استانا كلۋبىنىڭ ءۇشىنشى وتىرىسىندا ەلباسى نۇرسۇلتان نازاربايەۆ قازاقستاننىڭ سيريا كەلىسسوزدەرىنە بەيتاراپ قاتىسۋشى رەتىندەگى كوزقاراسى تۋرالى اۆستريا سىرتقى ىستەر ءمينيسترى بەنيتا فەررەرو-ۆالدنەردىڭ سۇراعىنا جاۋاپ بەردى. بۇل تۋرالى Qamshy.kz اقپارات اگەنتتىگى sputniknews.kz مالىمەتىنە سۇيەنىپ حابارلايدى. 

قازاقستان باسشىسى ءقازىر الەمدى الاڭداتىپ وتىرعان ماڭىزدى ماسەلەلەردىڭ ءبىرى تەرروريزم ەكەنىن اتاپ ءوتتى. 

"ءۇش ماسەلە بار. بۇل – تەرروريزم، يادرولىق قارۋسىزداندىرۋ جانە سولتۇستىك كورەيا ماسەلەسى. بۇل ءۇش ماسەلەنى الەم ەلدەرى، اسىرەسە، اقش، رەسەي، جۇڭگو سەكىلدى ۇلى دەرجاۆالار بىرىكپەي، شەشە المايمىز. ايتالىق، كۇش بىرىكتىرمەسەك،سولتۇستىك كورەيا ماسەلەسىن بەيبىت جولمەن شەشۋ مۇمكىن ەمەس. دەگەنمەن بۇل ءۇش دەرجاۆانىڭ اراسىندا ەكونوميكالىق، ساياسي ماسەلەلەر بويىنشا كەلىسپەۋشىلىك بار. سوندىقتان بۇل ءبىزدى الاڭداتادى. سيريا ءبىزدىڭ ءوڭىر، بىزدەن الىس ەمەس. جاستاردى الداپ-ارباپ، اقشاعا قىزىقتىرىپ، سوعىسۋعا تارتىپ جاتىر"، — دەدى ن.نازاربايەۆ.

پرەزيدەنت سونىمەن قاتار استانادا سيريا كەلىسسوزدەرىنىڭ جەتى كەزەڭى وتكەنىن ەسكە سالىپ ءوتتى.   

"مۇندا سوعىسىپ جۇرگەن جاساقتاردىڭ كومانديرلەرى بولدى. قۇرامى وتە كۇردەلى، پىكىرلەر ءار ءتۇرلى، كەلىسسوزدەر قيىن ءوتتى. ءبىز ۇلى جەتىستىكتەرگە جەتەمىز دەپ دولبار جاساۋعا بولمايدى، الايدا العا جىلجىپ جاتقانىمىز ءسوزسىز. سوندىقتان ءبىز دايش-پەن كۇرەستە الەمگە پايدالى ءىس جاساپ جاتىرمىز دەپ ەسەپتەيمىن. اقش-تىڭ باسشىلىعىنداعى كواليسيا رەسەي، تۇركيا جانە يرانمەن بىرلەسە جۇمىس ىستەپ، ناتيجەگە قول جەتكىزىپ وتىر. ءبىز بۇل ۇيىمدى جەڭۋدىڭ از-اق الدىندا تۇرمىز. الايدا ودان ءارى نە بولاتىنىن ويلاۋ كەرەك"، — دەپ تۇيىندەدى نازاربايەۆ.