قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى 2017 جىلدىڭ 9 ماۋسىمىندا «مەملەكەتتىك ءتىلدى وقىتۋ ءادىسناماسىن جەتىلدىرۋ مەن ستاندارتتاۋدى ىسكە اسىرۋ جولدارى» تاقىرىبىندا رەسپۋبليكالىق ونلاين سەمينار وتكىزەدى.

جامبىل وبلىسى تىلدەردى دامىتۋ باسقارماسىنىڭ مەملەكەتتىك ءتىلدى وقىتۋ ورتالىعىندا وتەتىن سەمينار بارىسىندا ونلاين رەجيمى ارقىلى مەملەكەتتىك ءتىلدى وقىتۋ ءادىسناماسىن جەتىلدىرۋ مەن ستاندارتتاۋ جولدارىن جۇزەگە اسىرۋ قاراستىرىلادى. سونداي-اق وزىق تاجىريبەنى زەردەلەۋ جانە قورىتۋ، وقىتۋدىڭ قازىرگى زامانعى ادىستەرى مەن تەحنولوگيالارىن تاجىريبەگە ەنگىزۋ ماسەلەلەرى ءسوز بولادى.

سەمينارعا ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ قىزمەتكەرلەرى، مەملەكەتتىك ءتىلدى وقىتۋدىڭ وڭىرلىك ورتالىقتارىنىڭ ماماندارى، عىلىمي-ادىستەمەلىك كەڭەس مۇشەلەرى، ايماق عالىمدارى مەن ءتىل ماماندارى، ۇلتتىق تەستىلەۋ ورتالىعى قازتەست جۇيەسىن دامىتۋ باسقارماسىنىڭ ماماندارى قاتىسادى.

سەمينار بارىسىندا ادىسكەر-عالىمدار ونلاين رەجيمى ارقىلى مەملەكەتتىك ءتىلدى وقىتۋدىڭ ءتيىمدى تەحنولوگيالارى مەن ادىس-تاسىلدەرىمەن بولىسەدى. تىلدەردى وقىتۋ ورتالىقتارى مەن رەسپۋبليكاعا بەلگىلى ۇزدىك ادىسكەرلەر شەبەرلىك ساباقتارىن كورسەتەدى.

tilortalyq.kz