سىبايلاس جەمقورلىققا قارسى ءىس-قيمىل ۇلتتىق بيۋروسى الماتى قالاسى مەن شىعىس قازاقستان وبلىسىنىڭ بۇرىنعى اكىمى ۆيكتور حراپۋنوۆ پەن ونىڭ جارى لەيلا حراپۋنوۆتارعا قاتىستى قىلمىستىق ءىستى تەرگەپ جاتىر. بۇل تۋرالى ۆەدومستۆونىڭ باسپا ءسوز قىزمەتى حابارلايدى، دەپ جازادى Qamshy.kz اقپارات اگەنتتىگى.

«قازىرگى ۋاقىتتا تەرگەۋ بارىسىندا اسا اۋىر قىلمىستارعا بارعانى تۋرالى جينالعان دالەلدەمەلەر ۆيكتور حراپۋنوۆتىڭ ق ر قك 235-بابى (ءبىر نەمەسە بىرنەشە قىلمىس جاساۋ ماقساتىندا ۇيىمداسقان توپ قۇرۋ نەمەسە باسشىلىق ەتۋ)، 176-بابى (سەنىپ تاپىسىرىلعان مۇلىكتى يەمدەنۋ نەمەسە ۇرلاۋ)، 177-باپ (الاياقتىق)، 193-بابى (زاڭسىز جولمەن الىنعان اقشانى نەمەسە وزگە مۇلىكتى لەگاليزاسيالاۋ)، 307 (قىزمەت وكىلەتتىلىگىن اسىرا پايدالانۋ) جانە 311 (پارا الۋ) باپتارى بويىنشا قىلمىستىق ارەكەتتەر جاساعانىن انىقتاۋعا مۇمكىندىك بەردى.  

جارى لەيلا حراپۋنوۆانىڭ ارەكەتتەرى 235 (ءبىر نەمەسە بىرنەشە قىلمىس جاساۋ ماقساتىندا ۇيىمداسقان توپ قۇرۋ نەمەسە باسشىلىق ەتۋ)، 177 (الاياقتىق) جانە 193 (زاڭسىز جولمەن الىنعان اقشانى نەمەسە وزگە مۇلىكتى لەگاليزاسيالاۋ) باپتارى بويىنشا ايىپتالدى.

ۇلتتىق بيۋرو انىقتاعانداي، كۇدىكتى حراپۋنوۆتار مەن ءىلياسوۆانىڭ قازاقستاننان تىس اۋماقتان تابىلعانىنا جانە سىبايلاس جەمقورلىققا قارسى قىزمەت كورىنىستەرىنەن جالتارعاندارى ءۇشىن ق ر قك 206-بابىنىڭ 8 بولىمىنە سايكەس، پروكۋروردىڭ كەلىسىمىمەن بۇقارالىق اقپارات قۇرالدارىندا ولاردىڭ ىس-ارەكەتتەرىنىڭ بىلىكتىلىگى جايىندا حابارلاما جاريالاندى.

ۇكىمنىڭ جاريالانۋىنا قاتىسۋ ءۇشىن جانە قاجەتتى تەرگەۋ ارەكەتتەرىن جۇرگىزۋ ءۇشىن كۇدىكتى ۆ. حراپۋنوۆ، ل. حراپۋنوۆا جانە ا. ءىلياسوۆ 2017 جىلدىڭ 24 قازانىنا دەيىن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ مىنا مەكەنجايداعى اكىمشىلىك عيماراتىنا كەلۋى ءتيىس: ق ر، استانا ق.، سەيفۋليين كوشەسى، 37.

بۇدان بۇرىن حراپۋنوۆتار سىبايلاس جەمقورلىققا قارسى قىزمەتتىڭ تەرگەۋىنە شاقىرىلعان، الايدا ولار بەلگىلەنگەن ۋاقىتتا كەلمەگەن، ءارى سەبەبىن دە تۇسىندىرمەگەن.

19 قازاندا حراپۋنوۆتارعا قاتىستى قىلمىستىق ءىس سوتقا جىبەرىلگەن. ولارمەن بىرگە حراپۋنوۆتىڭ قول استىندا قىزمەت اتقارعان 14 ادام سوتقا تارتىلدى. بارلىق فاكتىلەر ەگجەي-تەگجەي زەرتتەلدى.