ورتا سالماقتاعى WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق گەنناديي گولوۆكين (37-0-1، 33 كو) مەن مەكسيكالىق بوكسشى ساۋل «كانەلو» الۆارەس (49-1-2، 34 كو) اراسىنداعى ەكىنشى كەزدەسۋى 2018 جىلدىڭ مامىرىنان بۇرىن ءوتۋى مۇمكىن. 
بۇل تۋرالى مەكسيكالىق بوكسشىنىڭ كەلىسىمشارتتارىمەن اينالىساتىن، Golden Boy Promotions كومپانياسىنىڭ پرەزيدەنتى ەريك گومەس ايتتى، دەپ جازادى BoxingScene پورتالى.

ەكىنشى كەزدەسۋدىڭ قاشان وتەتىنى ناقتى بەلگىلەنگەن جوق. الايدا بۇگىندە كوپتەگەن بوكس ماماندارى «ەكىنشى كەزدەسۋدىڭ 5 مامىردا وتەدى» دەپ ايتىپ ءجۇر. 
«ەكىنشى كەزدەسۋدىڭ ناقتى قاشان وتەتىنى ءالى بەلگىسىز. بۇل ماسەلە دە كەلىسسوزدەر كەزىندە شەشىلەدى. مۇمكىن، جەكپە-جەك مامىردان بۇرىن دا ءوتۋى مۇمكىن. دەگەنمەن كەزدەسۋدى مامىر ايىندا وتكىزگەن قولايلى. بۇل ەڭ الدىمەن PPV ءۇشىن»، – دەدى گومەس. 

ايتا كەتەيىك، قازان ايىنىڭ باسىندا بۇكىلالەمدىك بوكس كەڭەسى گولوۆكين مەن الۆارەس اراسىنداعى ەكىنشى كەزدەسۋدىڭ وتۋىنە رەسمي كەلىسىم بەردى. ەكى بوكسشىنىڭ كومانداسى قازىرگى ۋاقىتتا كەلىسسوزدەر جۇرگىزىپ جاتىر. 
ەسكە سالايىق، گولوۆكين مەن «كانەلو» العاشقى كەزدەسۋىن 16 قىركۇيەك كۇنى لاس-ۆەگاستا وتكىزىپ، جەكپە-جەكتى تەڭ اياقتاعان ەدى. سونىمەن، قازاقستاندىق بوكسشى وزىنە تيەسىلى بارلىق بەلبەۋلەرىن قورعاپ قالعان بولاتىن.