الماتى اكىمى باۋىرجان بايبەك جۇمىس ساپارىنىڭ اياسىندا قالالىق ارىق جەلىسىنىڭ قۇرىلىسى مەن رەكونسترۋكسيالانۋ بارىسىن تەكسەردى، دەپ حابارلايدى.

جۇمىس ساپارى اياسىندا الماتى اكىمىنە الاتاۋ اۋدانىنىڭ العاباس شاعىن اۋدانىندا سۋاعار جەلىسى مەن سۋ بۇرۋ جۇيەسىن سالۋ بويىنشا اتقارىلعان جۇمىستار تۋرالى اقپارات بەرىلدى.

اۋداندا شامامەن 7 شاقىرىم بولاتىن ارىق جيەكتەرىن سالۋ جۇمىستارى اياقتالدى.

«تەپلوەنەرگەتيكا» جانە «ەنەرگوسترويتەل» ساياجاي ماسسيۆتەرىنەن وتەتىن قارعالى وزەنىنىڭ بويىندا جوندەۋ جۇمىستارى جالعاسىپ جاتىر.

وزەن بويىنىڭ 1300 مەترى تەمىربەتونمەن كۇشەيتىلەدى. وزەن ارناسىن مەحانيكالىق تازالاۋ بويىنشا جۇمىستار اياقتالدى.

سونداي-اق، الماتى قالاسىنىڭ اكىمى ناۋرىزباي اۋدانىنداعى نادىروۆ، تاجييەۆ، كۇلبەكوۆ جانە سلانوۆ كوشەلەرىندەگى 4 شاقىرىمدىق ارىق جەلىلەرىنىڭ قۇرىلىسىمەن دە تانىستى. وندا جولداردى اسفالتتاۋعا دايىندىق جۇمىستارى جۇرگىزىلۋدە.

بوستاندىق اۋدانى باعاناشىل شاعىن اۋدانى جانە مەدەۋ اۋدانىنىڭ تاير كوشەسى بويىنشا، جەتىسۋ اۋدانىنىڭ «مالايا الماتينكا» وزەنى بويىنان ۆولوچايەۆسكايا كوشەسى بويىنداعى قورشاۋدى كۇشەيتۋ بويىنشا قۇرىلىس جۇمىستارىنىڭ بارىسى تەكسەرىلدى.

بۇل ۋچاسكەلەردە گابيوندى كونسترۋكسيالاردان جاسالعان قورعانىس قابىرعالارى ورناتىلىپ، جەر استى جۇمىستارى ءجۇرىپ جاتىر.

جەتىسۋ اۋدانىنداعى بوكتەر 345 مەترگە سوزىلىپ جاتىر. قۇزدىڭ بيىكتىگى 7 مەترگە دەيىن جەتەدى. قازىرگى ۋاقىتتا بارلىق جوندەۋ جۇمىستارى اياقتالدى.

مەدەۋ اۋدانىندا كولبەۋ بوكتەرلەردىڭ ۇزىندىعى 470 مەترگە جەتەدى. قازىرگى تاڭدا ۋچاسكەدە مەتاللدى قورشاۋلاردى، بەتون بلوكتاردى، اعاشتان ىستەلگەن شارۋاشىلىق قورا-جايلاردى دەمونتاج جاساۋ جۇمىستارى وتكىزىلۋدە.

بۇل جۇمىستار جوسپار بويىنشا وسى جىلدىڭ قاراشا ايىندا اياقتالماق. تەك جەر استى سۋلارىنىڭ پايدا بولۋىنان جۇمىستار ۇزاق ۋاقىتقا سوزىلىپ كەتۋى مۇمكىن ەكەندىگى ايتىلۋدا.