الماتى قالاسىندا «بولاشاققا باعدار: رۋحاني جاڭعىرۋ» باعدارلاماسى اياسىندا ءبىرىنشى رەسپۋبليكالىق «كوشپەندىلەر اۋەنى» دومبىرا مەن قوبىزدا وينايتىن جاس ورىنداۋشىلاردىڭ بايقاۋى ءوتتى، دەپ حابارلايدى Qamshy.kz اقپارات اگەنتتىگى.

اتالمىش بايقاۋ 20-22 قازان ارالىعىندا پ.چايكوۆسكيي اتىنداعى الماتى مۋزىكالىق كوللەدجىندە ۇيىمداستىرىلدى. اتالمىش كوللەدج ديرەكتورى، ق ر ەڭبەك سىڭىرگەن مادەنيەت قايراتكەرى ءبىرجان ەسكەندىر ۇلى حاسانعالييەۆتىڭ باستاماسىمەن ۇيىمداستىرىلعان بايقاۋعا ەلىمىزدىڭ تۇكپىر-تۇكپىرىنەن ءتۇرلى ونەرپازدار ءوز باقتارىن سىناۋعا كەلگەن.

كوللەدج ديرەكتورى ءبىرجان ەسكەندىر ۇلى بۇگىنگى شارا جونىندە ايتىپ ءوتتى.

«بۇگىن پ.چايكوۆسكيي اتىنداعى الماتى مۋزىكالىق كوللەدجىندە ءبىرىنشى رەسپۋبليكالىق «كوشپەندىلەر اۋەنى» اتتى بايقاۋ ۇيىمداستىرىپ جاتىرمىز. بۇگىن ەرەكشە، ونەرگە باي كۇن. سەبەبى بۇگىن الدىمەن ۇلى كومپوزيتور پ.چايكوۆسكييعا ارنالعان ەسكەرتكىش اشىلدى، كەيىننەن «كوشپەندىلەر اۋەنى» اتتى حالىق اسپاپتارىندا وينايتىن ورىنداۋشىلار بايقاۋىن اشتىق. ءبىز ءۇشىن بۇل – وتە قۋانىشتى جاعداي.

بۇل شاراعا بىرنەشە اي بويى ءبىز دايىندىق جۇمىستارىن جۇرگىزدىك. قانشاما ادام ەڭبەك ەتتى. سول ەڭبەكتىڭ بۇگىن ناتيجەسىن كورىپ، كۋا بولىپ وتىرمىز. ايتا كەتەر بولساق، بيىل ءبىزدىڭ 85 جىلدىق مەرەيتويىمىز، سوعان دا دايىندىق رەتىندە وسى سىندى شارالاردى وتكىزىپ جاتىرمىز. بۇل جاسالىنىپ جاتقان دۇنيەلەردىڭ بارلىعى ونەردىڭ دامۋىنا سەپتىگىن تيگىزەدى.

بۇگىنگى شاراعا كوپتەگەن قوناقتار، بەلگىلى تۇلعالار كەلدى. ەسكەرتكىشتىڭ اشىلۋىندا جۇبانوۆ اتىنداعى حالىق اسپاپتار وركەسترى، «الاتاۋ» حور ءانسامبلى وزدەرىنىڭ ونەرلەرىن كورسەتتى»، - دەيدى ءبىرجان ەسكەندىر ۇلى Qamshy.kz اقپارات اگەنتتىگىنىڭ تىلشىسىنە بەرگەن سۇحباتىندا.

بەلگىلى بولعانداي، «كوشپەندىلەر اۋەنى» رەسپۋبليكالىق بايقاۋى ءۇش جىل قاتارىنان ۇيىمداستىرىلادى ەكەن. شارانىڭ نەگىزگى ماقساتى – حالىق اسپاپتارىنا قولداۋ كورسەتۋ، ولاردى دارىپتەۋ.

ءبىرجان ەسكەندىر ۇلىنىڭ ايتۋىنشا، جۇلدەلى ورىندارعا يە بولعان بايقاۋ جەڭىمپازدارى قارجىلاي سىياقىعا يە بولادى. ال بايقاۋدىڭ شارتى بويىنشا، باس جۇلدەگە تابىستالاتىن سىياقى ەكىگە بولىنەدى، ونىڭ جارتىسى بايقاۋ جەڭىمپازىنىڭ ۇستازىنا بەرىلسە، قالعان جارتىسى ورىنداۋشىعا بەرىلەدى. بۇل – بۇگىنگى بايقاۋدىڭ باستى ەرەكشەلىگى بولىپ وتىر.

«كوشپەندىلەر اۋەنى» بايقاۋى الماتى قالاسىندا قازاقستاننىڭ بۇكىل وڭىرلەرىنىڭ باسىن قوسپاق – ءبىزدىڭ بايقاۋىمىزعا قاتىسۋ ءۇشىن قازاقستاندىق مۋزىكالىق وقۋ ورىندارىنىڭ ەڭ ۇزدىك ستۋدەنتتەرى جينالدى. بىرىنشىدەن، بايقاۋ الماتى قالاسىنىڭ رەسپۋبليكانىڭ مادەني استاناسى رەتىندەگى مارتەبەسىن نىعايتۋعا ۇلەسىن قوسادى. ەكىنشىدەن، ۇلتتىق مۋزىكانىڭ دامۋىنا جاڭا سەرپىن بەرىپ، دومبىرا، قوبىز ونەرىنە قىزىعۋشىلىقتى ارتتىرادى، سازگەرلەردى ۇلتتىق مۋزىكا شىعارۋعا شابىتتاندىرادى»، - دەپ مالىمدەدى ول.

پ.چايكوۆسكيي اتىنداعى الماتى مۋزىكالىق كوللەدج وقىتۋشىسى، ۇيىمداستىرۋ كوميتەتىنىڭ مۇشەسى لاۋلا چەنەميسوۆا بۇگىنگى شارانىڭ نەگىزگى مىندەتتەرى مەن تالاپتارىنا بايلانىستى ايتىپ ءوتتى.

«كوشپەندىلەر اۋەنى» ءبىرىنشى رەسپۋبليكالىق ورىنداۋشىلار كونكۋرسى ءبىزدىڭ كوللەدجىمىزىدىڭ ديرەكتورى ءبىرجان ەسكەندىر ۇلىنىڭ يدەياسىمەن تۋىندادى. بۇگىنگى ءوتىپ جاتقان شاراعا نەگىزىنەن قولداۋ كورسەتىپ وتىرعان «Nomad Life» - ءومىردى ساقتاندىرۋ كومپانياسى بولىپ تابىلادى.

بايقاۋ ەكى نوميناسيا بويىنشا وتەدى: قوبىز جانە دومبىرا. ءار نوميناسيانىڭ وزدەرىنە جەكە بەرىلگەن ورىندارى بار. ال بۇگىنگى شاراعا ءادىل-قازى رەتىندە كەلىپ وتىرعان كىسىلەر جايىندا ايتار بولساق، جاس ورىنداۋشىلاردى باعالاۋعا ەلىمىزدىڭ تانىمال مۋزىكانتتارى شاقىرتىلدى. مىسالى، بەلگىلى قوبىزشى راۋشان مۋساحودجايەۆا، كۇيشى، كومپوزيتور، پروفەسسور، ق ر ەڭبەك سىڭىرگەن قايراتكەرى ۇسەنوۆ ەرمۇرات، دومبىراشى مۇرات ابۋعازى سىندى ەلىمىزگە بەلگىلى تۇلعالار بۇگىنگى بايقاۋ قاتىسۋشىلارىنىڭ ونەرىن باعالايدى»، - دەيدى لاۋلا چەنەميسوۆا.

ونىڭ ايتۋىنشا، بايقاۋعا قاتىسۋعا نيەت بىلدىرگەندەر وتە كوپ، بۇگىنگى شاراعا باعىن سىناپ كەلگەندەردىڭ سانى جۇزگە جۋىق ەكەن.

بۇگىننەن باستاۋ العان «كوشپەندىلەر اۋەنى» بايقاۋىنىڭ نەگىزگى مىندەتى – قازاق ۇلتتىق اسپاپتارىندا مۋزىكالىق ورىنداۋدى دارىپتەۋ جانە دامىتۋ، دارىندى بالالارعا قولداۋ كورسەتۋ، سونىمەن قاتار، كاسىبي مۋزىكالىق-ورىنداۋشىلىق شەبەرلىك دەڭگەيىن ارتتىرۋ بولىپ وتىر.