الماتى قالا قۇرىلىسى كەڭەسى كوپپاتەرلى ءۇش تۇرعىن ءۇي كەشەنىنىڭ جانە بيزنەس ورتالىعىنىڭ قۇرىلىسىن ماقۇلدادى.

وسى نىسانداردى سالۋعا 74،8 ملرد. تەڭگە كولەمىندە جەكە ينۆەستيسيا تارتىلادى.

قالادا يگەرىلمەگەن 9،9 گا جەردە جالپى اۋماعى 188 مىڭ شارشى مەتر تۇرعىن ءۇي بوي كوتەرەدى. پايدالانۋعا 2787 ورىندىق اۆتوتۇراق پەن ءتورت ورتا ءبىلىم بەرەتىن مەكتەپ بەرىلەدى.

بوستاندىق اۋدانىندا 21 قاباتتى «سەيفۋللين» تۇرعىن ءۇي كەشەنىنىڭ قۇرىلىسى باستالادى. كەشەن ىشىندە 120 ورىندىق بالاباقشا ورنالاسادى.

جوبادا لاندشافتىق اۋلالارمەن ۇسىنىلعان جەراستى اۆتوتۇراق بار. قۇرىلىس جۇمىستارى 25 اي ىشىندە اياقتالادى.

كومپانيا الەۋمەتتىك جاۋاپكەرشىلىك اياسىندا 160 ورىنعا ارنالعان بالاباقشا سالىپ، ونى كوممۋنالدىق مەنشىككە بەرمەك.

ساتبايەۆ پەن اباي داڭعىلدارىنىڭ اراسىندا تىلەندييەۆ كوشەسىنىڭ باتىسىنا قاراي 12 جانە 16 قاباتتىق 19 تۇرعىن ءۇي كەشەنى سالىنادى. كەشەن اۋماعى ءۇش ايماققا بولىنگەن. ونىڭ ىشىنە اۋلا، قوعامدىق كەڭىستىك جانە 200 ورىندىق قولجەتىمدى بالاباقشا بولادى. قۇرىلىس جۇمىستارىنا 36 اي ۋاقىت بەرىلگەن.

سونىمەن قاتار، بوستاندىق اۋدانىندا ءال-فارابي داڭعىلى مەن روزىباكييەۆ كوشەسىنىڭ قيىلىسىندا پارك-وفيس جوباسى ىسكە اسىرىلاتىن بولادى.

ءال-فارابي داڭعىلىنان جوعارى ايماقتا قۇرىلىسقا تىيىم سالىنعاندىقتان، عيماراتتىڭ بيىكتىگى 12 مەتردەن اسپايدى.

اۋەزوۆ اۋدانىنداعى №3 شاعىن اۋداندا ءتورت 9 جانە 12 قاباتتى تۇرعىن ءۇي كەشەنى پايدا بولادى. كەشەندە ەكى دەڭگەيلى جەراستى پاركينگ پەن 60 ورىنعا ارنالعان بالاباقشا سالۋ جوسپارلانعان. نىساندار 20 ايدا بوي كوتەرەدى.

جوبالاردى قاراۋ بارىسىندا باستى باسىمدىق كولىك تۇراعى سانىنا، ىشكى ارلەۋ جۇمىستارىنا ساپالى ماتەريالداردى پايدالانۋعا، ۇيلەردىڭ سىرتىن جارىقتاندىرۋعا، كىشىموبيلدى توپتارعا جاعداي جاساۋعا، الاڭداردى جاسىلداندىرۋعا بەرىلەدى.