الماتىدا جىل باسىنان بەرى 50 ويىن مەكەمەسى جابىلعان.

بۇل تۋرالى الماتى قالاسى كاسىپكەرلەر پالاتاسىنىڭ كونسۋلتاسيالىق كەڭەس وتىرىسىندا ايتىلدى.

«ەكونوميكالىق تەرگەۋ قىزمەتىنىڭ مالىمەتى بويىنشا 2017 جىلدىڭ باسىنان بەرى 50 ويىن مەكەمەسى جابىلدى. ونىڭ ىشىندە 43 مەكەمە ەلەكتروندى كازينومەن اينالىسسا، 7 - ويىن اپپاراتىنىڭ زالى رەتىندە جۇمىس ىستەپ تۇرعان.  617 كومپيۋتەرلىك تەحنيكا، 246 تەلەديدار، 117 ەلەكتروندى تەرمينال، 21 ويىن اۆتوماتى مەن شامامەن 6 ملن تەڭگە اقشالاي قارجى الىندى»، - دەپ حابارلادى الماتى قالاسى مەملەكەتتىك كىرىستەر دەپارتامەنتىنىڭ باسشىسى اسقار تىنىسبەكوۆ.

دەپارتامەنت باسشىسى بيۋدجەتكە تۇسەتىن سالىق پەن وزگە دە تولەمدەردىڭ بولجانعان كورسەتكىشىن دە باياندادى. الماتىدا 183 754 كاسىپكەر جۇمىس ىستەيدى، ونىڭ ىشىندە 74،9 مىڭى زاڭدى تۇلعا جانە 108،9 مىڭى - جەكە كاسىپكەرلىك.

الماتى قالاسى بيۋدجەتىنىڭ كىرىس بولىگى 103%-عا ورىندالعان. ياعني، 1 206 058 ملن تەڭگە جوسپارلانسا،  1 246 762 ملن تەڭگە سالىق تۇسكەن.

 «كونسۋلتاتيۆتىك-كەڭەس بەرۋشى ورگاننىڭ الدىڭعى وتىرىسىنىڭ قورىتىندىسى بويىنشا بيزنەستىڭ ساۋالىنا قاتىستى «قازاقتەلەكوم» اق ەلەكتروندى شوت-فاكتۋرا اقپاراتتىق جۇيەسى كانالى وپەراتورىنىڭ وتكىزۋ قابىلەتىن ارتتىرۋ تۋرالى ۇسىنىس جولدادى. ناتيجەسىندە كانالدىڭ جۇگى تۇراقتالدى جانە 500 مبيت/س دەيىن رەتتەلدى»، - دەپ اتاپ ءوتتى اسقار تىنىسبەكوۆ.

سالالىق قاۋىمداستىقتار مەن كومپانيالارعا جالعان لوتورەيالار مەن اقشا ۇتىسى بار ينتەرنەت-ويىندارىنىڭ زياندى اسەرى تۋرالى، سونداي-اق زاڭسىز ويىن بيزنەسىمەن اينالىساتىن تۇلعالاردىڭ، جالپى اۋماقتا سونداي ويىن اۆتوماتتارىن ورنالاستىرۋ ءۇشىن ورىنجايدى جالعا بەرۋشىلەر مەن ولاردىڭ يەلەرىنىڭ قىلمىستىق جاۋاپتىلىعى تۋرالى تاعى ءبىر ايتىلدى.

كەزدەسۋ بارىسىندا ەلەكتروندى شوت-فاكتۋرانى بەرۋ كەزىندە قايتالاناتىن قاتەلىكتەر، استانا-1 اقپاراتتىق جۇيەسىن ەنگىزۋ ماسەلەلەرى قارالدى.