بۇگىن الماتى قالاسى «قازاقستان باسپا ءسوز ورتالىعىندا» «الاشوردا» ۇكىمەتىنىڭ قۇرىلعانىنا 100 جىل تولۋىنا وراي ۇيىمداستىرىلعان «جىلاماسىن سابيلەر» اتتى قايىرىمدىلىق كونسەرتىنىڭ باسپا ءسوز كونفەرەنسياسى ءوتتى، دەپ حابارلايدى Qamshy.kz اقپارات اگەنتتىگى.

«قازاقستان باسپا ءسوز ورتالىعىندا» وتكەن بۇل شاراعا ۇشقىن جامالبەك، اسەت ەسجان سىندى «Ugai production» انشىلەرى مەن Qamshy.kz اقپارات اگەنتتىگىنىڭ جەتەكشىسى ءبىلال قۋانىش قاتىستى.

بۇگىنگى باسپا ءسوز ءماسليحاتىندا اتالمىش كونسەرتكە قانداي ازاماتتار دەمەۋشىلىك جاساۋدا؟ كونسەرتتە ونەر كورسەتەتىن ەسترادا جۇلدىزدارى كىمدەر؟ سىندى سۇراقتارعا جاۋاپ بەرىپ، 4 ميلليون تەڭگە كومەك بەرىلەتىن 100 جەتىم بالا مەن 100 ستۋدەنت قالاي تىزىمدەلگەنى جايىندا ءسوز بولدى.

«الماتى قالاسى اكىمدىگىنىڭ قولداۋىمەن 24 قاراشادا الاتاۋ ءداستۇرلى تەاترىندا «جىلاماسىن سابيلەر» اتتى قايىرىمدىلىق كونسەرتىن وتكىزۋدى جوسپارلاپ وتىرمىز. «جىلاماسىن سابيلەر» اتتى قايىرىمدىلىق كونسەرتىن وتكىزۋدەگى باستى ماقساتىمىز – 100 جەتىم بالا مەن الەۋمەتتىك جاعدايى تومەن 100 ستۋدەنتكە ءارقايسىنا 20 000 تەڭگەدەن جالپى قۇنى 4 ميلليون تەڭگەنى قۇرايتىن قارجىلاي كومەك كورسەتۋ»، - دەيدى Qamshy.kz اقپارات اگەنتتىگىنىڭ جەتەكشىسى ءبىلال قۋانىش.

ونىڭ ايتۋىنشا، بۇل كونسەرت وزگە كونسەرتتەردەن وزگەرەك.

«جىلاماسىن سابيلەر» قايىرىمدىلىق كونسەرتىنىڭ وزگە كونسەرتتەردەن ەرەكشە بولۋىنىڭ سەبەبى نەدە؟ اتالمىش كونسەرتكە بيلەت العان ادام ءوزىنىڭ اقشاسى قاي جەتىم بالاعا بەرىلدى نەمەسە قانداي جاعدايى تومەن ستۋدەنتكە بەرىلدى – سونى بىلە الادى. سونىمەن قاتار، الەۋمەتتىك كومەك العان ستۋدەنتتەر مەن جەتىم بالالار وزدەرىنە كىمنىڭ كومەكتەسكەندىگىن بىلەتىن بولادى»، - دەيدى ءبىلال قۋانىش.

كونفەرەنسيادا ءسوز العان ءانشى ۇشقىن جامالبەك «جىلاماسىن سابيلەر» «Ugai production»-نىڭ العاشقى كونسەرتى ەكەنىن ايتادى.

«Ugai production»-نىڭ تىرناق الدى كونسەرتى قايىرىمدىلىق ماقساتىندا ۇيىمداستىرىلعانىنا قۋانىشتىمىز» - دەيدى ءانشى.

ەستەرىڭىزگە سالا كەتەيىك، «الاشوردا» ۇكىمەتىنىڭ قۇرىلعانىنا 100 جىل تولۋىنا وراي 100 جەتىم بالا مەن 100 مۇقتاج ستۋدەنتكە 4 ميلليون تەڭگە كومەك بەرىلەتىنى حابارلانعان. بۇل قاراجات 24ء-شى قاراشادا وتەتىن «جىلاماسىن سابيلەر» اتتى كونسەرت بيلەتتەرىن ساتۋ ارقىلى جينالماق.

«الاش دەپ مىڭ ءسوز سويلەگەننەن گورى، ءبىر ءىس جاساۋدى ماقسات تۇتتىق. وسى شارا ارقىلى قازاقتىڭ 100 جەتىم بالاسى مەن 100 ستۋدەنتىنە الاش رۋحىن سەزىندىرە الساق ماقساتىمىزدىڭ ورىندالعانى» - دەدى ءبىلال قۋانىش.

ايتا كەتەيىك، «الاشوردانىڭ» 100 جىلدىعىنا وراي جىل باسىنان بەرى 5 ءىس-شارا جوسپارلانعان. 5ء-شى ناۋرىزدا ءاليحان بوكەيحاننىڭ تۋعان كۇنىندە بايتۇرسىن ۇلى مۇراجاي ۇيىندە الاش ارىستارىنىڭ رۋحىنا ارناپ اس بەرىلگەن. ساۋىردە بايتۇرسىن ۇلى ساياباعىنا 100 اعاش وتىرعىزىلدى. 100 جەتىم بالا مەن 100 مۇقتاج ستۋدەنتكە كومەك بەرۋ وسى ءىس-شارالاردىڭ جالعاسى.