ورال قالاسىنداعى جۇبان مولداعالييەۆ اتىنداعى وبلىستىق عىلىمي-امبەباپ كىتاپحاناسىندا «كىتاپ وقيتىن وتباسى - عاسىر ۇلگىسى» اتتى مەرەكەلىك كەش ۇيىمداستىرىلدى. كىتاپحانا قىزمەتكەرلەرىنىڭ ۇيىمداستىرۋىمەن وتكەن بۇل كەشكە بايمۇراتوۆتار، ەلەۋسىن، قايريدەن، قاۋىنبايەۆتار، ليتۆينچۋكتەردىڭ وتباسى قاتىستى.
كىتاپحاناعا ۇنەمى جانۇياسىمەن كەلىپ، كىتاپ وقيتىن اتالمىش وتباسىنىڭ بالالارى بۇل شارادا ءان ايتىپ، ولەڭ وقىپ، قويىلىم كورسەتىپ ءوز ونەرلەرىن ورتاعا سالسا، ۇلكەندەرى كىتاپحانا قىزمەتكەرلەرىنە اق تىلەكتەرىن جولدادى.
-بۇل جانۇيالار كوپكە ۇلگى، قانداي قۇرمەتكە دە لايىق. بالالاردى كىتاپ وقۋعا باۋلۋ، ادەبي شىعارمالارعا قىزىقتىرۋ — انا-انانىڭ نەگىزگى مىندەتءى. ويتكەنى، كىتاپ ارقىلى بالانى تاربيەلەۋدىڭ ماڭىزى زور. وقۋلىق بالانى كوركەم ويلاۋعا ۇيرەتەدى، سوزدىك قورىن مولايتادى، ويىنىڭ ۇشقىر بولۋى ءۇشىن دە سەپتىگى كوپ. كىتاپ — ول دوس، جۇباتۋشى، باسشى، ءبىزدىڭ تۇسىنىكسىز جانە بەلگىسىز بولىپ قالعان ويىمىز بەن سەزىمىمىزدى قالىپتاستىرۋعا كومەكشى. كىتاپ ءوزىنىڭ مازمۇنىمەن ءنار تاتقىزىپ، رۋحاني قولداۋ بەرەتىن دۇنيە. قازاق بالالار ادەبيەتىنىڭ نەگىزىن قالاۋشىلار مۇزافار الىمبايەۆ، انۋاربەك دۇيسەنبييەۆ، بەردىبەك سوقپاقبايەۆ، قارجاۋباي وماروۆ سىندى قالامگەرلەرىمىزدىڭ كىتاپتارى بالاسى بار ءاربىر ۇيدەن تابىلۋى كەرەك دەپ ويلايمىن. ودان بولەك، بۇگىندە بالالارعا ارناپ سۇبەلى دۇنيەلەر جازىپ جۇرگەن اۆتورلار دا جەتەرلىك. ءاربىر ۇيدە بىرنەشە كىتاپ قورىنان تۇراتىن كىتاپحانا بولعانى دۇرىس. اتا-اناسى كىتاپتى كوپ وقيتىن بالانىڭ دا وقۋعا دەگەن قىزىعۋشىلىعى تەز ويانادى. جالپى كىتاپ وقۋ – ادام ميى ءۇشىن ايرىقشا جاتتىعۋ. ءتۇرلى شىعارمالاردىڭ ىشىنە ويشا ەنۋ — ادامنىڭ ەلەستەتۋ، قيالداۋ مۇمكىندىگىن ارتتىرادى. بۇدان ادامنىڭ فيزيكالىق جانە پسيحيكالىق جاي-كۇيى جاقسارادى، - دەيدى كىتاپحانا قىزمەتكەرلەرى.
ەمەن-جارقىن وتكەن كەزدەسۋ وقىرماندارعا رۋحاني اسەر سىيلادى.
گۇلىم اقاپ،
باتىس قازاقستان وبلىسى
پىكىر قالدىرۋ