الماتى وبلىسى، ەڭبەكشىقازاق اۋدانى، ەسىك قالاسىنداعى جاستار ساياباعىندا جامبىل جابايەۆتىڭ، ال، مادەنيەت ءۇيىنىڭ الدىنداعى گۇلزاردا تۇمانباي مولداعالييەۆتىڭ ەسكەرتكىشى اشىلدى، دەپ حابارلايدى Qamshy.kz اقپارات اگەنتتىگى «ەگەمەن قازاقستان» گازەتىنىڭ سايتىنا سىلتەمە جاساپ حابارلايدى.

قوس الىپتىڭ ءبىر كۇندە اشىلعان مۇسىندەرىنىڭ سالتاناتتى جيىنىندا وبلىس اكىمىنىڭ ورىنباسارى جاقسىلىق ومار:

– ەلباسىمىز نۇرسۇلتان نازاربايەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «ۇلتتىق مادەنيەت ساقتالماسا، ەشقانداي جاڭعىرۋ بولمايدى» دەگەن ەدى. بۇگىنگى شارانى ۇلتتىق مادەنيەتكە ارنالعان يگى ىستەردىڭ ءبىر پاراسى دەپ بىلىڭىزدەر. وتكەن جىلى سەربيانىڭ بەلگراد قالاسىندا جامبىل بابامىزعا ەسكەرتكىش ورناتىلدى. بۇگىنگى شارا سونىڭ زاڭدى جالعاسى، – دەدى.

بۇدان كەيىن قازاقستان جازۋشىلار وداعى باسقارماسىنىڭ ءتوراعاسى، اقىن نۇرلان ورازالين ءسوز سويلەدى:

– ەسىك ءوڭىرى – قاسيەتتى جەر. وندا ەجەلگى بابالارىمىزدىڭ سۇيەكتەرى جاتىر. ساق، ءۇيسىن داۋىرىنەن قالعان جادىگەرلەر سولار جايلى بىزگە سىر شەرتىپ تۇرعانداي. التىن ادام بۇكىلالاشتىق ورتاق سيمۆولعا اينالدى. وسى جەردە ۇلى جىراۋدىڭ ەسكەرتكىشىنىڭ اشىلعانى جاقسىلىقتىڭ نىشانى. جامبىل ۇرپاقتارى اتىنان اسكەربەك ابايەۆ ءسوز الىپ، بابا مۇراسىنىڭ بۇگىنگى ۇرپاقتارمەن قاۋىشىپ جاتقانىن، جىر الىبىنىڭ قازاقپەن بىرگە ماڭگى جاسايتىنىن، بۇگىنگى سالتانات سونىڭ دالەلى ەكەنىن تىلگە تيەك ەتتى. بيىكتىگى 5 مەتر، تۇعىرى گرانيتتەن قۇيىلعان جامبىل بابامىزدىڭ قولا ءمۇسىنىن جاساعان نۇرعالىم يسابايەۆ. ساۋلەتشىلەرى – جانگەلدى وسان مەن سەيىتحان قىرقىنبايەۆ. جاقسىلىق ومار، نۇرلان ورازاليندەر ءسوز سويلەپ، اقىننىڭ قازاق ادەبيەتىنەن الار ورنى مەن ەل رۋحانياتىنداا سىڭىرگەن ورنىنا توقتالىپ، ءسوز سويلەسە، ءشومىشباي سارييەۆ اقىنعا ارناعان ولەڭىن وقىدى. م.اۋەزوۆ اتىنداعى ادەبيەت ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى ءۋاليحان قاليجان اقىن جايلى ەستەلىكتەر ايتتى. كەزىندە تۇماعاڭنىڭ ءوزى قىزمەت ەتكەن «بالدىرعان» جۋرنالىنىڭ باس رەداكتورى دۇيسەن ماعلۇموۆ باستاعان جۋرناليستەر قاۋىمى دا اقىنعا قۇرمەت كورسەتتى. اقىننىڭ جارى كۇلتاي اپا بۇل شارانى ۇيىمداستىرۋشىلارعا، كوپشىلىككە ريزاشىلىعىن ءبىلدىرىپ، العىس ايتتى. تۇمانباي بەينەسىنىڭ ءمۇسىنشىسى – التاي بەيسەنوۆ. ساۋلەتشىسى – قۇرمانعازى قادىروۆ. سالتاناتتى جيىننىڭ سوڭى مەرەكەلىك كونسەرتپەن جالعاستى. بەلگىلى ونەر قايراتكەرلەرى نۇرعالي ءنۇسىپجانوۆ، ماقپال ءجۇنىسوۆا، سۇلۋشاش نۇرماعانبەتوۆالار باستاعان ونەرپازدار ءان شىرقاپ، ەلگە قۇتتى بولسىن ايتتى.

الماس  ءنۇسىپ