كاسىپقوي بوكستاعى العاشقى كەزدەسۋىندە كەمري ماكسيدى جەڭگەن بالاۋسا مۇزديمان ءوز اسەرىمەن ءبولىستى، - دەپ حابارلايدى Qamshy.kz اقپارات اگەنتتىگى Qsport.kz پورتالىنا  سىلتەمە جاساي وتىرىپ.  

اقش-تىڭ مونرو قالاسىندا وتكىزگەن جەكپە-جەگىندە وتانداسىمىز قارسىلاسىن العاشقى راۋندتا-اق سوققىلارىنىڭ استىنا الىپ، جەكپە-جەكتى ۋاقىتىنان بۇرىن اياقتادى. 

«كاسىپقوي بوكستاعى العاشقى جەڭىسىمە وسىلاي جەتكەنىمە وتە قۋانىشتىمىن. امەريكالىق بوكسشى قىزدى وتە مىقتى دەپ ويلاعانمىن، الايدا ءبىرىنشى راۋندتا نوكداۋنعا تۇسكەننەن كەيىن، قارسىلاسىم جەكپە-جەكتى ارى قاراي جالعاستىرۋدان باس تارتتى. جەكپە-جەك امەريكادا بولعاندىقتان، قارسىلاسىم وڭايلىقپەن بەرىلەدى دەپ ويلامادىم. اللاعا شۇكىر، قازاق ەلىنە ءالى تالاي جەڭىستەر سىيلايمىن دەپ ويلايمىن»، – دەيدى بالاۋسا. 

ايتا كەتەيىك، جاستار اراسىنداعى الەم چەمپيونى بالاۋسا مۇزديمان جاقىندا كاسىپقوي بوكسقا اۋىسقانىن حابارلاعان بولاتىن، بۇل وتانداسىمىزدىڭ كاسىپقوي بوكستاعى العاشقى جەكپە-جەگىندەگى جەڭىسى.