قازاقستان رەسپۋبليكاسى پرەزيدەنتى ن.ءا. نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىن جۇزەگە اسىرۋ ماقساتىندا الماتى قالاسىندا مەدەۋ اۋدانى اكىمىنىڭ كوشپەلى قوعامدىق قابىلداۋى بولىپ ءوتتى، دەپ حابارلايدى Qamshy.kz اقپارات اگەنتتىگى.

اتالمىش شارانىڭ نەگىزگى ماقساتى – بيلىك پەن حالىق اراسىنداعى بايلانىستى نىعايتۋ، تۇرعىندار اراسىندا كۇندەلىكتى شەشىمىن تاپپاي جۇرگەن تۇيتكىلدى ماسەلەلەردىڭ وڭ شەشىمىن تابۋ.

قوعامدىق قابىلداۋعا مەدەۋ اۋدانىنىڭ اكىمى ەرجان جۇمات ۇلى جىلقىبايەۆ، الماتى قالاسى تابيعي رەسۋرستار جانە تابيعاتتى پايدالانۋ رەتتەۋ باسقارماسى، الماتى قالاسى بويىنشا قۇقىقتىق ستاتيستيكا جانە ارنايى ەسەپكە الۋ جونىندەگى باسقارماسى، مەدەۋ اۋداندىق سوتى، ەنەرگەتيكا جانە كوممۋنالدىق شارۋاشىلىق باسقارماسى وكىلدەرى، اۋدان پروكۋرورى، اۋداندىق جەرگىلىكتى پوليسيا، توتەنشە جاعدايلار، تۇتىنۋشىلاردىڭ قۇقىقتارىن قورعاۋ، جۇمىسپەن قامتاماسىز ەتۋ الەۋمەتتىك باعدارلامالار، ءبىلىم بولىمدەرىنىڭ باسشىلارى، كاسىپكەرلەر پالاتاسى، «دامۋ» قورى وكىلدەرى جانە وزگە دە اۋداندىق قۇرىلىمدار قاتىستى. سونىمەن قاتار مەدەۋ اۋدانى اكىمىنىڭ قوعامدىق قابىلداۋىنا الاتاۋ اۋدانى تۇرعىندارى دا قاتىسىپ قايتتى.

مەدەۋ اۋدانىنىڭ اكىمى ەرجان جىلقىبايەۆ قولاستىندا ىستەيتىن جۇمىسكەرلەرگە كابينەتتە وتىرا بەرمەي، حالىق اراسىنا شىعىپ، كوزبەن كورىپ قايتۋ كەرەكتىگىن ايتتى.

وسى ۋاقىتقا دەيىن 200 مىڭعا جۋىق تۇرعىن اكىمدىككە ءتۇرلى پروبلەمالارىن ايتىپ، شاعىمدانعان. كوبىنە حالىق جول مەن جارىقتاندىرۋ ماسەلەسىنە قاتىستى ايتىپ كەلەدى ەكەن.

«جول جابىندىسىن جوندەۋ ءوتىنىشى قالالىق جولاۋششىلار كولىگى جانە اۆتوموبيل جولدارى باسقارماسىنا جىبەرىلدى. بۇل ماسەلە 2018 جىلى ءوز شەشىمىن تابادى. مەدەۋ اۋدانىندا 120 اۋلا جابدىقتالدى، وعان 1،8 ميلليارد تەڭگە قارجى جۇمسالدى. الاتاۋ شاعىن اۋدانىندا 7 اۋلا قالىپقا كەلتىرىلدى. ءالى مۇندا جاڭا سپورتتىق الاڭدار سالىنادى»، - دەدى ەرجان جىلقىبايەۆ.

ايتا كەتەر بولساق، مەدەۋ اۋدانىنىڭ اكىمى كوشپەلى جيىندى بەسىنشى رەت وتكىزدى. كوشپەلى جيىن وتكىزىلگەننەن بەرى مىڭعا جۋىق ازامات شاعىمدانىپ ۇلگەرگەن. ساۋالداردىڭ 90 پايىزى شەشىمىن تاپتى.

بۇگىنگى كۇنگە دەيىن بۇل شارا «كوك بازار» جانىندا 2 رەت جانە شۋحوۆ كوشەسى بويىنداعى №2 قالالىق ەمحانا، الماتى قالاسىنىڭ وقۋشىلار سارايى جانىندا جانە «دۋمان» ىقشام اۋدانىندا ۇيىمداستىرىلىپ ناتيجەسىندە 700-گە جۋىق تۇرعىن قابىلداندى. كوتەرىلگەن سۇراقتاردىڭ 80% استامى كوممۋنالدىق تۇرعىن ءۇي شارۋاشىلىعى، 20% الەۋمەتتىك ماسەلەلەرگە بايلانىستى. ولاردىڭ 65% ءتۇسىندىرىلىپ، 35 % وڭ شەشىمىن تاپتى.

جيىن بارىسىندا قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىن جۇزەگە اسىرۋ اياسىندا ءبىرقاتار ماسەلەلەر تالقىلاندى.