نۇرسۇلتان نازاربايەۆ - ادامزات تاريحىنداعى حالقىنا قيىن-قىستاۋ ساتتە جول كورسەتەتىن بىرەگەي كوشباسشى. وسىنداي ويىمەن الماتىدا ءوتىپ جاتقان «ن. نازاربايەۆ: ءداۋىر، كوشباسشى، قوعام» عىلىمي پراكتيكالىق كونفەرەنسياسى بارىسىندا ۇلىقبەك اتىنداعى تاشكەنت مەملەكەتتىك ۋنيۆەرسيتەتىنىڭ فيلوسوفيا فاكۋلتەتىنىڭ دەكانى، پروفەسسور نيگينا شەرمۇحامەدوۆا ءبولىستى.
«ادامزات تاريحىندا شەشۋشى ءسات تۋعان كەزدە حالقىنا جول باستاي بىلەتىن كوشباسشىلار شىعادى. حح عاسىردىڭ قيىن قىستاۋ ساتتەرىندە نۇرسۇلتان نازاربايەۆ ءوز حالقىنا وسىنداي كوشباسشى بولا ءبىلدى. بۇگىندە نۇرسۇلتان نازاربايەۆ باستاعان ەل تەك قانا تاۋەلسىز دەربەس مەملەكەت ەمەس، ەكونوميكا، الەۋمەتتىك احۋال، مادەنيەت، ءبىلىم بەرۋ بويىنشا وزگەلەرگە ۇلگى بولاتىن ەلگە اينالدى. سانانى جاڭعىرتۋ ەل دامۋىنا تىڭ سەرپىن بولارى ءسوزسىز. ويتكەنى، ەكونوميكاسىن دامىتىپ، رۋحاني دامۋىنا ءمان بەرمەگەن ەلدىڭ جاعدايى قانداي بولاتىنى تاريحتان بەلگىلى. ونداي ەلدەردە رۋحاني داعدارىس باستالادى. مۇندا باستى باسىمدىق ادامداردىڭ ينتەللەكتۋالدىق ءبىلىمىن ارتتىرۋعا بەرىلگەن. بۇگىنگى كونفەرەنسيادا 25 جىلدا قانداي جەتىستىككە جەتۋگە بولاتىنى جايلى ايتىلدى. تاريحتى تۇلعالار جاسايدى. ونداي تۇلعالاردىڭ ءبىرى نۇرسۇلتان نازاربايەۆتىڭ قىزمەتى مەن كوشباسشىلىعى ورتا ازيا ەلدەرى عانا ەمەس بارلىق الەمدەگى ەلدەرگە ۇلگى بولىپ وتىر»، - دەدى نيگينا شەرمۇحامەدوۆا.
ايتا كەتۋ كەرەك، كەشە مەملەكەتتىك ورتالىق مۋزەيدە ق ر تۇڭعىش پرەزيدەنتى كىتاپحاناسىنىڭ كوشپەلى جوباسى، كورمە اشىلعان بولاتىن. بۇگىن مەملەكەت باسشىسىنىڭ كوشباسشىلىق فەنومەنىن، مەملەكەت قالىپتاستىرۋداعى ەرەن ەڭبەگىن تالقىلاۋ بويىنشا عىلىمي كونفەرەنسيا ءوتىپ جاتىر.
مۋزەيگە ادامدار ءالى دە كەلىپ جاتىر.
كەلۋشىلەر نازارىنا كىتاپحانانىڭ ارحيۆ، كىتاپ، مۋزەي قورىنىڭ سيرەك جادىگەرلەرى، ەلباسىنىڭ جوعارى مەملەكەتتىك ماراپاتتارى، قۇراندار كوللەكسياسى، وزگە مەملەكەت باسشىلارىنىڭ قولتاڭباسىمەن كىتاپتار، ن.نازاربايەۆتىڭ شەت تىلىندەگى كىتاپتارى قويىلدى.
استاناداعى ەلباسى مۋزەيىنەن 800 ءتۇپنۇسقا قولجازبا، سۋرەت، جەكە زاتتارى اكەلىندى.
كوشپەلى كورمە الماتىدا 2 ايداي تۇرادى. كەيىن كورمە قاراعاندى مەن شىمكەنت قالالارىنا كەتەدى.
