الماتى وبلىسىنداعى قاپشاعاي قالاسىنىڭ سوتى قازاقستان جۋرناليستەر وداعىنىڭ ءتوراعاسى، "قارجى جىمقىردى" جانە سالىقتان جالتاردى" دەگەن ايىپپەن سوتتالعان سەيىتقازى ماتايەۆتىڭ ءوزىن شارتتى تۇردە مەرزىمىنەن بۇرىن بوساتۋ تۋرالى شاعىمىن قارادى. سوت سەيىتقازى ماتايەۆتى مەرزىمىنەن بۇرىن شارتتى تۇردە بوساتۋ تۋرالى شەشىم شىعاردى. پروكۋروردىڭ قارسىلىعى بولماسا ماتايەۆ 15 كۇندە بوساتىلادى.
سۋديا سەيىتقازى ماتايەۆتىڭ ادۆوكاتى مادينا باكييەۆانىڭ، ماتايەۆ جازاسىن وتەپ جاتقان كولونيا وكىلىنىڭ ۋاجدەرىن تىڭدادى. سوتقا سەيىتقازى ماتايەۆتىڭ ءوزىن اكەلمەدى. ول سوتقا تۇرمەدەن ۆيدەو بايلانىس ارقىلى قاتىستىرىلدى. بۇل تۋرالى Qamshy.kz اقپارات اگەنتتىگى ازاتتىققا سىلتەمە بەرىپ جازادى.
سوتتا لا 155/4 كولونياسىنىڭ وكىلى سەيىتقازى ماتايەۆتىڭ تۇرمەدەگى ءتارتىبى "جاقسى بولعانىن"، "ۇلگىلى مىنەز-قۇلقى ءۇشىن ىنتالاندىرۋعا يە بولعانىن" ايتىپ، سوتتالۋشىنى مەرزىمىنەن بۇرىن بوساتۋدى قولدايتىنىن مالىمدەدى.
مادينا باكييەۆا سەيىتقازى ماتايەۆتىڭ قازان ايىندا 63 جاسقا، ياعني زەينەت جاسىنا تولعانىن ايتىپ، زاڭ بويىنشا زەينەتكەرلەر جازا مەرزىمىنىڭ ۇشتەن ءبىرىن وتەگەن جاعدايدا شارتتى تۇردە مەرزىمىنەن بۇرىن بوساتۋعا بولاتىنىن ايتتى.
سوتتا ۆيدەو بايلانىس ارقىلى جاۋاپ بەرگەن كولونيا دارىگەرلەرى ماتايەۆتىڭ قان قىسىمى كوتەرىلىپ كەتەتىنىن، تۇرمەنىڭ سانيتارلىق بولىمىندە ءتيىستى ەم-دوم الا المايتىنىن ايتىپ، ونى شارتتى تۇردە مەرزىمىنەن بۇرىن بوساتۋدى قولدادى.
بۇدان سوڭ ءسوز العان پروكۋرور سەيىتقازى ماتايەۆ سوت ۇكىمى بويىنشا مەملەكەتكە كەلتىرىلدى دەگەن 200 ميلليون تەڭگە قارجىلىق زالالدى وتەمەگەنىن ايتىپ، ونى بوساتۋعا قارسىلىق ءبىلدىردى. سوت كەڭەسۋگە شىعىپ كەتىپ، ءبىراز ۋاقىتتان سوڭ سوت شەشىمى بۇگىن كەشكى ساعات 17-دە شىعاتىنىن ايتقان.
ماتايەۆتىڭ شاعىمى بويىنشا سوتتان تىكەلەي ترانسلياسيا
2016 جىلى قازاننىڭ 3ء-ى استانانىڭ ەسىل اۋداندىق سوتى ۇلتتىق باسپا ءسوز كلۋبىنىڭ جەتەكشىسى سەيىتقازى ماتايەۆتى "قارجى جىمقىردى" جانە سالىقتان جالتاردى" دەگەن ايىپتارمەن التى جىلعا، ال قازتاگ اگەنتتىگىنىڭ ديرەكتورى اسەت ماتايەۆتى "قارجى جىمقىردى" دەگەن ايىپپەن بەس جىلعا سوتتاعان. ۇكىم بويىنشا ماتايەۆتار اقپارات جانە كوممۋنيكاسيا مينيسترلىگىنە - 169 ميلليون تەڭگە، "قازاقتەلەكوم" كومپانياسىنا 140 ميلليون تەڭگە قايتارۋى ءتيىس بولعان. ماتايەۆتار وزدەرىنە تاعىلعان ايىپتى مويىندامايدى.
پىكىر قالدىرۋ