الماتىدا «رۋحاني جاڭعىرۋ» قازاقستاننىڭ تۇڭعىش پرەزيدەنتى ساياباعىندا بالالاردى بەيىمدەۋگە ارنالعان ينكليۋزيۆتى الاڭ اشىلدى، دەپ حابارلايدى Qamshy.kz اقپارات اگەنتتىگى قالالىق اكىمدىكتىڭ باسپا ءسوز قىزمەتىنە سىلتەمە جاساپ.

بۇل كەشەنگە قاجەت قاراجات بىلتىر جەلتوقساندا مەسەناتتار مەن «دارا» قورى ۇيىمداستىرعان قايىرىمدىلىق اۋكسيونىندا جينالعان ەدى.

«بارلىق بالالارعا قوجەتىمدى  مۇنداي الاڭداردى الماتىدا جانە باسقا  قالالاردا اشۋدى جوسپارلادىق. مۇنداي كەشەندەردىڭ جابدىقتارىن  وتاندىق  جەتكىزۋشىلەردەن الۋدى ۇيعارۋدامىز، سونىڭ ارقاسىندا الماتىدا بالالار ءۇشىن تەگىن ءارى  ەش كەدەرگىسىز  الاڭدار كوپ بولادى دەگەن سەنىمدەمىن»، - دەدى «دارا» قورىنىڭ الماتىداعى ديرەكتورى ايناش قاسەنوۆا.

480 شارشى مەتر اۋماقتا سوزىلىپ جاتقان الاڭدا بالدىرعانداردىڭ ءوسىپ- جەتىلۋىنە وڭ اسەر ەتەتىن توبەشىگى جانە كەڭ پاندۋسى بار ويىن كەشەنى، بەيىمدەۋ كارۋسەلى مەن قۇمدىق، مۋزىكالىق كومپونەنتتەر، فيتنەس-ترەناجەرلەر بار.

ترەناجەرلەر مەن ويىن ەلەمەنتتەرى ۆەستيبۋليارلى جانە ەستۋ قابىلەتىن ارتتىرادى، دەنە قوزعالىسى مەن تاكتيللى سەزىنۋدى جاقسارتادى. اقپاراتتىق پانەلدەر ءبرايلدىڭ تاكتيلدى ءشريفتىن ۇسىنادى،  قيمىل ءتىلىن، PEKS كارتوچكاسىن كورسەتەدى، ەرەكشە بالدىرعاندارعا وزگەلەردىڭ ءتىلىن ۇعىنا ءبىلۋدى ۇيرەتەدى.

«مەن قايىرىمدىلىق شاراسى بارىسىندا وسىنداي ماڭىزدى جوبانى جۇزەگە اسىرۋعا جەتەتىن قارجى جيناعانىمىزعا ماقتانامىن. بۇل كەشەنگە 20 ملن تەڭگە كولەمىندە قارجى جۇمسالدى»، - دەپ اتاپ ءوتتى جوبا دەمەۋشىسى جاننا كان.

قالادا «مەنىڭ اۋلامداعى سپورت» الەۋمەتتىك جوباسى اياسىندا 5،5 مىڭ بالانى قامتيتىن 75 سپورت الاڭى، ال ۆوركاۋتتار ءۇشىن 28 سپورتتىق قوندىرعى جاڭارتىلدى. ءار اۋداندا  بيىل قىستا تەگىن مۇز كاتوكتارى پايدا بولادى.

الماتى قالاسى ءبىلىم  باسقارماسىنىڭ اقپاراتى بويىنشا، قالادا  قازىرگى كەزدە 4 پسيحولوگيالىق- مەديسينالىق كونسۋلتاسيا، 7 پسيحولوگيالىق-پەداگوگيكالىق كوررەكسيا كابينەتى جۇمىس ىستەيدى.

جىل اياعىنا دەيىن ناۋرىزباي اۋدانىندا وسىنداي كونسۋلتاسيا مەن كابينەت اشۋ جوسپارلانعان. بيىلعى جىلدىڭ مامىر ايىندا ەرەكشە قامقورلىقتى قاجەت ەتەتىن  ازاماتتار ءۇشىن الماتىنىڭ فلوريستيكا تەحنولوگياسى كوللەدجىنىڭ بازاسى نەگىزىندە كاسىبي ءبىلىم بەرۋدىڭ رەسۋرستىق ورتالىعى  اشىلعان ەدى.

ۇستىمىزدەگى جىلدىڭ 9 ايى ىشىندە پسيحولوگيالىق- مەديسينالىق كونسۋلتاسيادا - 4576 بالدىرعانعا، پسيحولوگيالىق-پەداگوگيكالىق كوررەكسيا كابينەتىندە 984 بالاعا قاجەتتى  كومەك  كورسەتىلدى.