باياناۋىل اەرودرومىنا 18 ادامعا ارنالعان «لەت-410» جولاۋشىلار ۇشاعى قوندى، دەپ حابارلايدى Qamshy.kz اقپارات اگەنتتىگى پاۆلودار جاڭالىقتارىنا سىلتەمە جاساپ.

پاۆلوداردان شىققان 16 جولاۋشى باياناۋىلعا جەڭىل اۆياسياعا جاتاتىن ەكى موتورلى 18 ورىندىق ۇشاقپەن ۇشىپ كەلدى. ولاردىڭ ىشىندە پاۆلودار وبلىسىنىڭ اكىمى بۋلات باكاۋوۆ تا بولعان. ۇشاق 40 مينۋتتا جەتتى.

رەيسكە جەرگىلىكتى اۋە باعىتتارىندا ۇشۋ ورىنداۋدا تاجىريبەسى بار «جەزقازعان ەير» كومپانياسى قىزمەت كورسەتكەن. 

«ءبىز پاۆلودار - باياناۋىل باعىتى بويىنشا ءبىرىنشى رەت ۇشىپ وتىرمىز. ۇشۋ ءساتتى اياقتالدى. باياناۋىل اەرودرومى قوناقتاردى كۇتۋگە تولىق دايىن دەپ ويلايمىن»، - دەدى ۇشاق كاپيتانى سەرگەي تەرەحوۆ.

ايتا كەتسەك، باياناۋىل اەرودرومى وتكەن عاسىردىڭ سەكسەنىنشى جىلدارىنىڭ سوڭى مەن توقسانىنشى جىلداردىڭ باسىندا جابىلعان. اەرودرومدى قايتا قالپىنا كەلتىرۋدى پاۆلودار وبلىسىنىڭ اكىمى العاشقىلاردىڭ ءبىرى بولىپ ۇسىنعان.