الماتىدا ەلباسى كىتاپحاناسىنىڭ «ن. نازاربايەۆ: ءداۋىر، كوشباسشى، قوعام» عىلىمي اعارتۋشىلىق جوباسى عىلىمي پراكتيكالىق كونفەرەنسيامەن جالعاستى.

القالى جيىنعا مەملەكەت قايراتكەرلەرى، تاريحشى عالىمدار، الىس جاقىن شەتەلدەن ساراپشىلار، ساياساتتانۋشىلار قاتىستى.

ق ر بعم عك ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى، پروفەسسور زيابەك قابىلدينوۆ مەملەكەت باسشىسى نۇرسۇلتان نازاربايەۆتىڭ تۇراقتى قوعام قالىپتاستىرۋدا اتقارعان ەڭبەگىن بىرنەشە پۋنكتكە ءبولىپ ايتىپ ءوتتى.

«مەملەكەت باسشىسى نۇرسۇلتان نازاربايەۆ بەيبىتشىلىك پەن كەلىسىم ورناعان تۇراقتى قوعامدى قالىپتاستىرۋ ءۇشىن نە ىستەدى؟ بىرىنشىدەن، ەلباسى اتا زاڭىمىزدا بەيبىتشىلىك پەن كەلىسىمدى بارىنەن جوعارى قويۋ كەرەكتىگىن باسا ايتتى. بارلىق سوزىندە قازاقستاندا ىلكى زاماننان بەيبىت ەل بولعانىن ايتىپ كەلەدى. ول قازاق حالقىن وزگە ۇلت وكىلدەرىنىڭ ءومىرى ءۇشىن جاۋاپكەرشىلىگىن بەگىلەدى. پرەزيدەنت ۇلتارالىق قاقتىعىستارعا اكەلەتىن سەپاراتيستىك پيعىل ءۇشىن جازانى اۋىرلاتتى. سىرتتاعى كيكىلجىڭدەرگە قاتىسۋعا تىيىم سالدى. ەلدە ءتيىمدى ءتىل ساياساتى جاسالدى. 2010 جىلى ەلباسى قازاقستان حالقىنىڭ بىرلىگى تۋرالى بىرەگەي دوكترينا جاسادى.  ۇنەمى ەتنو-مادەني بىرلەستىكتەرگە قولداۋ كورسەتىپ كەلەدى. پرەزيدەنت قازاق حالقىنىڭ قوناقجايلىلىعى، مەنتاليتەتىن، دارحاندىعىن الەمگە پاش ەتتى. ەگەر وزگە ەلدە پوليەتنيكالىق قۇرام وترالىق ساياسات نەگىزىندە قالىپتاسسا، بىزدە وزگە ۇلتتاردى دەپورتاسيالاۋ ناتيجەسىندە قالىپتاستى. بۇل دا باسا ەسكەرەتىن جايت. 1992 جىلدان باستاپ قازاقستانعا ەلباسىنىڭ باستاماسىمەن 1 ملن اسا قانداسىمىز قايتا ورالدى. سونىڭ ارقاسىندا ەلىمىزدە بەيبىتشىلىك پەن تىنىشتىق ورنادى»، - دەدى زيابەك قابىلدينوۆ.

قازاقستان رەسپۋبليكاسى تۇڭعىش پرەزيدەنتى كىتاپحاناسى ديرەكتورىنىڭ ورىنباسارى قايىپوۆا بوتاگوز بۇگىنگى شارانىڭ ماڭىزدىلىعى تۋرالى ايتىپ ءوتتى.

«ەلباسى كىتاپحاناسىنىڭ كۇندەلىكتى كاسىبي قىزمەتىندە ماڭىزدى وقيعا باستالدى. بۇگىن  تاۋەلسىزدىكتىڭ التىن بەسىگى - الماتى كوشپەلى جوباسى اياسىندا عىلىمي كونفەرەنسيا باستالدى. مۇندا الىس جاقىن شەتەلدەن كەلگەن عالىمدار مەن ساراپشىلار ەلباسىنىڭ كوشباسشىلىق فەنومەنىن، 25 جىلدان استام تاريح ىشىندە تاۋەلسىزدىكتىڭ،  مەملەكەتتىلىكتى قالىپتاستىرۋداعى ەڭبەگى مەن ءرولىن تالقىلاپ جاتىر. بۇگىنگى كونفەرەنسيا بارىسىندا شەتەلدىك قوناقتاردىڭ ءبىرى ەلباسىنىڭ ايقىن دارا ساياساتىن، ءبىرى - ادامي قىرىن، حالىقارالىق ساحناداعى ەڭبەگىن، وتاندىق عالىمدار  ۇلتارالىق ەتنوسارالىق قاتىناستى دامىتۋداعى ەڭبەگىن ايتىپ جاتىر»، - دەدى بوتاگوز قايىپوۆا.

ونىڭ ايتۋىنشا، كونفەرەنسيا جۇمىسى بارىسىندا وقىلعان زەرتتەپ، زەردەلەنگەن ماتەريالدار تۇگەل باسىلىم بولىپ شىعادى.

ايتا كەتۋ كەرەك، كەشە مەملەكەتتىك ورتالىق مۋزەيدە ق ر تۇڭعىش پرەزيدەنتى كىتاپحاناسىنىڭ كوشپەلى جوباسى، كورمە اشىلعان بولاتىن. مۋزەيگە كەلۋشىلەردەن اياعى باسىلار ەمەس.

كەلۋشىلەر نازارىنا كىتاپحانانىڭ ارحيۆ، كىتاپ، مۋزەي قورىنىڭ سيرەك جادىگەرلەرى، ەلباسىنىڭ جوعارى مەملەكەتتىك ماراپاتتارى، قۇراندار كوللەكسياسى، وزگە مەملەكەت باسشىلارىنىڭ قولتاڭباسىمەن كىتاپتار، ن.نازاربايەۆتىڭ شەت تىلىندەگى كىتاپتارى قويىلدى.

استاناداعى ەلباسى مۋزەيىنەن 800 ءتۇپنۇسقا قولجازبا، سۋرەت، جەكە زاتتارى اكەلىندى.

كوشپەلى كورمە الماتىدا 2 ايداي تۇرادى. كەيىن كورمە قاراعاندى مەن شىمكەنت قالالارىنا كەتەدى.