ورال قالاسىندا باتىس قازاقستان يننوۆاسيالىق-تەحنولوگيالىق ۋنيۆەرسيتەتىنىڭ سپورت بازاسىندا «ينتەرگاز ورتالىق ازيا» اق، «ورال» ماگيسترالدى گاز قۇبىرلارى باسقارماسىنىڭ ۇيىمداستىرۋىمەن «اكەم، انام جانە مەن - ءبىز سپورتتىق وتباسى» اتتى ءىس-شاراسى ءوتتى.

  اتالمىش باسقارما قىزمەتكەرلەرى ەل تاۋەلسىزدىگىنىڭ 25 جىلدىعىنا وراي بىرنەشە شارالارعا بەلسەنە قاتىسىپ كەلەدى. جارىستىڭ اشىلۋ سالتاناتىندا باسقارما باسشىسى ازىمبەك اساروۆ ءسوز سويلەپ قاتىسۋشىلارعا ساتتىلىك تىلەدى.   ايتا كەتسەك، انا مەن بالاعا قامقورلىق جاساۋ، وتباسىن قولداۋ، ۇلتتىق قۇندىلىقتاردى ساقتاۋ ىسىنە مەملەكەتتىك ورگاندار عانا ەمەس، ەلىمىزدەگى ءىرى كومپانيالار، ۇكىمەتتىك ەمەس ۇيىمدار، قوعامدىق ۇيىمدار قاتىسۋىنىڭ ساندىق جانە ساپالىق كورسەتكىشى ارتا تۇسۋدە. ايتالىق، ۇكىمەتتىك ەمەس ۇيىمداردىڭ قاتىسۋىمەن «سالاماتتى وتباسى»، «مۇمكىندىكتەرى شەكتەۋلى ايەلدەردىڭ دەنساۋلىعىن ساقتاۋ»، «تولىق وتباسى»، «انا مەن بالا»، «وتباسىنىڭ قولى­نان ءبارى كەلەدى»، «رەپرودۋكتيۆتىك دەن­ساۋلىقتى ساقتاۋ، وتباسىن جوس­پارلاۋ، جۇكتىلىككە دايىنداۋ جانە حالىقتى، مەديسينا قىزمەتكەرلەرىن وقىتۋ ارقىلى دەنى ساۋ بالا تۋۋ» اتتى الەۋمەتتىك جوبالار ىسكە اسىرىلۋدا. بۇل شارادا سول جوبالاردىڭ جالعاسى بولاتىن.

 اتالمىش شارعا اكەسى، اناسى جانە بالالارىنان  قۇرالعان بەس وتباسى سايىسقا قاتىستى. شەجىن (تاسقالا) لينيالىق وندىرىستىك ۋچاسكەسى، جاڭاقالا لينيالىق ۋچاسكەسى جانە قالالىق مەكەمەلەردەن ءۇش وتباسى قاتىسىپ، ءوز باقتارىن سىنادى. بايقاۋدا ەستافەتالىق ويىندار، اكەلەر اراسىنداعى سايىس، قاپپەن جۇگىرۋ سياقتى جارىس تۇرلەرى كورىنىس تاپتى. وتباسىلىق قۇندىلىقتى بەرىك ۇستانعان وتباسى مۇشەلەرى بارىنشا نامىستى قولدان بەرمەي، جارىس كوركىن قىزدىردى. سايىستىڭ 10 تۇرىنەن ونەر كورسەتكەن وتباسىلاردىڭ اراسىنان تىلەپبەرگەنوۆتەر وتباسى (شەجىن لينيالىق وندىرىستىك ۋچاسكەسى) جەڭىس تۇعىرىنان كورىندى. ەكىنشى جانە ءۇشىنشى ورىنداردى قۇسانوۆتار وتباسى (ورال لينيالىق وندىرىستىك ۋچاسكەسى) مەن ماحامبەتوۆتەر وتباسى (جاڭاقالا لينيالىق وندىرىستىك ۋچاسكەسى) ءوزارا ءبولىستى. بايقاۋدىڭ جەڭىمپازدارى مەن جۇلدەگەرلەرى  ديپلوم، اقشالاي جانە باعالى سىيلىقتارمەن ماراپاتتالدى.

گۇلىم اقاپ،

باتىس قازاقستان وبلىسى