اقپارات جانە كوممۋنيكاسيا ءمينيسترى داۋرەن ابايەۆ الماتى قالاسىندا جانە الماتى وبلىسىندا تەلەجوبالاردىڭ تۇسىرىلىمىمەن تانىستى، دەپ جازادى Qamshy.kz ءتىلشىسى. 29-30 تامىز كۇندەرى وتكەن شاراعا مينيسترمەن بىرگە باسپا ءسوز تۋرى ۇيىمداستىرىلدى.
«قوزى كورپەش – بايان سۇلۋ»
الدىمەن مينيستر «قازاقستان» رترك باسشىسى ەرلان قارينمەن بىرگە بايان ماقسات قىزىنىڭ پروديۋسەرلىك ورتالىعىندا بولىپ، «قوزى كورپەش – بايان سۇلۋ» تەليەۆيزيالىق تەلەحيكاياسىنىڭ دايىندىق جۇمىسىمەن تانىستى.
تەلەحيكايادا قازاقتىڭ بايىرعى عۇرىپ، داستۇرلەرى كورسەتىلگەن، سونداي-اق، سول زامانعى باقسى سارىنى، بادىك، تويباستار، سىڭسۋ، جار-جار، ايتىس، قوشتاسۋ، ەستىرتۋ، كوڭىل ايتۋ، جوقتاۋ سياقتى ۇلتتىق مۋزىكالىق سارىن مولىنان پايدالانىلعان. ءتۇسىرىلىم جۇمىسى اياقتاعان «قوزى كورپەش – بايان سۇلۋ» تەليەۆيزيالىق تەلەحيكاياسى اسى جايلاۋىندا، الماتى تاۋىندا 2 ايعا جۋىق ۋاقىت ءتۇسىرىلىپتى.
42 مينۋتتىق 6 ءبولىم بولاتىن تەليەۆيزيالىق تەلەحيكايانىڭ باس پروديۋسەرى بايان ماقسات قىزى. سەنارييىن انناس باعدات جازعان. باستى رولدەردە گۇلزادا تۇرلاش، ەرجان مۇقاتايەۆ، باقتيار قوجا، جاقسىبەك قۇرمانبەكوۆ، مارات ءاباي-دىلدالار ويناعان. تەلەحيكايا ۇلتتىق ارنانىڭ جاڭا ماۋسىمىندا كورەرمەنگە جول تارتاتىن بولادى.
«24 ساعات تابيعات قۇشاعىندا»
وسىدان سوڭ مينيستر ابايەۆ پەن قارين جانە قازگەو ءتورالقا ءتوراعاسى تولەگەن تاستانبەكوۆ «24 ساعات تابيعات قۇشاعىندا» ەكشن-رەاليتي شوۋى جوباسىنىڭ ستۋدياسىنا باردى. ەلىمىزدىڭ 14 وبلىسىنداعى قورشاعان ورتانىڭ تىلسىم قۇپيالارىن كورسەتەتىن ەكشن شوۋ «قازاقستان» ۇلتتىق ارناسى مەن «قازاق گەوگرافيالىق قوعامىنىڭ» ورتاق جوباسى.
جوباعا جۇرگىزۋشى بولعا قاتىسقان 4000-نان استام ۇمىتكەردىڭ اراسىنان اكتەر، سوعىس ساحنالارىندا ءرول سومداپ جۇرگەن نۇرجان سادىبەكوۆ تاڭدالعان. باعدارلاما شارتى بويىنشا جۇرگىزۋشىمەن بىرگە باعدارلاما قوناعى كوممۋنيكاسياسىز 24 ساعاتىن جابايى تابيعاتتا وتكىزۋى كەرەك.
«قازاقستان» رترك باسشىسى ەرلان تىنىمباي ۇلى اتالعان جوبالاردىڭ ەلباسىنىڭ «رۋحاني جاڭعىرۋ» ماقالاسىندا ايتىلعان پراگماتيزممەن قابىساتىنىن ايتا كەلىپ، اقپارات جانە كوممۋنيكاسيا ءمينيسترى داۋرەن اسكەربەكۇلىن «24 ساعات تابيعات قۇشاعىندا» ەكشن-رەاليتي شوۋىنىڭ قاتىسۋشىسى بولۋعا شاقىردى. ءوز كەزەگىندە مينيستر اتالعان باعدارلاماعا قاتىسۋعا مىندەتتى تۇردە ۋاقىت تاباتىنىن ايتىپ، جۋرناليستەردىڭ الدىندا ۋادە بەردى.
«قازاق باتىرلارى»
30 تامىز كۇنى مينيستر ابايەۆ «قازاق باتىرلارى» تاريحي تەلەحيكاياسىنىڭ ءتۇسىرىلىم جۇمىستارىمەن تانىسۋعا الماتى وبلىسىنىڭ رايىمبەك اۋدانىنا باردى. «حابار» اگەنتتىگىنىڭ تاپسىرىسىمەن ءتۇسىرىلىپ جاتقان كارتينادا قازاق باتىرلارىنىڭ ءومىرى مەن ەرلىكتەرى سۋرەتتەلەدى.
«بيىل ءتۇرلى تاقىرىپ پەن جانردا ەڭ اۋقىمدى اۋديتورياعا باعىتتالعان 39 تەلەحيكايا ءتۇسىرۋ جوسپارلانعان. اتالعان تەلەحيكايا قاراساي باتىر تۋرالى. ول شايقاستاردىڭ بىرىندە سولتۇستىك قازاقستاندا قايتىس بولدى. دالانىڭ ءبىر شەتىندە تۋىپ، ەلدى-جەردى قورعاۋ ءۇشىن ات ۇستىندە ءجۇرىپ تۋعان جەرىنەن جىراقتا جەرلەندى. قازاق ەلىن قورعاپ، بىزگە اماناتتاۋ ءۇشىن باتىر بابالارىمىز وڭاي قۇرباندىق بەرگەن جوق»، - دەدى اقپارات جانە كوممۋنيكاسيا ءمينيسترى داۋرەن اسكەربەك ۇلى.
قاراساي باتىر مەن اعىنتاي باتىردىڭ دوستىعى پاش ەتىلەتىن تەلە تۋىندىنىڭ قويۋشى رەجيسسەرى اسقار ۇزابايەۆ. تاريحي ءفيلمدى العاش رەت ءتۇسىرىپ جاتقانىن ايتقان رەجيسسەر تەلەحيكايادان تولىق مەتراجدى فيلم جاساعىسى كەلەتىنىن جەتكىزدى.
«قازاق باتىرلارى» تاريحي كوركەم تەلەحيكاياسى بيىل جەلتوقسان ايىندا كورەرمەنمەن قاۋىشادى. «حابار» ارناسىندا دراما، كومەديا، دەتەكتيۆ جانە وتباسىلىق تۋىندىلاردان تەلەجوبالار ەفيرگە دايىندالىپ جاتىر.
«ءتۇسىرىلىم جۇمىستارى باستالعانعا دەيىن كوپتەگەن زەرتتەۋ جۇمىستارى جۇرگىزىلىپ، تىڭعىلىقتى دايىندىق جاسالدى. كورەرمەندەر بۇل تەلەحيكايا ارقىلى وكەنىمىزگە ورالىپ، ەل تاريحىندا باتىرلاردىڭ قانشالىقتى ماڭىزدى ءرول اتقارعاندىعىن كورەدى»، - دەيدى «حابار» اگەنتتىگى باسقارماسىنىڭ ءتورايىمى الماگۇل احمەتجانوۆا.
ءمولدىر مەكەنباي — كارتينادا قاراساي باتىردىڭ جارى بيبىگۇلدىڭ ءرولىن سومدايدى. باي وتباسىنان شىققان قىزدىڭ قاراساي باتىرعا ماحابباتىن سومداۋ ءۇشىن ءمولدىر قازاقتىڭ تاريحي فيلمدەرىن، قازاق باتىرلارى تۋرالى كوپتەگەن كىتاپتاردى قاراپ، اتقا ءمىنۋدى ۇيرەنگەن.
ءمولدىر ونەر الەمىمەن عانا شەكتەلمەگەن. ول نازاربايەۆ ۋنيۆەرسيتەتىنىڭ «Computer Science» ماماندىعى بويىنشا 2 كۋرس ستۋدەنتى. جاۋتىكوۆ اتىنداعى رەسپۋب-ليكالىق فيزيكا-ماتەماتيكا مەكتەبىن التىن بەلگىمەن بىتىرگەن ول ءتىپتى ەرەسەكتەر اراسىنداعى دجيۋ-دجيتسۋدان 2016 جىلعى الەم چەمپيونى.
ايتا كەتسەك، مينيستر ابايەۆ 2 اپتا ۋاقىت بۇرىن اقمولا وبلىسىندا «EQUUS» دەرەكتى تريلوگياسىنىنىڭ ءتۇسىرىلىم الاڭىنا دا ارنايى بارعان ەدى.
