مەنىڭ ويىمشا، بۇگىنگى كەزەڭ قازاق ءۇشىن اسا ماڭىزدى، اسا تاعدىرلى كەزەڭ. قازاق مۇددەسىن ىسكە اسىرۋ ءۇشىن قازاقتىڭ بارشا ينتەللەكتۋال ازاماتتارى بىرىگىپ جۇمىس ىستەۋى قاجەت. مەيلى ءبىر-بىرىن جەك كورسىن، مويىنداماسىن، ءبىراق ۇلت مۇددەسى، قازاق مۇددەسى ءۇشىن بىر-بىرىنە تيىسپەي، مۇقاتپاي، اياقتان شالماي شىنايى ۇلتشىلدىق، مەملەكەتشىلدىك تانىتۋى پارىز، مىندەت. 
جالپى ينتەللەكتۋالداردىڭ جۇگى قاشان دا اۋىر. ال بيلىكتەگى ينتەللەكت يەلەرىنىڭ جۇگى - ەكى ادامنىڭ ءبىرى كوتەرە الاتىن جۇك ەمەس. كوپتەگەن دۇنيەنى، جايدى ەسكەرە ءبىلۋ قاجەت، كوپتەگەن يىرىمنەن وي مەن يدەيانى شاشقىزباي الىپ ءوتۋ كەرەك. بۇل وراسان زور سالماق. 
مارات ءتاجين اعامىز جىلدىڭ باسىنان بەرى كوپتەگەن يگى ءىستى كەشەندى تۇردە باستاپ كەتتى. لاتىنعا كوشۋ، 100 وقۋلىق، ۇلتتىق اۋدارما ءىسىن جاڭعىرتۋ، قاسيەتتى گەوگرافيا، تۋعان جەر سياقتى باعدارلامالار ىسكە اسۋدا. اينالىپ كەلگەندە وسىنىڭ بارلىعى دا قازاق مۇددەسى ءۇشىن جاسالىپ جاتىر. بۇنىڭ ءبارىن جۇرگىزۋ تەك بيۋروكراتيانىڭ سىڭىرجاق مىنەزىمەن ارپالىسۋ، ەسكىلىكتىڭ ينەرسياسىنا توتەپ بەرۋ ارقىلى جۇزەگە اسىپ جاتىر. اينالىسىپ جۇرگەن سول مارات ءتاجين. 
مارات اعامىزدى باياعى 1998 جىلداردان بەرى بىلەمىن. قاراماعىندا، قول استىندا قىزمەت ىستەگەن كەزىم بولدى. كوپ نارسەنى ۇيرەندىم، ءتۇسىندىم ماكەڭنىڭ ارقاسىندا. بارشا ايتقانىمەن، ىستەگەنىمەن كەلىسە بەرمەۋىم مۇمكىن. ءبىراق ماكەڭدى ەڭ الدىمەن مەملەكەتشىل تۇلعا، جوعارى ساپالى ينتەللەكتۋال رەتىندە مويىندايمىن. و كىسىنى ورىسشىل نەمەسە باسقا دەگەندەردى ءتىپتى ۇعىنا المايمىن. 
قازىرگى كۇنى ماكەڭ رۋحاني جاڭعىرۋ دەگەن باعداردىڭ كۇندەلىكتى قارا جۇمىسىن جۇرگىزىپ جاتىر. كوپتەگەن قارسىلىق بار ەكەنىن جۇرتتىڭ ءبارى كورىپ وتىر. سول قارسىلىقتىڭ ءبىرىنشى تولقىنىن عانا وتكەردىك. ەرتەڭ بۇگىنگىدەن دە دۇلەي، بۇگىنگىدەن دە وراسان قارسىلىققا تاپ بولامىز. تالاي ايتىسۋعا تۋرا كەلەدى. وسىنداي كەزدە وي مەن پاراسات يەلەرى ءبىر-بىرىن اشىق قولداماسا لا، اياعىنان شالماسا ەكەن دەگەن تىلەگىم بار. 
ينتەللەكتۋال ادامداردىڭ بارلىعى دەرلىك ءمىنشىل، تاكاپپار، كىرپياز كەلەدى. ايتپەسە ينتەللەكتۋال بولۋى مۇمكىن ەمەس. ولاي بولسا سول ينتەللەكتۋالداردىڭ دوستىعى دەمەيىن، ەڭ بولماسا بىر-بىرىنە ىشتەي سىيلاستىعى مەن قۇرمەتى بولعانى ابزال دەپ ويلايمىن.