وسكەمەندەگى وبلىستىق انا مەن بالا ورتالىعىنان دۇنيەگە ۇشەم اكەلگەن باقىتتى انا ءۇش ارىسىمەن بىرگە ۇيگە شىقتى، دەپ Qamshy.kz اقپارات اگەنتتىگى قازاقپاراتقا سىلتەمە جاساپ حابارلايدى.  

اقارىس، جانارىس جانە بەكارىس ەسىمدى ۇلدار 11 قازان كۇنى دۇنيەگە كەلگەن. ولاردى پەرزەنتحانادان شىعارىپ الۋعا تۋعان-تۋىستارى، جولداس-جورالارى جينالدى. باقىتتى وتباسى ۇيلەرىنە، ياعني كۇرشىم اۋدانىنداعى سارىولەڭگە اتتاندى. كۇرشىمدىك مايرا مەن ازىمبەكتىڭ بۇل شاقالاقتاردان بولەك التى جانە ءۇش جاستاعى ەكى قىزى بار. مايرانىڭ ايتۋىنشا، ءوزىنىڭ جانە جولداسىنىڭ تۋعاندارى اراسىندا ەگىزدەر دۇنيەگە كەلگەنىمەن، ۇشەمدەر بولعان ەمەس. ۇشەمنىڭ اناسى پەداگوگ بولسا، اكەسى ءوز كاسىبىمەن اينالىسادى.   نارەستەلەر ومىرگە كەسار تىلىگىمەن كەلگەن، ءارقايسىسىنىڭ سالماعى ەكى كەلىدەن ارتادى. دەندەرى ساۋ. وبلىستىق انا مەن بالا ورتالىعى ديرەكتورىنىڭ مىندەتىن اتقارۋشى قارلىعاش ماجيرينوۆانىڭ ايتۋىنشا، ەندى سابيلەر اۋداندىق اۋرۋحانا دارىگەرلەرىنىڭ قامقورلىعىندا بولادى. «جىل سايىن بىزدە توعىز مىڭداي نارەستە ءومىر ەسىگىن اشادى. جىل باسىنان بەرى 81 ەگىز تۋدى. سوڭعى ءۇش جىل قاتارىنان دۇنيەگە ۇشەمدەر كەلدى. ولاردىڭ بارلىعىنىڭ دەنساۋلىعىن ءبىز قاتاڭ باقىلاپ وتىرامىز»، - دەيدى قارلىعاش ماجيرينوۆا. كوپبالالى وتباسىنا انا مەن بالا ورتالىعىنىڭ دارىگەرلەرى مەن مەديسينالىق قىزمەتكەرلەرى سىي-سياپاتتارىن جاساپ، شىعارىپ سالدى.