جۇما كۇنى اقتوبە قالاسىنىڭ قىلمىستىق ىستەر جونىندەگى سوتىندا بيىلعى 27 مامىردا اقتوبە تۇرمەسىندە (كا-168/1 مەكەمەسى) قاماۋدا وتىرعان 39 جاستاعى بەرىك ءابدىراحمانوۆتىڭ ۇستىنەن قىلمىستىق-اتقارۋ مەكەمەسى اكىمشىلىگىنە باعىنباعان دەگەن ايىپپەن قوزعالعان ءىس بويىنشا سوت پروسەسى باستالدى. بۇل تۋرالى ازاتتىققا تۇتقىننىڭ ايەلى ءارى قوعامدىق قورعاۋشىسى گۇلىم ءابدىراحمانوۆا حابارلادى،- دەپ جازادى Qamshy.kz اقپارات اگەنتتىگى. بۇگىنگى سوت وتىرىسىندا بىرنەشە كۋاگەر – تۇرمە اكىمشىلىگىنىڭ قىزمەتكەرلەرىنەن جاۋاپ الىنعان. سوتتىڭ كەلەسى وتىرىسى 24 قاراشادا وتپەك.

گۇلىم ءابدىراحمانوۆانىڭ ايتۋىنشا، وعان قاماۋداعى كۇيەۋى بەرىك ءابدىراحمانوۆ، اراسىندا وسى سوتتا قورعاۋشى تاراپتىڭ كۋاگەرى رەتىندە كورسەتىلگەن ادامدار دا بار، بىرنەشە تۇتقىننىڭ جازعان "اقتىق حاتىن" تابىس ەتكەن. بۇگىنگى سوت وتىرىسىندا بەرىك ءابدىراحمانوۆ ول ادامدارعا تۇرمە اكىمشىلىگى قىسىم كورسەتۋى مۇمكىن ەكەنىن ايتىپ، سوتتان ولاردىڭ قاۋىپسىزدىگىن قامتاماسىز ەتۋدى سۇرادى دەيدى گۇلىم ءابدىراحمانوۆا.

تۇتقىن بەرىك ءابدىراحمانوۆتى سوتتا قورعاۋ ءۇشىن وسىنىڭ قارساڭىندا گۇلىم ءابدىراحمانوۆا جالداعان ادۆوكات ايبەك قويانوۆتىڭ ايتۋىنشا، ءابدىراحمانوۆقا قىلمىستىق كودەكستىڭ "قىلمىستىق-اتقارۋ مەكەمەسى اكىمشىلىگىنىڭ زاڭدى تالاپتارىنا باعىنباۋ" بابى بويىنشا ايىپ تاعىلعان. بۇعان دەيىن مەملەكەت تاعايىنداعان ادۆوكات سىرقاتتانىپ قالعاندىقتان بۇل پروسەسكە قاتىسپاعان.

تۇتقىن بەرىك ءابدىراحمانوۆتىڭ ءىسى بويىنشا سوت پروەسىنە قازاقستاننىڭ ادام قۇقىقتارى جونىندەگى بيۋروسىنىڭ اقتوبە وبلىستىق فيليالىنىڭ جەتەكشىسى مىندەتىن اتقارۋشى يرينا گولسۆارت باقىلاپ وتىر.

بەرىك ءابدىراحمانوۆتى 2010 جىلى تامىزدىڭ 3ء-ى كۇنى استانانىڭ سارىارقا اۋداندىق سوتى ءدىني ارازدىقتى قوزدىردى، زاڭمەن تىيىم سالىنعان ءدىني ۇيىمعا مۇشە بولدى جانە تەرروريزمدى ناسيحاتتادى دەگەن ايىپتارمەن التى جىلعا سوتتاعان. جازا مەرزىمىن وتەۋ 2009 جىلعى قازاننىڭ 3-ىنەن باستاپ ەسەپتەلگەن.

ءابدىراحمانوۆ تۇرمەدە وتىرعان كەزدە، 2013 جىلعى اقپاننىڭ 13ء-ى كۇنى پاۆلودار قالالىق سوتى ءدىني ارازدىقتى قوزدىردى دەگەن ايىپپەن ونى ءتورت جىلعا سوتتاعان. وتەلگەن جانە وتەلمەگەن مەرزىمدەرىن الىپ-قوسقاندا، ەكىنشى ءىس بويىنشا ۇكىم كەسىلگەن كۇننەن باستاپ ول تۇرمەدە بەس جىل التى اي وتىرۋى ءتيىس بولعان.

تاراز قالاسى سوتىنىڭ 2015 جىلى اقپاننىڭ 3ء-ى شىققان قاۋلىسىنا سايكەس، بەرىك ءابدىراحمانوۆتىڭ ءبىرىنشى ءىسى بويىنشا 2010 جىلعى تامىزدىڭ 3ء-ى كەسىلگەن ۇكىم وزگەرتىلگەن، ياعني تەرروريزمدى ناسيحاتتاۋ ايىبى سوتپەن تىيىم سالىنعان ءدىني ۇيىمعا مۇشە بولدى دەگەن باپقا اۋىستىرىلعان، بۇعان قوسا، جاڭا جازا مەرزىمى – 2012 جىلعى قاراشانىڭ 28-ىنەن باستاپ 2018 جىلعى مامىردىڭ 27-سىنە دەيىن دەپ بەلگىلەنگەن.

بۇعان دەيىن تۋىستارى بەرىك ءابدىراحمانوۆتى "تۇرمەدە ۇرىپ-سوعىپ، ازاپاتاعانى" تۋرالى شاعىمدانعان. تۋىستارى تۇتقىن ۆيدەوكامەرا الدىندا ءدىني كوزقاراسىنان باس تارتۋعا كونبەگەنى ءۇشىن ازاپ شەگىپ جاتىر دەپ سانايدى. ءۇي-ىشى ەكى مارتە تۋبەركۋلەزگە شالدىعىپ، اياعىنداعى قان تامىرلارىندا تۇيىندەر (ۆاريكوز) پايدا بولعان تۇتقىنعا ناۋقاسقا تيەسىلى تاعام دا جەتكىلىكتى بەرىلمەي وتىر دەپ شاعىمدانعان.

تۇرمە اكىمشىلىگى بەرىك ءابدىراحمانوۆقا قىسىم جاسالعانى تۋرالى ايىپتاۋلاردى جوققا شىعارادى جانە تۇتقىن ناۋقاسقا تيەسىلى دارى-دارمەك پەن تاماقتىڭ بارلىعىن الىپ وتىر دەپ مالىمدەيدى. تۇرمە اكىمشىلىگىنىڭ ءسوزىن جوعارى تۇرعان مەكەمەلەر مەن باقىلاۋشى ورگاندار دا راستايدى.

قۇقىققورعاۋشىلار قازىرگى تۇرمەلەردەگى ءتارتىپ پەن 2015 جىلعى قاڭتاردىڭ 1-نەن قولدانىسقا ەنگەن جاڭا قىلمىستىق زاڭناما بيلىككە قىرىنا العان تۇتقىندارعا "قيت ەتكەنى" ءۇشىن جاڭادان ءىس قوزعاپ، تۇرمەدە قانشا ۇستاعىلارى كەلسە، سونشا ۋاقىت ۇستاۋعا مۇمكىندىك بەرەدى دەپ مالىمدەيدى.

ەسكە سالايىق، 39 جاستاعى تۇتقىن بەرىك ءابدىراحمانوۆ «دىني-راديكالدىق» باپتار بويىنشا، ونىڭ ىشىندە ءدىني ارازدىقتى قوزدىرعانى ءۇشىن جانە قازاقستاندا تىيىم سالىنعان «حيزب ۋت-تاحرير» ءدىني ۇيىمىنا مۇشە بولعانى ءۇشىن 2009 جىلى تۇتقىنداپ، التى جىلعا سوتتاعان. ول كەزدە التى ادام سوتتالعان ەدى، ولاردى ءتورت جىلدان جەتى جىلعا دەيىن مەرزىمگە تۇرمەگە كەسكەن. ءبارى جازاسىن وتەپ، بوستاندىققا شىققان. ال بەرىك ءابدىراحمانوۆ تۇرمەدە وتىرعانىنا ءۇش جىل بولعاندا، ياعني 2012 جىلى جاڭا مەرزىم قوسىلعان.