قازاقستان رەسپۋبليكاسى پرەمەر-مينيسترىنىڭ ورىنباسارى اسقار جۇماعالييەۆ رەسەي فەدەراسياسىنا ءىسساپار بارىسىندا «سكولكوۆو» تەحنوساياباعىندا «يننوۆاسيالىق تەحنولوگيالار ساياباعىنىڭ» قازاقستاندىق وكىلدىگىنىڭ اشىلۋ سالتاناتىنا قاتىستى، سونىمەن قاتار رف ۇكىمەتى ءتوراعاسىنىڭ ورىنباسارى اركاديي دۆوركوۆيچپەن ەكىجاقتى سەرىكتەستىك ماسەلەلەرىن تالقىلادى.

قازاقستان رەسپۋبليكاسى پرەمەر-مينيسترىنىڭ ورىنباسارى اسقار جۇماعالييەۆ «سكولكوۆو» تەحنوساياباعىندا يننوۆاسيالىق دامۋدىڭ «اشىق يننوۆاسيالار-2017» VI ماسكەۋ حالىقارالىق فورۋمىنا قاتىستى.

بيىل فورۋمنىڭ باستى تاقىرىبى – سيفرلىق ەكونوميكا. الەمنىڭ 90 ەلىنەن جينالعان 18 مىڭنان استام قاتىسۋشى سيفرلىق ەكونوميكا مەن الەمدىك اقپاراتتاندىرۋعا قاتىستى عالامدىق ۇردىستەردىڭ ترانسفورماسيالانۋىن تالقىلاۋدا.

فورۋم اياسىندا «سكولكوۆو» تەحنوساياباعىنىڭ بازاسىندا «يننوۆاسيالىق تەحنولوگيالار ساياباعى» (يتس) اۆتونومدىق كلاستەرلىك قور وكىلدىگىنىڭ اشىلۋى ءوتتى.

«سكولكوۆوداعى» «يتس» وكىلدىگى قازاقستاندىق ستارتاپتاردىڭ ەاەو نارىعىنا شىعۋىنا قاجەتتى جاعداي جاساپ، ءبىلىم جانە اكسەلەراسيالىق باعدارلاما جانە سوفتلەندينگكە پلاتفورما تۇرىندە ساراپتامالىق قولداۋ كورسەتەدى. ال ەسەسىنە رەسەيلىك كومپانيالارعا جەڭىلدەتىلگەن سالىق تارتىپتەرى، ستارتاپتارىنا ينۆەستيسيا تارتۋ مەحانيزمدەرى، ق ر ءىرى كومپانيالارىمەن سەرىكتەستىك جانە ت.ب. ۇسىنىلادى.

«سكولكوۆوداعى» «يتس» وكىلدىگىنىڭ اشىلۋى وتكەن اپتادا سوچيدە ۇيىمداستىرىلعان جوعارى ەۋرازيالىق ەكونوميكالىق كەڭەس وتىرىسىنىڭ قورىتىندىسى بويىنشا مەملەكەت باسشىلارى اراسىنداعى كەلىسىم ۇردىسىندەگى ەاەو ەلدەرىنىڭ سيفرلىق ەكونوميكاسىن سايكەستەندىرۋگە جاساعان قارىمدى قادامداردىڭ ءبىرى بولدى. قازىرگى تاڭدا ءبىز ەلباسىنىڭ تاپسىرماسى بويىنشا ادامي كاپيتالدى جانە پرواكتيۆتى مەملەكەتتى دامىتۋ، سيفرلى ينفراقۇرىلىمدى جاساۋ جانە

ەكونوميكانىڭ بارلىق سالاسىن سيفرلاندىرۋ ماسەلەسىن قامتيتىن "سيفرلى قازاقستان" باعدارلاماسىن جەتىلدىرۋمەن اينالىسىپ جاتىرمىز. بۇل باعدارلامادا ەكوجۇيەنى دامىتۋ مەن ونەركاسىپ مەكەمەلەرىن سيفرلاندىرۋ سياقتى ماڭىزدى ەلەمەنتتەر بولادى. باعدارلاما جۋىردا پىسىقتالىپ جەتىلدىرىلەدى»،- دەدى ق ر پرەمەر-مينيسترىنىڭ ورىنباسارى اسقار جۇماعالييەۆ.

قازاقستان ۆيسە-پرەمەرى ءىسساپار بارىسىندا رەسەي فەدەراسياسىنىڭ ۇكىمەتى ءتوراعاسىنىڭ ورىنباسارى اركاديي دۆوركوۆيچپەن كەزدەستى. تاراپتار يننوۆاسيالىق سەرىكتەستىكتى نىعايتۋ قاجەت ەكەندىگىن ايتىپ، ناقتى باعىتتاردى تالقىلادى.

«ءبىز رەتتەۋشى ۇلگىلەردى ۇيلەستىرىپ، كيبەرقاۋىپسىزدىكتى قامتاماسىز ەتۋ، كوممۋنيكاسيالىق ينفراقۇرىلىم مەحانيزمدەرىن جانە ءبىلىم مەن عىلىم ماسەلەلەرىن سايكەستەندىرۋ كەرەكپىز. وسى ءتورت بازالىق باسىمدىق «رەسەي سيفرلى ەكونوميكاسى» باعدارلاماسىندا دا كورسەتىلگەن»، - دەدى رف ۆيسە-پرەمەرى اركاديي دۆوركوۆيچ.