شىمكەنت قالاسىندا  14-16 قاراشا ارالىعىندا «Ontustik Tourism. Invest 2017» اتتى حالىقارالىق تۋريستىك-ينۆەستيسيالىق فورۋم وتەدى. ءىس-شارا «قازاقستان اۋماعىنداعى ۇلى جىبەك جولى بويىنشا ساياحات» فەستيۆالى شەڭبەرىندە ۇيىمداستىرىلىپ وتىر، دەپ حابارلايدى Qamshy.kz اقپارات اگەنتتىگى. 

بۇل تۋرالى وقو وڭىرلىك كوممۋنيكاسيالار قىزمەتىندە وتكەن بريفينگتە وبلىستىق كاسىپكەرلىك، يندۋستريالدى-يننوۆاسيالىق دامۋ جانە تۋريزم باسقارماسىنىڭ باسشىسى باتىرحان قۇرمانسەيىت مالىمدەدى.

باسقارما باسشىسىنىڭ ايتۋىنشا، اتالعان فەستيۆال الماتى قالاسىندا باستاۋ الىپ، جامبىل وبلىسىندا جالعاسىن تاۋىپ وتىر. ودان كەيىن وڭتۇستىك قازاقستان وبلىسىندا اياقتالاتىن بولادى.

سونىمەن قاتار، باتىرحان قۇرمانسەيىت  فورۋمنىڭ نەگىزگى ماقساتىمەن دە تانىستىرىپ ءوتتى. ەلىمىزدەگى تۋريستىك سالانى دامىتۋ مەن وڭتۇستىك قازاقستان وبلىسىنىڭ ينۆەستيسيالىق مۇمكىندىكتەرىن تانىستىرۋ، ينۆەستيسيا تارتۋعا قولايلى جاعداي جاساۋ ەكەنىن تىلگە تيەك ەتتى.

شاراعا 300-گە جۋىق ادام قاتىساتىنىن دا اتاپ ءوتتى. ولاردىڭ ىشىندە  قىتايدىڭ تۋريزم بويىنشا ۆيسە-مينيسترى، قازاقستاننىڭ مادەنيەت جانە سپورت ۆيسە-مينيسترى، تۋريزم يندۋسترياسى كوميتەتىنىڭ ءتورايىمى، «Kazakh tourism» ۇلتتىق كومپانياسىنىڭ ءتوراعاسى، «اتامەكەن» ۇكپ وكىلدەرى، سونىمەن قاتار، الىس جانە جاقىن شەت مەملەكەتتەردىڭ تۋريزم سالاسىنىڭ كاسىبي ماماندارى، تۋريستىك ۇيىمدار، ينۆەستيسيالىق كومپانيا وكىلدەرى بولادى. 

ايتا كەتەتىنى، فورۋمعا قىتايدىڭ تۋريستىك ۇيىمدارى  قىزىعۋشىلىق تانىتىپ وتىر. جالپى وڭتۇستىك قازاقستان وبلىسىنا بيىلعى 6 ايدىڭ قورىتىندىسى بويىنشا 128 مىڭ تۋريست كەلگەن. بۇل كورسەتكىش بىلتىرمەن سالىستىرعاندا 55 پايىزعا ارتىپ وتىر.