استانا قالاسىنداعى «سارىارقا» ۆەلوترەگىندە قانات يسلام - برەندون كۋك جەكپە-جەگى اياسىنداعى بوكس كەشى جالعاسىپ جاتىر، دەپ جازادى Qamshy.kz.
جەڭىسپەن جالعاسىپ جاتقان بوكس دوداسىندا التىنشى بولىپ الاڭعا اۋىر سالماقتاعى 3 جەكپە-جەگىن نوكاۋتپەن جەڭگەن رۋسلان مىرساتايەۆ پەن 5 جەكپە-جەكتىڭ بەسەۋىن نوكاۋتپەن اياقتاعان اندرەس ماتياس اففرانيل شىقتى. رۋسلان قارسىلاسىن 4 راۋندتا ابدەن شارشاتىپ، تىزەرلەتىپ تاستادى. ارەڭ تۇرعان قارسىلاسى كەلەسى سوققىعا شىداماي سەرەيىپ قۇلادى.
ايتا كەتەتىن بولساق، كەشتىڭ العاشقى جەكپە-جەگىن مەيىرىم نۇرسۇلتانوۆ پەن برازيليالىق يسماەل بۋەنو باستاپ، كاسىپقوي رينگتە 3 جەكپە-جەك وتكىزىپ، ەكەۋىن جەڭىسپەن اياقتاعان جەرلەسىمىز العاشقى سەكۋندتاردا-اق، قارسىلاسىن تىقسىرىپ تاستادى.
ەكىنشى بولىپ شارشى الاڭعا كوتەرگەن ديماش نيازوۆ ەدۋاردو پەرەيرا دوس رەيشپەن قولعاپ ءتۇيىستىرىپ، قارسىلاسىن تورەشىلەردىڭ بەرگەن باعاسى بويىنشا 2:1 ۇپاي سانىمەن جەڭدى.
ءۇشىنشى بولىپ شارشى الاڭعا ايدوس ەربوسىن ۇلى مەن ارگەنتينالىق قارسىلاسى شىعا سالا قۋالاپ ءجۇرىپ سابادى.
10 راۋندتان تۇراتىن ءتورتىنشى جەكپە-جەككە 20 بوكسىندا 18 جەڭىسىنىڭ 7ء-سىن نوكاۋت جاساعان امەريكالىق توماس دجاستين بەريلل مەن قانداسىمىز ءالي احمەدوۆ شىقتى. ءالي احمەدوۆ 8 راۋندتا قارسىلاسىن 2 رەت قۇلاتىپ، جەڭىسكە جەتتى.
قانات يسلاممەن بىرگە ءبىر اي دايىندالعان نۇرسۇلتان جاڭابايەۆ شىعا سالا الەكس ساندرو دۋارتەنى ۇرىپ قۇلاتتى. نۇرسۇلتان جاڭابايەۆ العاشقى كەزدەسۋىندە-اق WBA چەمپيوندىق بەلدىكتەرىنىڭ ءبىرىن يەلەنگەن.
بوكس كەشىن «Qazaqstan» جانە «Qazsport» تەلەارنالارى تىكەلەي ەفيردە كورسەتتى.
انونس بەرە كەتسەك، قىركۇيەك ايىندا بۇگىنگى كۇننەن بولەك قازاقستاندىق جانكۇيەرلەردى 16 قىركۇيەكتەگى گولوۆكين مەن الۆارەس اراسىنداعى تاعى ءبىر جەكپە-جەك كۇتىپ تۇر. بۇگىن ەكىنشى رەت اكە اتانعان 35 جاستاعى گولوۆكين الداعى جەكپە-جەگىندە WBC، WBA (Super)، IBF جانە IBO تيتۋلدارىن قورعايدى.
اقش-تىڭ لاس-ۆەگاس قالاسىنداعى 20 مىڭ ورىندىق T-Mobile ارەناسىندا 16 قىركۇيەك كۇنى وتەتىن بوكس كەشتىڭ باستى وقيعاسى بولماق. جەكپە-جەك استانا ۋاقىتىمەن 17 قىركۇيەك، ياعني جەكسەنبىنىڭ تاڭىندا وتەدى. گولوۆكين – الۆارەس بوكس كەشىن ترانسلياسيالاۋعا قۇقىق العان Qazaqstan مەن QazSport تەلەارنالارى تىكەلەي ەفيردە كورسەتەدى. سونداي-اق، اتالعان بوكس 130 ەلدە كورسەتىلەدى.
