مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى جاريالانعالى بەرى كونە جادىگەرلەرىمىز بەن تاريحي-مادەني مۇرالارىمىزدىڭ ەكىنشى تىنىسى اشىلدى. بۇگىندە وسىنداي ۇلتتىق قۇندىلىقتارىمىزدى كەڭىنەن ناسيحاتتاۋ جۇمىستارى قارقىندى جۇرگىزىلۋدە. سونىڭ ىشىندە شىعىس قازاقستان وبلىسىنداعى تىڭ باستامالار كوڭىل قۋانتادى.
وسى باعىتتاعى ەلباسى تاپسىرمالارىنىڭ وڭىردە ورىندالۋ بارىسىمەن تانىسۋ ماقساتىندا «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار-قۇل-مۇحاممەد وبلىسقا ارنايى كەلدى. ساپار بارىسىندا مۇحتار ابرار ۇلى وبلىس اكىمى دانيال احمەتوۆپەن بىرگە تارباعاتاي اۋدانىنداعى كيەلى جەرلەردىڭ ءبىرى ىرعىزباي اتا كەسەنەسىندە بولدى. بۇل كەسەنە ءحىح عاسىردىڭ ورتا تۇسىندا سالىنعان ءدىني ارحيتەكتۋرالىق ەسكەرتكىش. ىرعىزباي دوسقانا ۇلى زامانىندا قازاق دالاسىنداعى دارىلىك شوپتەردىڭ قاسيەتتەرى مەن قولدانۋ تاسىلدەرىن جەتىك مەڭگەرگەن ايگىلى ەمشى جانە سىنىقشى بولعان. بۇگىندە بۇل ورىندا «تۋعان جەر» باعدارلاماسى بويىنشا اباتتاندىرۋ جۇمىستارى جۇرگىزىلۋدە. كەشەندە كەسەنەدەن بولەك، مەشىت، مۋزەي جانە ەكى مىڭنان استام كىتاپ قورى ساقتالعان كىتاپحانا جۇمىس ىستەيدى. ءتىپتى سول كىتاپتاردىڭ اراسىندا حVII-XVIII عاسىرلاردا جازىلعان يبن سينانىڭ مەديسينالىق تراكتاتتارى دا بار.
ەلباسى باستاماسىن جۇزەگە اسىرۋدا شىعىس جۇرتى كوپكە ۇلگى بولىپ وتىرعانىن ايتقان مۇحتار قۇل-مۇحاممەد: «بۇگىندە شىعىس قازاقستان وبلىسىندا «رۋحاني جاڭعىرۋ» باعدارلاماسى بويىنشا جۇمىستار جۇيەلى تۇردە جۇرگىزىلۋدە. سونىڭ ناتيجەسىندە كوپتەگەن تاريحي ەسكەرتكىشتەر كۇردەلى جوندەۋدەن وتكىزىلىپ، حالىقتىڭ تاعزىم ەتەتىن، وتاندىق جانە شەتەلدىك تۋريستەردىڭ ءجيى كەلەتىن، قازاق تاريحىنان سىر شەرتەتىن كيەلى ورىندارعا اينالىپ وتىر. وسىنداي يگى ىستەردى ەلباسىمىزدىڭ حالقىنا تارتۋ ەتكەن تاماشا سىيى دەپ قابىلداۋىمىز كەرەك»، – دەدى.
سونداي-اق، «نۇر وتان» پارتياسى ءتوراعاسىنىڭ ءبىرىنشى ورىنباسارى اباي اۋدانىندا ورنالاسقان قوڭىر اۋليە ۇڭگىرىندە بولدى. مۇندا كەزىندە دانىشپان اباي، ۇلى جازۋشى مۇحتار اۋەزوۆ سياقتى تۇلعالار ارنايى كەلگەن.
جالپى شىعىس قازاقستان وبلىسىندا «رۋحاني جاڭعىرۋ» باعدارلاماسىن جۇزەگە اسىرۋ ءۇشىن ارنايى كەشەندى جوسپار دايىندالىپ، وعان ءارتۇرلى 61 جوبا ەنگىزىلگەنىن ەرەكشە اتاپ وتكەن ءجون.