بۇگىن اقىرزامان ورنايدى. بۇل ءبىزدىڭ ەمەس، NASA عالىمدارىنىڭ ايتقان بولجامى. ەستەرىڭىزگە بولسا، عالىمدار وسى بەيسەنبىدە، ياعني بۇگىن تس استەرويدى جەرگە وتە جاقىن جانە ءقاۋىپتى قاشىقتىققا دەيىن جاقىن كەلەدى دەگەن بولاتىن. اقيقاتىن ەشكىم بىلمەسە دە حالىق مۇنداي جاڭالىققا ەلەڭ ەتپەي قويمايدى. سوڭعى جىلدارى قوعامدا ءدۇمپۋ تۋدىرىپ جۇرگەن «12 قازانداعى اقىرزامان» قانشالىقتى اقيقات؟ جانە بۇعان شاريعات نە دەيدى؟ وسى سۇراقتاردىڭ ىزىمەن شىعىس قازاقستان وبلىسى، وسكەمەن قالاسىنىڭ وكىل يمامى، حاليفا التاي مەشىتىنىڭ باس يمامى ەرمەك مۇقاتايۇلىن سوزگە تارتقان ەدىك.
– NASA عالىمدارىنىڭ بولجامىنا ءدىني تۇرعىدان نە ايتا الاسىز؟
–اقىرزاماننىڭ ەرتە مە، كەش پە بولاتىنى انىق. ونىڭ ناقتى قاشان ەكەنى اللا تاعالاعا عانا ايان. قاسيەتتى قۇراندا: «مۇحاممەد، ولار سەنەن قيامەتتىڭ قاشان بولاتىندىعىن سۇرايدى. «شىنىندا ونىڭ مالىمەتى راببىمنىڭ قاسىندا. ونىڭ ۋاقىتىن ءوزى عانا بىلەدى. كوكتەر مەن جەردەگى اۋىر جاعداي سەندەرگە كەنەتتەن-اق كەلەدى» دە. سەن ونى زەرتتەپ وتىرعانداي سۇراستىرادى. «شىنىندا ونىڭ ءبىلىمى اللانىڭ قۇزىرىندا. ءبىراق ادامداردىڭ كوبى ونى تۇسىنبەيدى» دەپ ايت» دەپ عايبي (كومەسكى) ىستەر جايلى ناقتى مالىمەت ءبىر اللاعا عانا ءمالىم ەكەنىن ەسكەرتەدى. ءابۋ ھۋرايرا (ر.ع) جەبىرەيىلدىڭ (ع.س) ادام سۋرەتىندە پايعامبارىمىزعا (س.ع.س) كەلىپ: «قيامەت قاشان بولادى؟» - دەدى. پايعامبارىمىز (س.ع.س): «ول جايلى سۇرالۋشى، سۇراۋشىدان ارتىق بىلمەيدى. ءبىراق ونىڭ بەلگىلەرىنەن سەنى حاباردار ەتەيىن» جانە: «التى نارسە كەلۋدەن بۇرىن ىزگى امال جاساۋعا اسىعىڭدار. ولار: كۇننىڭ باتىستان شىعۋى، ءداججال، دۇحان (ءتۇتىن)، ءدابباتۋل-ارد (حايۋان)، بىرەۋىڭنىڭ باسىڭا كەلەتىن ءولىم جانە جالپىعا بىردەي كەلەتىن قيامەت» دەپ قيامەت بەلگىلەرىنە ءمان بەرۋگە شاقىرادى. اركىم ءوزىنىڭ قانشا جاسىندا، قاي جىلى، قاي كۇنى دۇنيەدەن وتەتىنىن بىلگەندە ءالى ۋاقىتىم بار دەپ بويدى كەڭگە سالىپ جۇرە بەرەدى نەمەسە ۋاقىت تاياعان سايىن بويىن قورقىنىش بيلەپ، ومىردەن ءتۇڭىلىپ قوعامنان الشاقتاپ قالار ەدى. ءتىپتى، قۇلشىلىق جاساسا دا اللا رازىلىعىن كوزدەپ تولىق ماعىنادا جاساي الماي، ولەتىنىن ويلاپ الا كوڭىل بولىپ تۇرادى. قۇلشىلىق اللا تاعالانىڭ شەكسىز نىعمەتتەرىنە رازىلىق تۇرعىسىنان جاسالۋى، قورقىنىش اسەرىنەن زورلىقتى تۇردە جاسالماۋى كەرەك. ءاربىر ادام قاشان، قالاي ولەتىنىن بىلمەۋى، ءولىم قورقىنىشىن ءبىر ءسات بولسىن ۇمىتىپ (ولمەيتىندەي)، ۇمىتپەن اقىرەتى سانالاتىن توسىن اجال ارپالىسىنا ەركىن دايىندىق جاساۋى اللا تاعالانىڭ ءالسىز پەندەلەرىنە سىيلاعان كەڭشىلىك-راحمەتى دەگەن.
–اقىرزاماندى قالاي ەلەستەتەسىز؟
–اقىرزاماندى، تەك قانا قۇران مەن پايعامبارىمىزدىڭ (س.ع.س) ايتقان حاديستەرىنە سۇيەنە وتىرىپ ەلەستەتە الامىز. قيامەت – سۋردىڭ (سىرنايدىڭ) قاتتى داۋىسىنان كەيىن ىلە-شالا بۇرىن-سوڭدى بولماعان جەر سىلكىنىسى، سۋنامي، جانارتاۋدىڭ اتقىلاۋى سىندى ىستەرمەن دۇنيە تىرشىلىگىنىڭ اياقتالۋى. قۇران، حاديس قيامەت كۇنى توبەسى كوك تىرەگەن عيماراتتار، ءزاۋلىم زاۋىتتار، قىمبات باعالى كولىكتەر سياقتى ادام بالاسى جانىنداي جاقسى كورەتىن، اجىراماس مەنشىگى رەتىندە بىلگەن نارسەلەردىڭ بارلىعى توزاڭعا اينالىپ، تاپجىلماستاي بولىپ كورىنگەن تاۋلار تارىداي شاشىلاتىنىن ايتادى. قاسيەتتى قۇراندا: «ولار قيامەت مەزگىلىنىڭ وزدەرىنە كەنەتتەن كەلۋىن كۇتە مە؟ راسىندا ونىڭ بەلگىلەرى كەلدى عوي. قيامەت كەلىپ بولعاندا، ۇگىت الۋلارى نەگە جارايدى؟» دەپ قيامەتتىڭ بەلگىلەرى كەلگەنىن ايتسا، اللا ەلشىسى (س.ع.س) ەكى ساۋساعىن بىرىكتىرىپ تۇرىپ: «مەنىڭ پايعامبار بولىپ جىبەرىلۋىم مەن قيامەتتىڭ اراسى وسى ەكەۋى ءتارىزدى» دەپ سوڭعى پايعامبار بولىپ جىبەرىلۋى قيامەت كۇنىنىڭ جاقىندىعىنىڭ بەلگىسى ەكەنىن ەسكەرتكەن.
–قوعامعا ايتار ءسوزىڭىز بولسا، مارحابات.
– NASA عالىمدارى ايتتى ەكەن دەپ اللاعا دەگەن سەنىمىمىزدەن ايىرىلمايىق. جانە قيامەت كۇنىن كۇتىپ، قاراپ وتىرۋعا بولمايدى. عيبادات قىلىپ، قۇلشىلىقتارىڭىزدى ورىنداپ، يگىلىكتى ىستەرمەن اينالىسىڭىزدار! عايىپتى دا، بولاشاقتى دا ءبىلۋشى جالعىز اللا!
–اڭگىمەڭىزگە راحمەت!
بليس-سۇحباتتى جۇرگىزگەن مارجان ءابىش
پىكىر قالدىرۋ