اسىلدىڭ بۇگىنگى كۇنى جەمىستى بولدى. اسىل ناتيجەلى كۇندى كۇيەۋىمەن ادەمى رومانتيكالىق كەشكى اسپەن اياقتايمىن دەپ ويلادى، ءبىراق كەشكە قاتىستى جوسپارىنىڭ  كۇل-تالقانى شىقتى. دانيار ارىپتەستەرىمەن كومپانيانىڭ تەندەردى ۇتىپ العانىن اتاپ ءوتۋ ءۇشىن مەيرامحاناعا بارادى ەكەن. 

اسىل ۇيگە كەلدى. قاپ-قاراڭعى. كۇنى بويى ۇيدە ەشكىم بولماعاننان كەيىن ءۇي قوڭىر سالقىن. تىنىشتىق... اسىل كوڭىل-كۇيىن تۇسىرمەۋى ءۇشىن ءوزىنىڭ سۇيىكتى قۋىرداعىن جاساپ، داستارحاندى جايناتىپ قويدى. كەشكى اسىن ءىشىپ جاتىپ «شىركىن بالالارىم بولسا، ءقازىر شۋلاپ بىرگە تاماقتانۋشى ەدىك. تىنىشتىقتى بالانىڭ سىڭعىرلاعان كۇلكىسى الماستىرۋشى ەدى» دەپ ويلادى.

دانيار مەن اسىلدىڭ وتاۋ قۇرعانىنا بيىل 8 جىل تولادى. وكىنىشكە قاراي، ءالى كۇنگە دەيىن بالالارى جوق. ەكەۋى تالاي اۋرۋحانانىڭ تابالدىرىعىن توزدىردى. دارىگەرلەر ەكەۋىنەن دە ەش كىنارات تاپپادى. ءبىراق ءالى كۇنگە دەيىن اڭساپ جۇرگەن سابيىنە جەتە الماي ءجۇر.

ارىپتەستەرى، دوستارى، تۋىستارى اسىل مەن دانياردى كورە قالسا بالا تۋرالى سۇراپ، جاراسىن تىرنايدى. قانشا ءمان بەرمەيىن دەسە دە «ۋاقىت بولسا ءوتىپ جاتىر، تەزىرەك بالالى بولۋ كەرەك»، «مانساپ قۋىپ جۇرگەندە كەش بولىپ جۇرمەسىن» دەگەن سەكىلدى ەسكەرتۋلەرىن ايتۋدى ۇمىتپايدى. قۇددى ءبىر اسىل مەن دانيار بالانى قالامايتىن سەكىلدى. كەيدى ءىستىڭ ءمان جايىن بىلمەستەن، بىرەۋدىڭ جەكە ومىرىنە، جەكە شارۋاسىنا نەلىكتەن ارالاسادى ەكەن دەپ اشۋلاناتىن كەزدەرى دە بولىپ تۇرادى.

اسىل مەن دانيار ۇيلەنبەي تۇرىپ-اق ۇلكەن وتباسى بولۋدى ارماندادى. كوپ بالامىز بولسا، قارتايعاندا بالالارى مەن نەمەرەلەرى جينالعاندا ۇيگە سياتىنداي ءزاۋلىم ۇيدە تۇرساق دەپ ارماندادى. 

اسىل مەن دانيار قالاعانداي ۇلكەن ءۇيى بار. سونىمەن قاتار، سۇيىكتى جۇمىس تا، ايىرىلماس دوستار دا بار. تەك بالا جوق. 

كۇتپەگەن جاعداي

اسىل جۇمىسىنداعى ايدانانىڭ جۇكتى ەكەنىن بىلەدى. ايدانا اسىلدان جاساندى تۇسىك جاساتۋعا اقشا سۇراعان ەدى. اسىل مۇنى قۇدايدىڭ بەلگىسى رەتىندە قابىلدادى. دانيارمەن اقىلداسىپ، ايدانانىڭ بالاسىن اسىراپ الۋعا بەكىنەدى. دانيار دا بىردەن كەلىسەدى. جارىق دۇنيەنى كورمەگەن بالانى ولتىرگەنشە، ونى اسىراپ الىپ، بار مەيىرىمىن، ماحابباتىن بەرگەندى ءجون كوردى. قابىلدانعان شەشىمنەن كەيىن اسىل مەن دانيار بالالى بولعانداي قاتتى قۋاندى. 

اسىل مەن دانيار ايدانانى ۇيگە شاقىرىپ، ءوز ۇسىنىستارىن ايتادى. قوماقتى سومما ۇسىنىپ، بالانى دۇنيەگە اكەلگەنشە ايدانانى مەديسينالىق تەكسەرۋدەن وتكىزۋ، جاتىن ورنى مەن تاماعى جانە ت.ب قاجەتتىنىڭ بارلىعىمەن قامتاماسىز ەتەتىنىن ايتادى. تەك بالانى بوسانعاننان كەيىن بالادان باس تارتاتىنى تۋرالى قاعازعا قول قويسا بولعانى. ايدانا ۇسىنىلعان سوممانى ەستىگەندە قالاي كەلىسە كەتكەنىن بايقاماي دا قالدى. ول قارجىعا ءوزى ارمانداعانداي قالادان پاتەر الا الادى. ونىمەن قوسا اي سايىن ءوزىنىڭ جالاقىسىنان ەكى ەسە كوپ اقشا الىپ وتىرادى. 

اسىل مەن دانيار ايدانامەن زاڭدى تۇردە كەلىسىم شارتقا وتىردى. ايدانا ولاردىڭ ۇيىنە كوشىپ كەلدى. جەگەنى الدىندا، جەمەگەنى ارتىندا. قاجەتتى دارۋمەن، مەديسينالىق تەكسەرۋ بارلىعى قاراستىرىلعان. ايدانا كەزەكتى تەكسەرۋگە بارعاندا دارىگەر ونىڭ ءبىر ەمەس، ەكى ەمەس، ۇشەمگە جۇكتى ەكەنىن ايتقاندا ايدانا توبەسىنە مۇزداي سۋدى قۇيىپ جىبەرگەندەي كۇي كەشتى.

ايدانا باستاپقى كەزدە اقشادان ايىرىلىپ قالامىن با دەپ قورقىپ اسىل مەن دانيارعا بۇل جاڭالىقتى ايتپادى. ۇشەم ەكەنىن بىلگەندە كەلىسىم شارتتى بۇزىپ، ءوزىن دالاعا قۋىپ شىعادى دەپ ويلادى. ءوزى مۇنداي جاعدايدا قايدا بارىپ، كىمنىڭ ەسىگىن سىعالايمىن، دالادا قالامىن دەپ قورىقتى. ءبىراق اسىل دا، دانيار دا ايدانانىڭ دەنساۋلىعىن ءجىتى باقىلاپ وتىرعاندىقتان ايدانا ۇشەم تۋرالى جاڭالىقتى ۇزاق ۋاقىتقا جاسىرا المادى.

دانيار مەن اسىل ايدانانىڭ ۇشەمگە جۇكتى ەكەنىن بىلگەندە باقىتتان باستارى اينالعانداي بولدى. بىردەن ءۇش بالانىڭ اتا-اناسى اتاناتىنىنا شەكسىز قۋانىشتى ەدى. مۇنداي باقىت ولاردىڭ تۇسىنە دە كىرگەن ەمەس. اسىل مەن دانيار ءۇش بىردەي شاقالاقتىڭ ءومىرىن امان الىپ قالعانىنا دا قۋاندى.

كوپتەن كۇتكەن قۋانىش

9 اي، 9 كۇن ءوتتى. كوپتەن كۇتكەن ۇشەم دۇنيەگە كەلدى. اسىل مەن دانيار شەكەسى تورسىقتاي ەكى ۇل مەن بوتا كوزدى قىزدىڭ اتا-اناسى اتاندى. بۇل اسىل مەن دانياردىڭ ومىرىندەگى ەڭ باقىتتى كۇندەردىڭ ءبىرى بولدى.

دانيار بۇرىنعىداي ەمەس ەندى ۇيىنە اسىعىپ كەلەتىن بولدى. ەكەۋى ارمانىنا جەتىپ باقىتتى ءومىر ءسۇرىپ جاتتى.

اسىل مەن دانيار امان، ەسەن، تۇرسىندى ۇيىقتاتقاننان كەيىن ءتاتتى قيالعا بەرىلىپ كوز الدارىنا دانياردىڭ امان مەن ەسەنمەن باقتا فۋتبول ويناپ، اسىل تۇرسىنمەن ءدامدى كەشكى اس دايىنداپ جاتقانىن ەلەستەتتى. بارلىعى قۇددى ءبىر ءتاتتى ءتۇس سەكىلدى. 

ءبىراق مۇنىمەن جاقسى جاڭالىقتار لەگى بىتپەدى. كوپ ۇزاماي اسىل جۇكتى ەكەنىن ءبىلدى. مۇنى اسىل مەن دانيار ۇشەمدى باۋىرىنا باسىپ، اسىراپ العانى ءۇشىن جاسالعان قۇدايدىڭ بەرگەن سىيى دەپ ءتۇسىندى.

عاجايىپ

اسىل مەن دانيار بۇگىن دارىگەرگە تەكسەرىلۋگە بارادى. ەكەۋى قوبالجىپ ءجۇر. اسىل مەن دانيار جۇكتىلىككە، بالاعا قاتىستى كەز كەلگەن نارسەگە اسقان جاۋاپكەرشىلىكپەن قارايدى، اركەز كوبالجيدى. امان، ەسەن، تۇرسىندى كۇتكەندەگى باقىت، قۋانىشتى قايتا باستان وتكەرىپ جاتقانىنا ءدان ريزا.

دارىگەردىڭ بۇگىنگە ايتقان جاڭالىعى اسىل مەن دانياردى ەسەڭگىرەتىپ جىبەردى. اسىل ۇشەمگە جۇكتى ەكەن. وتباسى تاعى ءۇش اداممەن تولىقپاق. اسىل مەن دانيار بۇل قۋانىشتى جاڭالىقتى ەت جاقىندارىمەن بىرگە اتاپ ءوتتى.

اسىل ەكى قىز بەن ءبىر ۇل بالانى دۇنيەگە اكەلدى. ءقازىر اسىل مەن دانيار التى بالانىڭ اتا-اناسى. ەكەۋى ارمانداعانداي كوپ بالالى اتا-انا اتاندى. مۇنى ولار قۇدايدىڭ بەرگەن باعا جەتپەس سىيىنا بالايدى.

اسەم المۇحانبەت