بۇگىن،  20 قازاندا الماتى قالاسىنىڭ تىلدەردى دامىتۋ باسقارماسى «رۋحاني جاڭعىرۋ» باعدارلاماسى اياسىندا «تەكتى ءسوزدىڭ تورەسى - تەرمە» قالالىق بايقاۋىن وتكىزدى دەپ حابارلايدى Qamshy.kz اقپارات اگەنتتىگىنىڭ ءتىلشىسى.

«تەكتى ءسوزدىڭ تورەسى - تەرمە» بايقاۋىنىڭ باستى ماقساتى - ۇلتتىق قۇندىلىقتاردى دارىپتەۋ ارقىلى جاستاردى قازاقتىڭ ونەرىمەن سۋسىنداتۋ، «جىر-تەرمە» ۇلتتىق جانرىن جاستاردىڭ اراسىندا كەڭىنەن  ناسيحاتتاۋ. 

 بايقاۋعا قاتىسقان جاستار اقتان كەرەي ۇلىنىڭ  «ويلاماڭدار جىگىتتەر»، «قالاعاندارىڭ ءسوز بولسا»، «جايىق دەگەن جاندى سۋ»، نۇرپەيىس ءبايعاليننىڭ «ەڭبەك تۋرالى تولعاۋى»، «شال اقىننىڭ وسيەتى»، مايلىقوجانىڭ «ادامنىڭ ءبىر قىزىعى بالا دەگەن» سىندى تەرمەلەرىن ورىندادى.

 سونىمەن بىرگە، ءوز شىعارماشىلىعىنان تەرمە ورىنداعان قاتىسۋشى ۇمىتكەرلەر دە بولدى. ءار اۋداننان كەلگەن قاتىسۋشى ۇمىتكەرلەردىڭ كوبى ستۋدەنت پەن جۇمىس ىستەيتىن جاستار.

وسى بايقاۋدا «مەن قازاقپىن» تەرمەسىن ورىنداعان ءبازىلجانوۆ ءبىرجان ەسىمدى ۇمىتكەر ءوزىنىڭ بۇل بايقاۋعا ەرەكشە ىقىلاسپەن دايىندالعانىن جەتكىزدى:

«ناۋرىزباي اۋدانىنىڭ اتىنان كەلىپ وتىرمىن. ءوزىم جامبىل اتىنداعى فيلارمونياسىندا جۇمىس ىستەيمىن. كەنتال نازاربەكوۆتىڭ ءسوزى مەن انىنە جازىلعان «مەن قازاقپىن» تەرمەسىن ورىندادىم. بايقاۋعا قاتىسۋداعى ماقساتىم بولاشاق جاستارعا قازاقتىڭ كەڭ بايتاق جەرى مەن ەلى بار ەكەنىن ءارقاشان جادىندا تۇتسا دەگەن وي» - دەيدى ارنايى جۇلدە يەگەرى.

   جۇلدەلى ورىن العان قاتىسۋشىلار ءتيىستى دارەجەدەگى ديپلومدار مەن باعالى سىيلىقتار، قاتىسۋشىلارعا العىس حاتتار مەن ەستەلىك سىيلىقتارمەن ماراپاتتالدى. حالىقتىڭ ونەردى ناسيحاتتاۋعا باعىتتالعان بۇل بايقاۋدىڭ جەڭىمپازدارى كەلەسى  رەسپۋبليكالىق كەزەڭگە جىبەرىلەدى.