الەم چەمپيونى گەنناديي گولوۆكين جەر سىلكىنىسىنەن زارداپ شەككەن مەكسيكالىقتارعا 50 مىڭ دوللار كولەمىندە كومەك اقشانى اۋداردى.  

ەندى، سول جاققا ءوزى بارىپ قايتۋدى جوسپارلاپ وتىر. بۇكىلالەمدىك بوكس كەڭەسى (WBC) وسى مۇمكىندىكتى پايدالانىپ، GGGء-دى ءوز شارالارىنا قاتىستىرماقشى، دەپ xابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

"گولوۆكيننىڭ ۇلگى الارلىق قاسيەتتەرى كوپ. ول وتباسىنا ادال، جاقىن ادامعا ىلعي شىن جۇرەكتەن كومەكتەسۋگە تىرىسادى. سول ءۇشىن xالىق ونى جاقسى كورەدى، سىيلايدى. باسقا سپورتشىلار پروبلەماعا ۇرىنسا، GGG جانجالدان الىس جۇرەدى. الەمگە تانىمال بولۋى دا سودان شىعار. ءبىز ءوز چەمپيونىمىزدى ماقتان تۇتامىز. گولوۆكين - مەكسيكاداعى WBC ەلشىسى"، - دەيدى بۇكىلالەمدىك بوكس كەڭەسىنىڭ پرەزيدەنتى ماۋريسيو سۋلەيمان.

ايتا كەتەيىك، WBC بەلبەۋىنىڭ يەگەرى - گەنناديي گولوۆكين. ءدال وسى بەلبەۋدى مەكسيكالىق ساۋل الۆارەس قازاقستاندىق بوكسشىعا جەكپە-جەكسىز بەردى. سول كەزدە بۇكىلالەمدىك بوكس كەڭەسى "كانەلونى" گولوۆكينگە قارسى شىعۋعا مىندەتتەپ، كەلىسىمگە كەلۋگە ناقتى مەرزىم بەلگىلەگەن ەدى. الايدا الۆارەس بۇرىنعى پروموۋتەرمەن سوتتاسىپ جاتقانىن سىلتاۋراتىپ، WBC بەلبەۋىنەن ءوز ەركىمەن باس تارتتى. سول ءۇشىن مەكسيكالىق جانكۇيەرلەردىڭ قاھارىنا ۇشىرادى. بارلىعى بىردەي ونىڭ گولوۆكيننەن قاشىپ جۇرگەنىن بەتىنە باستى. سۇراق قويدى، پوست جازدى. ءتىپتى، ءوز تۋىنا GGGء-دىڭ اتىن ماقتاپ جازعان مەكسيكالىقتار دا شىعا باستادى.

وسىدان كەيىن ساۋل الۆارەس بۇكىلالەمدىك بوكس كەڭەسى مەن ءوز جەرلەسى - ماۋريسيو سۋلەيمانعا رەنجىپ، WBC اتاعى ءۇشىن مۇلدەم تالاسپايتىنىن مالىمدەدى. ارتىنان سۋلەيمان مىرزا قانشا جالىنسا دا، "كانەلو" العان بەتىنەن قايتقان جوق. گولوۆكينگە قارسى سوڭعى جەكپە-جەكتە دە WBC بەلبەۋى ءۇشىن تالاسپادى.