ونەرلى وتباسىن قولداۋ باعىتىندا ق ر مادەنيەت جانە سپورت ءمينيسترىنىڭ كوركەمونەرپازدار ۇجىمدارىنا حالىقتىق (ۇلگىلى) اتاقتارىن بەرۋ تۋرالى بۇيرىعى شىققان بولاتىن. وسى بۇيرىققا سايكەس باتىس قازاقستان وبلىسىنىڭ 32 كوركەمونەرپازدار ۇجىمى «حالىقتىق» اتاعىن العان بولاتىن. سولاردىڭ ءبىرى جانە بىرەگەي ورالدىق بيعالييەۆتار وتباسىلىق ءانسامبلى ەدى.

اتالمىش وتباسى  وتكەن جىلى «مەرەيلى وتباسى - 2016» بايقاۋىندا وبلىستاپ توپ جارىپ، ونەرىمەن،ونەگەسىمەن ءبىرىنشى ورىن العان ەدى. «ءانسامبلدى وسىدان وتىز جىلداي ۋاقىت بۇرىن اكەم مارات قالي ۇلى ۇيىمداستىرعان بولاتىن،-دەيدى اتالمىش ونەر ۇيىمىنىڭ ءانشىسى ارمان بيعالييەۆ. ارماننىڭ اكەسى مارات پەن زايىبى نۇرجامال دا ونەرى ادامدارى.  مارات  اعا قازتالوۆ اۋدانىنىڭ قوشانكول اۋىلىندا تۋىپ، سوندا ەڭبەك جولىن باستاپ،  ءۇش ۇل، ءۇش قىز تاربيەلەگەن جان. وتباسىلىق ءانسامبلدىڭ قۇرىلعانىنا بيىل وتىز جىلدان اسقان. ۇل-قىزدارى نەگىزىنەن ءار ءتۇرلى سالادا قىزمەت ەتسە دە، اتا-اناسى باۋلىعان ونەر جولىنان الىس كەتپەدى. انسامبل ەلىمىزدىڭ قالالارىندا عانا ەمەس، رەسەيدەگى ساراتوۆ وبلىسىنىڭ نوۆوۋزەنسك، ەنگەلس اۋداندارىندا جەكە كونسەرتتەرىن ءجيى وتكىزىپ تۇرادى.

 بيعالييەۆتەر وتباسى ءار كۇن سايىن باس قوسىپ، الداعى بايقاۋعا دايىندىقتارىن پىسىقتايدى ەكەن. ءوز وڭىرىندە 26 وتباسىنىڭ اراسىنان ۇزدىك شىققان بولاتىن.

 - ءبىرىنشى ورىن الۋ بۇل جەڭىلدىكپەن كەلگەن جوق. ءبىز 30 جىل بويى جانۇيالىق انسامبل قۇرىپ، سودان بەرى قاراي مىنە ەڭبەكپەن ساحنا تورىندە جانۇيامىزبەن ءان شىرقاپ كەلەمىز. «وتان – وتباسىنان باستالادى دەيدى. قانداي ۇلكەن بولسىن، ول شاعىن مەملەكەت – وتباسىنان باستالادى.  شاعىن مەملەكەتتىڭ ىرگەتاسى مىقتى بولسا،  ءبىزدىڭ ەلىمىزدىڭ دە ىرگەتاسى مىقتى بولادى. شاڭىراقتىڭ ۋىعى، كەرەگەسى مىقتى بولسا كەز كەلگەن قيىندىقتى جەڭىپ شىعادى، -دەيدى وتاعاسى  مارات بيعالييەۆ.

ال ۇلى  ارمان بيعالييەۆ تە  شاڭىراقتاعى ونەر دە، ۇلگى-ونەگە دە انا سۇتىمەن، اتا تاربيەسىمەن دارىعاندىعىن ايتادى.

-ول كەزدە اكەم، انام، ۇشەۋمىز بولدىق. سوڭىنان ەكى ءىنىم مەن ءۇش قارىنداسىم قوسىلدى. بۇگىندە بالالارىمىز تارتىلىپ، قازىرگى ۋاقىتتا ءانسامبلدىڭ  قۇرامىندا ون بەس شاقتى جان ونەر كورسەتۋدە. ءبىز قۇرىلعاننان باستاپ ءتۇرلى مادەني شارالارعا قاتىسىپ، ءوز اۋىلىمىزعا، كورشى اۋىلدارعا، اۋدان ورتالىعىنا، ءتىپتى رەسەيدەگى قانداستارىمىز قونىستان اۋىل-ايماقتارعا بارىپ تەگىن كونسەرتتەر قويدىق. ءسويتىپ ەل تاۋەلسىزدىگىنىڭ ەلەڭ-الاڭ شاعىنداعى قيىندىق كەزدە حالىقتىڭ رۋحىن ونەرمەن كوتەرۋگە اتسالىستىق،- دەيدى كەيىپكەرىمىز.

وتكەن جىلى ولار قوشانكولدەگى «بىرلىگى جاراسقان وتباسى» دەپ تانىلدى. ەندى بۇل باعىتتاعى اۋداندىق، وبلىستىق سايىستارعا قاتىسىپ تۇرادى. ونەگەلى جانۇيا مۇشەلەرى ءبىر-بىرىن دەمەپ، بويىنداعى تالانتىن، قارىم-قابىلەتىن ۇشتاپ، ىنتىماق، تاتۋلىقپەن زور جەتىستىكتەرگە جەتۋى – تىنىمسىز ەڭبەكتىڭ ارقاسى. مۇنداي ونەرلى وتباسى – ەل ىرىسى، قوعامعا ۇلگى. بيعالييەۆتەر اۋلەتىندە وتاعاسى مارات وتباسىنىڭ اسقار تاۋ تىرەگى بولسا، وتاناسى نۇرجامال – جانۇيا شۋاعى، «كۇمىس القا» يەگەرى. 

بيعالييەۆتار وتباسىلىق ءانسامبلىنىڭ رەپەرتۋارىندا حالىقتىق جانە ءتۇرلى ۇلت وكىلدەرىنىڭ اندەرى مول. سونداي-اق جەرگىلىكتى سازگەرلەردىڭ دە شىعارمالارىن ورىندايدى. ولاردىڭ اراسىندا وسى  ءانسامبلدىڭ مۇشەسى، جاس سازگەر اينۇر بيعالييەۆا جازعان اندەر دە بار. ايتا كەتەيىك،  اينۇر مارات قىزى وسىدان ءۇش-تورت جىل بۇرىن «مەنىڭ ارمانىمداعى قالا» اتتى وبلىستىق جاس سازگەرلەر بايقاۋىندا 1-ورىن العان بولاتىن. نەگىزىنەن ول تۋعان جەرگە ارنالعان شىعارمالارعا اندەر جازادى.

حالىقتىق اتاعىن الىپ، قاناتتانعان بيعالييەۆتەر وتباسىلىق ءانسامبلى الداعى ۋاقىتتا دا جەرلەستەرىن ونەرلەرىمەن سۋسىنداتىپ، اۋىل مادەنيەتىن كوركەيتۋگە ءوز ۇلەستەرىن قوسا بەرمەكشى.

گۇلىم اقاپ،

باتىس قازاقستان وبلىسى