ورال قالاسىنىڭ ازاماتتىق ىستەر بويىنشا №2 سوتىندا قالا تۇرعىنى اسەت سۇلتاننىڭ №7 ورتا مەكتەپ باسشىلىعىنا قارسى شاعىمى بويىنشا نەگىزگى سوت پروسەسىنە الدىن الا تىڭداۋ ءوتتى. مەكتەپ ديرەكتورى ۆيكتور پروتاسوۆ مەكتەپتىڭ ىشكى جارعىسى مەن ءبىلىم جانە عىلىم ءمينيسترىنىڭ "ءتۇرلى كونفەسسيالاردىڭ ءدىني ەلەمەنتتەرى بار كيىممەن مەكتەپكە كىرگىزبەۋ تۋرالى" بۇيرىعىنا سىلتەمە جاساپ، ءبىرىنشى سىنىپ وقۋشىسىن ساباققا كىرگىزبەي وتىر، دەپ Qamshy.kz اقپارات اگەنتتىگى ازاتتىققا سۇيەنە وتىرىپ جازادى.

ۆيكتور پروتاسوۆ سوتتا وزدەرىنىڭ تالاپتارى "مەكتەپ جارعىسى مەن ىشكى تارتىپكە تولىق ساي كەلەتىنىن" حابارلادى. ول بۇعان قاتىستى ازاتتىققا كوممەنتاريي بەرۋدەن باس تارتتى.

اسەت سۇلتان بۇل شەكتەۋدى زاڭسىز دەپ، سوتتان قىزىن ساباققا كىرگىزۋدى سۇرايدى. ونىڭ سوزىنە قاراعاندا، قىزى مەكتەپ فورماسىنا قوسا قازاقتىڭ ۇلتتىق باس كيىمى - كيمەشەك كيەدى.

شاعىمدانۋشىنىڭ ادۆوكاتى ارمان ءابدىراشيت ىشكى جارعى پۋنكتەرى مەن ءمينيستردىڭ جارعىسى قازاقستان كونستيتۋسياسىنىڭ "مەملەكەتتىك مەكەمەدە تەگىن ورتا ءبىلىم الۋعا كەپىلدىك بەرەتىن" جانە "ورتا ءبىلىم الۋعا مىندەتتەيتىن" 30-بابىنا قايشى كەلەتىنىن ايتادى.

سوتتا ادۆوكات پەن شاعىمدانۋشى سوت پروسەسى ءجۇرىپ جاتقان كەزدە وقۋشىنى ساباققا جىبەرۋدى سۇراپ تالاپ-تىلەك ءبىلدىردى. سۋديا گۇلنار مۇساۋروۆا ول تالاپ-تىلەكتى قابىلداماي تاستادى. سوتقا ءۇشىنشى تاراپ رەتىندە قالالىق ءبىلىم ءبولىمىنىڭ وكىلدەرى دە شاقىرتىلعان. ءبىراق ولار سوتقا كەلمەدى.

بۇل شاعىم بويىنشا نەگىزگى سوت پروسەسى 23 قاراشاعا بەلگىلەندى.

بۇل سوتتا 15 قاراشاعا تاعى ءۇش وقۋشى اتا-اناسىنىڭ قالاداعى №37 ورتا مەكتەپكە قارسى شاعىمى بويىنشا الدىن الا تىڭداۋ بەلگىلەنگەن. مەكتەپ باسشىلىعى ول ءۇش وقۋشىنى دا قازاننىڭ ورتاسىنان بەرى ساباققا كىرگىزبەي وتىر.