بۇگىن «استانا ەكسپو – 2017» حالىقارالىق كورمەسى اياسىندا الماتى وبلىسى مەن شۆەيساريانىڭ تيچينو كانتونىنىڭ اراسىندا ءوزارا ىنتىماقتاستىق تۋرالى مەموراندۋمعا قول قويىلدى. بۇل تۋرالى وڭىرلىك اكىمدىك سايتىندا حابارلاندى دەپ جازادى Qamshy.kz.
الماتى وبلىسىنىڭ اكىمى اماندىق باتالوۆ پەن تيچينو كانتونىنىڭ ەكونوميكا جانە قارجى ءمينيسترى ك.ۆيتتە قول قويعان قۇجات ەكى جاقتى بايلانىستاردىڭ جاڭا بەلەسىنە جول اشادى دەپ كۇتىلۋدە.
ەلىمىزدىڭ قارجى ءمينيسترى باقىت سۇلتانوۆ، قازاقستان رەسپۋبليكاسىنىڭ شۆەيساريا كونفەدەراسياسىنداعى توتەنشە جانە وكىلەتتى ەلشىسى جانار ايتجانوۆا، شۆەيساريا كونفەدەراسياسىنىڭ پرەزيدەنتى دوريس لويدحاردتىڭ جانە باسقا دا لاۋازىمدى تۇلعالاردىڭ قاتىسۋىمەن وتكەن مەموراندۋمعا قول قويۋ راسىمىندە وبلىس باسشىسى ا. باتالوۆ جەتىسۋ ءوڭىرىنىڭ ينۆەستيسيالىق مۇمكىندىكتەرىنە قىسقاشا توقتالىپ ءوتتى.
- الماتى وبلىسى مەن تيچينو كانتونى كليماتى جاعىنان دا، تابيعاتى جاعىنان دا ۇقساس. ءبىر-بىرىمىزدى تولىقتىراتىن، ۇيرەنەتىن ورتاق دۇنيەلەر بارشىلىق. ءتۋريزمدى دامىتۋدا، اۋىل شارۋاشىلىعىنا، وڭدەۋ ونەركاسىبىنە جاڭا تەحنولوگيالار تارتۋدا، جاسىل ەنەرگەتيكانى ەنگىزۋدە شۆەيساريادان ۇيرەنەرىمىز كوپ. ماسەلەن، الماتى وبلىسىندا تۇرمىستىق قاتتى قالدىقتاردى وڭدەيتىن ءىرى كاسىپورىن جوق. وسى جاعىنان دا ارىپتەستىك بايلانىس مۇمكىندىكتەرىن قاراستىرۋدى جوسپارلاپ وتىرمىز. الداعى ۋاقىتتا تاجىريبە الماسۋ مەن ەكى تاراپ كاسىپكەرلەرىنىڭ اراسىندا جاندى بايلانىس ورناتۋدىڭ يگىلىگىن تۇرعىندار كورەدى دەپ ويلايمىن، - دەي كەلە ا. باتالوۆ تيچينولىق دەلەگاسيانى جەتىسۋ وڭىرىنە ارنايى شاقىردى.
تيچينو كانتونىنىڭ ەكونوميكا جانە قارجى ءمينيسترى ك. ۆيتتە ءوز سوزىندە مەموراندۋمنىڭ زاڭدى جالعاسى رەتىندە ناقتى جوبالار جۇزەگە اسىرىلىپ، ورتاق ناتيجەگە قول جەتكىزىلەتىنىنە سەنىم ءبىلدىردى.
شارا سوڭىندا ا. باتالوۆ شۆەيساريالىق قوناقتارعا وبلىستىڭ بارلىق تاريحي ورىندارى ايقىن كورسەتىلگەن قولدان ازىرلەنگەن كارتاسىن جانە جەتىسۋ ءوڭىرى تۋرالى كىتاپتى سىيعا تارتتى.
جالپى قازاقستان مەن شۆەيساريا اراسىنداعى ارىپتەستىك قارىم-قاتىناستىڭ ورناعانىنا بيىل 25 جىل تولىپ وتىر. مەموراندۋمعا قول قويۋ ءراسىمى وسى ايتۋلى داتا قارساڭىندا ەكسپو كورمەسىندە وتكەن شۆەيساريانىڭ ۇلتتىق كۇنى اياسىندا بولدى.
