جۋىردا ورال قالاسىنداعى دوستىق ۇيىندە «قازىرگى قوعامداعى وتباسى جانە وتباسى قۇندىلىقتارىنىڭ ماڭىزى» تاقىرىبىندا دوڭگەلەك ۇستەل ۇيىمداستىرىلدى.
سوڭعى جىلدارى ەرلى-زايىپتىلاردىڭ اجىراسىپ، وتباسىلاردىڭ بۇزىلۋى جيىلەي ءتۇستى. وسىعان وراي شارا بارىسىندا قىز بالانىڭ تاربيەسى، ەر ادامنىڭ مىندەتتەرى، وتباسى مۇشەلەرىنىڭ ءرولى سەكىلدى تاقىرىپتار اياسىندا باياندامالار وقىلدى.
– بۇگىنگى شارانىڭ مازمۇنى ەرەكشە. وتباسى - قوعامنىڭ بايلىعى. قازاقستا «ۇيلەنۋ – وڭاي، ءۇي بولۋ - قيىن» دەگەن ماتەل بار. ۇلگىلى وتباسى – جاراسىمدى جۇپتان شىعادى. وتباسىنداعى اتا-انانىڭ ءبىر-بىرىن تۇسىنىسپەي اجىراسۋىنان كوبىنە پەرزەنتتەرى مورالدىق زارداپ شەگەدى. وسى ورايدا بۇگىنگى شارانىڭ ماڭىزدىلىعى زور. بۇل باسقوسۋعا تولىق ەمەس وتباسىلار، جالعىزباستى انالار سەكىلدى ارنايى توپ مۇشەلەرى جانە ولارمەن تىكەلەي بايلانىستا قىزمەت ىستەيتىن يۋۆەنالدى پوليسيا ينسپەكتورلارى، پروكۋراتۋرا قىزمەتكەرلەرى، پسيحولوگتار قاتىسىپ وتىر. بارشامىز بىرىگىپ وتباسى جاعدايىنداعى وزەكتى ماسەلەلەردى كوتەرىپ، ولاردىڭ شەشىمىن تاۋىپ، الدىن الۋعا تىرىسامىز. ءاربىر شاراعا قاتىسۋشى وتباسى قۇندىلىقتارى جونىندە وي تۇيەدى دەپ سەنەمىن، - دەيدى «اق وتاۋ» وتباسى ورتالىعىنىڭ ءتوراعاسى التىناي ەسقالييەۆا.
قوعامداعى تۇرمىسى تومەن وتباسىلاردا تاربيەلەنىپ جاتقان جەتكىنشەكتەردىڭ جاعدايى ەرەكشە الاڭداتادى. پوليسيا قىزمەتكەرلەرىنىڭ مالىمدەۋىنشە جاعدايى ناشار 74 جانۇيا تىركەۋدە تۇر. ال 118 بالا اتالعان وتباسىلاردا تاربيەلەنۋدە ەكەن. ىشىمدىككە ءۇيىر بولىپ، ەش جەردە جۇمىس جاسامايتىن اتا-انالاردىڭ ماسەلەلەرى ارنايى كوميسسيالارعا ۇسىنىلىپ، اكىمشىلىك جاۋاپكەرشىلىكتەرگە تارتىلۋدا. قۇزىرلى ورگاندار ولاردىڭ قىزمەتكە ورنالاسۋىنا جاردەمدەسكەنىمەن، وڭ ناتيجە بەرمەي وتىرعانىن ايتادى ماماندار.
– سونىمەن قوسا ماس كۇيىندە اناسى بالاسىن ۇرىپ-سوققان جاعدايلار دا كەزدەسكەن بولاتىن. اتا-اناسىنان قورىققان بالانىڭ ۇيىنەن قاشىپ كەتۋ فاكتىسى تىركەلدى. وسىعان وراي ق ر قىلمىستىق كودەكسىنىڭ 142-بابى، 2-تارماعى بويىنشا ءىس قوزعالىپ وتىر، - دەيدى ورال ءقىىب يۋۆەنالدىق پوليسيا ءبولىمىنىڭ اعا ينسپەكتورى اقمارال جايلىعۇلوۆا.
گۇلىم اقاپ،
باتىس قازاقستان وبلىسى
پىكىر قالدىرۋ