قازاقستان رەسپۋبليكاسىنىڭ ىرگەتاسى - «الاشوردانىڭ» قۇرىلعانىنا 100 جىل تولۋىنا وراي «قامشى» پورتالى بيىل «الاشوردا – 100 جىل» جالپىحالىقتىق شارالارىن باستاعان بولاتىن. قىسقاشا ايتار بولساق، الاش ارىستارىنا ارناپ 5 ناۋرىزدا اس بەرىلدى،15 ساۋىردە 100 اعاش وتىرعىزىلدى.

«Qamshy.kz» اقپارات اگەنتتىگى جىل باسىندا جاريالاعانداي، جالپىحالىقتىق ءىس-شارانى جالعاستىرادى. اتاپ ايتقاندا قازان، قاراشا ايلارىندا 100 جەتىم بالاعا كيىم- كەشەك سىيلاۋ، 100 ستۋدەنتكە ءبىر جولعى ستيپەنديا تاعايىنداۋ اكسياسىن جۇزەگە اسىرماق. ال، جەلتوقسان ايىندا ەلگە، مەملەكەتكە ايرىقشا قىزمەت ەتىپ جاتقان 100 تۇلعانى داۋىس بەرۋ جولىمەن سارالاۋ ىسكە اساتىن بولادى.

وسى ورايدا «Qamshy.kz» اقپارات اگەنتتىگى وقىرمانداردان، جەتىم-جەسىر جاندارعا قولعابىس تيگىزگىسى كەلەتىن اتىمتاي جومارت ادامداردان، ۇلگەرىمى جاقسى بولعانىمەن ماتەريالدىق قيىندىعى بار ستۋدەنتتەرگە كومەكتەسكىسى كەلەتىن جانداردان رەداكسياعا حات-حابار كۇتەدى.

سونداي-اق، ءوزىڭىزدىڭ اينالاڭىزدا، تانىستارىڭىز اراسىندا كومەككە مۇقتاج ستۋدەنتتەر مەن جەتىمدىك تارتىپ جۇرگەن قاراكوزدەردىڭ دە بايلانىس دەرەكتەرىن بەرىپ، كومەكتەسۋىڭىزگە بولادى. قايىرىمدىلىق شاراسىنا كەز-كەلگەن ادام قاتىسا الادى.

اتا-اناسى جوق، جەتىمدەر ۇيىندە تاربيەلەنىپ جاتقان جاسوسپىرىمدەرگە ءبىر جولعى قامقورلىق جاساۋ قىركۇيەك ايىنىڭ سوڭىنا جوسپارلانعاندىقتان از عانا ۋاقىت قالدى. سىزدەردەن «Qamshy.kz» اقپارات اگەنتتىگىنىڭ كەزەكشى ءجۋرناليستى قوڭىراۋ كۇتەدى.

جازيرا بايدالى +7 701 708 2725​