تاۋەلسىزدىك جىلدارىندا وتباسىلىق-دەموگرافيالىق ساياسات مەملەكەت دامۋىنىڭ ستراتەگيالىق باعىتى رەتىندە بەكىتىلىپ، بۇل سالاداعى كەلەلى ماسەلەلەر كەزەڭ-كەزەڭىمەن تۇپكىلىكتى شەشىمىن تابا باستاعان ەدى. شيرەك عاسىردا ەلباسى نۇرسۇلتان ءابىشۇلىنىڭ باسەكەگە قابىلەتتى ۇلت، ءال-اۋقاتى ارتقان وتباسى، ءبىلىمدى ۇرپاق قالىپتاستىرۋعا باعىتتالعان سىندارلى ساياساتى وتباسىلىق ساياساتتى جەتىلدىرۋگە، انا مەن بالانى مەملەكەتتىك قولداۋ بويىنشا باعدارلامالىق قۇجاتتاردىڭ قابىلدانۋىنا، وسى باعىتتا تۇتاستاي جۇيەنىڭ قۇرىلۋىنا جول اشتى. يگىلىكتى ىستەر ناتيجەسىندە ءاربىر بوساعاسى بەرىك وتباسى وتانىمىزدىڭ باياندى بولاشاعىنىڭ بەرىك نەگىزى رەتىندە ورنىقتىرىلدى. جىر سۇلەيى ءسۇيىنباي ارونۇلىنىڭ «ەر جىگىت ەل-جۇرتىنىڭ پاناسىنداي، وسى ورايدا جاقسى ايەل جالپى جۇرتتىڭ اناسىنداي» دەگەن قاناتتى ءسوزىنىڭ جاستار ءۇشىن تاربيەلىك ءمانى زور. ومىرىنەن ۇلگى الاتىن جانى جايساڭ جاندار از ەمەس. سولاردىڭ ءبىرى - تاسقالا اۋدانىنىڭ تۋماسى راۋشان سابىرعالي قىزى بولاتىن.
راۋشان مۋساليموۆا 2011 جىلى «قازاقستاننىڭ ۇزدىك ادامدارى» ەنسيكلوپەدياسىنا ەندى. ق ر پرەزيدەنتىنىڭ قۇرمەت گراموتاسىمەن، «قازاقستان رەسپۋبليكاسىنىڭ تاۋەلسىزدىگىنە - 10 جىل»، «ق ر كونستيتۋسياسىنا - 20 جىل» مەرەكەلىك مەدالدارىمەن ماراپاتتالعان بولاتىن. ەڭبەك جولىن زووتەحنيگ بولىپ باستاعان ول ءوز ىسىنە تياناقتى، جاۋاپكەرشىلىكتى سەزىنەتىن، ۇيىمداستىرۋشىلىق قابىلەتى بار مامان رەتىندە تانىلدى. ول اۋدانداعى اسىل تۇقىمدى مال باعاتىن بولىمشەنى جەتى جىلداي باسقارىپ، شارۋاشىلىقتىڭ ەتتى-جۇندى كروسسبرەد باعىتىنداعى اسىل تۇقىمدى قوي سوۆحوزى اتانۋىنا وزىندىك ۇلەسىن قوستى.
راۋشان - وتە ەڭبەكقور، جۇمىستى جاقسى-جامانعا بولمەيتىن، ءاردايىم باتىل شەشىم قابىلداي الاتىن جان. بويىندا تەك قازاق قىزىنا ءتان قاسيەت كوپ. ياعني ول ۇياڭ، ورىنسىز ءسوز جارىستىرمايدى، ءسوزدى ورنىمەن تاۋىپ ايتادى، ءسالت-داستۇر، ادەت-عۇرىپتى، ماقال-ماتەلدى ءبىر كىسىدەي بىلەدى. ۇنەمى ات ۇستىندە جۇرەتىن ادامعا مۇنداي قاسيەتتەر انا سۇتىمەن، اكە قانىمەن بەرىلەتىنى ايان.
ەلىمىز ەگەمەندىك الىپ، بۇرىنعى باسقارۋ جۇيەسى ىدىراعان وتپەلى كەزەڭدە راۋشانعا جاۋاپتى جۇمىس جۇكتەلدى، ول 2،5 مىڭ حالقى بار اتامەكەن اۋىلدىق وكرۋگىنىڭ اكىمى بولىپ تاعايىندالدى. ول كەزدەگى اۋىل اكىمىنىڭ باستى مىندەتى حالىقتى اۋىزبىرشىلىككە، شىدامدىلىققا شاقىرىپ، ەلدىڭ بولاشاعىنان ءۇمىت كۇتىپ، ەڭبەك ەتۋگە جۇمىلدىرۋ بولاتىن. راۋشان بۇل قىزمەتتى دە ابىرويمەن ورىنداپ، سول اۋىلدىڭ ۇلكەن-كىشىسىنىڭ الدىندا قۇرمەتكە بولەندى. 2003 جىلى اۋداندىق حالىقتى جۇمىسپەن قامتۋ جانە الەۋمەتتىك باعدارلامالار بولىمىنە باسشى بولىپ تاعايىندالدى. بىلە بىلگەنگە بۇل اۋىر ءارى جاۋاپكەرشىلىگى كوپ قىزمەت بولاتىن. ءبىراق ول مويىمادى. ءوزىنىڭ ىزدەنىمپازدىعىمەن، تىڭ ويلارىمەن كوزگە ءتۇستى، 2004 جىلى اۋداندا مۇگەدەكتەر قورى قۇرىلىپ، مۇمكىندىگى شەكتەۋلى جاندار اراسىندا ءتۇرلى ءىس-شارالار ۇيىمداستىرۋدى جۇيەلى جۇرگىزدى. ەگدە ادامدارعا ارنالعان وبلىستىق الەۋمەتتىك ينتەرناتتا جانە وڭىرىمىزدەگى وزگە دە الەۋمەتتىك-مەديسينالىق مەكەمەلەرىندە تاربيەلەنىپ جاتقان تاسقالالىقتارعا بارىپ، ولارمەن ەمەن-جارقىن سويلەسىپ، سىي-سياپات جاساۋ جۇيەگە قويىلدى. قىزمەتىمەن وتباسىنداعى ايەل، انا ەكەنىن ۇمىتپادى. ونىڭ جاقسى قاسيەتتەرىنىڭ ءبىرى - اتقارىلعان ىستەردى ءارقاشان ۇجىمنىڭ، كوپتىڭ ەڭبەگى دەپ وتىرادى. «ۇلىق بولساڭ، كىشى بول» دەگەن وسى.
ءوزىنىڭ ەڭبەكقورلىعىنىڭ ارقاسىندا ءبىرشاما لاۋازىمدى جۇمىستاردى اتقارىپ جۇرگەن ورتاسىندا سىي-قۇرمەتكە بولەنگەن راۋشاننىڭ ءومىر جولى كوپشىلىككە، سونىڭ ىشىندە جاستارعا ۇلگى بولارى ءسوزسىز.
گۇلىم اقاپ،
باتىس قازاقستان وبلىسى
پىكىر قالدىرۋ