارى جونىندەگى ءبولىمىنىڭ وفيسەرى دارحان قۇسايىنوۆ:

«اۋە قورعانىس كۇشتەرىنىڭ پاراشيۋت دايارلىعى ورتالىعىنىڭ اسكەريلەرى جىلىنا 2 نەمەسە 4 رەت سۋعا سەكىرەدى. بۇگىن جاۋىنگەرلىك دايارلىق جوسپارىنا سايكەس اسكەري قىزمەتشىلەر «Insider-300 SF» پاراشيۋتتىك جۇيەسىمەن 1200 مەترگە دەيىنگى بيىكتىكتە پاراشيۋتتان سەكىرۋ ۇستىندە. ولار سۋ بەتىندەگى بەلگىلەنگەن كۆادراتقا تۇسەدى. پاراشيۋت دايارلىعى ورتالىعىنىڭ اسكەري قىزمەتشىلەرى كۇندىز-تۇنى جەرگە دە، سۋعا دا، تاۋعا دا، دايىندالماعان ورتاعا دا پاراشيۋتپەن سەكىرۋگە ءار ۋاقىتتا دايىن بولۋى كەرەك. سوندىقتان جاۋىنگەرلىك دايىندىق جوسپارىنا سايكەس ولار ءار ايدا پاراشيۋتتەن ءتۇرلى ورتادا سەكىرىپ تۇرادى. «Insider-300 SF» باسقارىلاتىن جانە دايىندالماعان جەرلەرگە قونۋعا ارنالعان پاراشيۋت بولىپ سانالادى. بۇگىن 14 اسكەري قىزمەتشى پاراشيۋتتەن سەكىردى. پاراشيۋت دايارلىعى ورتالىعىنىڭ قىزمەتشىلەرى تىكۇشاق كوتەرىلە الاتىن 4500-5000 مەتر بيىكتىكتەن سەكىرە الادى»، - دەپ اتاپ ءوتتى.

ءارى ق ر قارۋلى كۇشتەرى اۋە قورعانىسى كۇشتەرىنىڭ بارشا قىزمەتكەرلەرىن مەرەكەسىمەن قۇتتىقتادى.

وقىرماننىڭ قاپەرىنە سالساق، قازاقستان رەسپۋبليكاسى قارۋلى كۇشتەرىنىڭ اۋە قورعانىسى كۇشتەرى قازاقستان رەسپۋبليكاسى پرەزيدەنتىنىڭ «قازاقستان رەسپۋبليكاسىنىڭ قارۋلى كۇشتەرىن رەفورمالاۋ جونىندەگى بۇدان بىلايعى شارالار تۋرالى» 1997 جىلعى 17 قاراشاداعى № 3761 جارلىعىن جانە قازاقستان رەسپۋبليكاسى قورعانىس ءمينيسترىنىڭ 1998 جىلعى 1 ساۋىردەگى ديرەكتيۆاسىن ورىنداۋ ءۇشىن، قازاقستان رەسپۋبليكاسىنىڭ قورعانىس قابىلەتىن نىعايتۋ ماقساتىمەن      1998 جىلعى 1 ماۋسىمدا قۇرىلعان.

«قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ قۇرىلعان كۇنىن بەلگىلەۋ تۋرالى» قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرى باس قولباسشىسىنىڭ 2008 جىلعى 17 ساۋىردەگى № 146 بۇيرىعىمەن قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ قۇرىلعان كۇنى – 18 تامىز بولىپ بەلگىلەندى.

اۋە قورعانىسى كۇشتەرىنىڭ قۇرامىنا اسكەري اۋە كۇشتەرى، اۋە شابۋىلىنا قارسى قورعانىس اسكەرلەرى، اۋە قوزعالىسىن باسقارۋ ورگاندارى كىرەدى.