«نۇر وتان» پارتياسىنىڭ «باقىتتى وتباسى – باقىتتى بالالىق شاق» پارتيالىق جوباسى اياسىندا قۇرىلعان باتىس قازاقستان وبلىسىنداعى ساراپشىلار توبى وتباسىلىق ۇلگىدەگى بالالار اۋىلىنا بارىپ، بۇلدىرشىندەردىڭ جاعدايلارىمەن تانىستى.
ورال قالاسىنىڭ زاشاعان كەنتىندە ورنالاسقان بالالار اۋىلىندا ءۇش جارىم جاستان 18 جاسقا دەيىنگى 73 بالا تاربيەلەنۋدە. ونىڭ 16-سى جەتىم بۇلدىرشىندەر بولسا، قالعانى – اتا-انانىڭ قامقورلىعىنان ايىرىلعاندار. ون شاقتى ءزاۋلىم ءۇيدىڭ اربىرەۋىندە 7-8 بالادان تۇرادى. مۇنداعى بالالار جالپى ورتا ءبىلىم بەرەتىن قالالىق №20، №30 جانە №13 مەكتەپتەردە ءبىلىم الۋدا. سونداي-اق وتكەن جىلى بالالار اۋىلىنىڭ 18-23 جاستاعى تۇلەكتەرى ءۇشىن ارنايى جاسوسپىرىمدەر ءۇيى اشىلعان بولاتىن. اتالمىش ۇيدە بالالار ءۇيىنىڭ تۇلەكتەرى نەمەسە ارناۋلى، جوعارعى وقۋ ورنىن ءبىتىرىپ، جۇمىسقا كىرىسكەنشە تۇرا الادى. بۇگىنگى تاڭدا بۇل ۇيدە 11 ءجاسوسپىرىم ورنالاسقان.
- بۇل مەكەمەدە ەكى جىلدان بەرى قىزمەت اتقارىپ كەلەمىن. بالالارعا وتباسىلىق جىلۋ مەن تاربيە بەرىپ، قوعامدا ءوز ىسىنە جاۋاپ بەرە الاتىن تۇلعا رەتىندە قالىپتاستىرۋ ءۇشىن ەڭبەكتەنىپ كەلەمىز. بالالار اۋىلىندا ۇستازدارمەن بىرگە پسيحولوگ، لوگوپەد، دەفەكتولوگ، ديەتولوگ ماماندارى دا قىزمەت ەتەدى. مەملەكەت تاراپىنان بالالاردىڭ كۇندەلىكتى تاماعى مەن ماۋسىمدىق كيىمى قامتاماسىز ەتىلەدى. مۇندا بالالاردىڭ باستى تاربيەسىمەن انا تاربيەشى اينالىسادى. انا تاربيەشى اپتاسىنا ءبىر كۇن عانا دەمالىس الا الادى. تالاپ بويىنشا ولاردىڭ جەكە ءومىرى مازالاماۋى كەرەك جانە ون سەگىز جاسقا دەيىنگى بالالارى بولماۋى قاجەت. تاۋلىك بويى وزىنە سەنىپ تاپسىرىلعان بۇلدىرشىندەردىڭ ىشەر تاماعىن، كيەر كيىمىن قاداعالايدى. انا تاربيەشى دەمالىسقا كەتكەندە ورنىن اپا تاربيەشى الماستىرادى. مۇنداعى بالالاردىڭ بارلىعى دەرلىك ۇيىرمەلەرگە قاتىسادى. كىتاپحانا، اكت زالى، مەديسينالىق كابينەت، شاعىن سپورتتىق جاتتىعۋ بولمەسى، شىعارماشىلىق بولمە، رەلاكساسيالىق بولمە ۇزدىكسىز بالالارعا قىزمەت اتقارىپ تۇرادى. الايدا ءبىر وكىنىشتىسى، بالالار اۋىلىندا سپورتتىق الاڭ جوق. بالالار جازدا سىرتتا جۇگىرىپ جاتتىقسا، قىستا شاڭعى، كونكي تەبەدى. ۆولەيبول، باسكەتبول، فۋتبول سەكىلدى سپورتتىق ويىنداردى ويناۋعا مۇمكىندىك جوق، - دەيدى اتالمىش مەكەمەنىڭ ديرەكتورى ساعىنىش وتەبالييەۆا.
ءزاۋلىم ءۇيدىڭ قاي-قايسىسىنا كىرسەڭ دە، تاپ-تۇيناقتاي جينالعان سورەلەر مەن قىرى شىعىپ تەگىستەلگەن توسەك ورنىنا كۋا بولاسىز. بالالارعا باۋىرساق ءپىسىرىپ جۇرگەن شىنار ەسىمدى انا تاربيەشىنى سوزگە تارتتىق. ول بۇل مەكەمەدە 2003 جىلدان بەرى قىزمەت اتقارادى ەكەن.
ء-قازىر بۇل ۇيدە سەگىز جان تۇرامىز. جۋىردا كىشكەنتاي قىز بالانى جانۇياعا اسىراۋعا الىپ كەتتى. مۇمكىندىگىمشە بالالارىمدى ومىرگە يكەمدەپ شىعارعىم كەلەدى. اسىرەسە، قىزدارىم كىر جۋعاندا، تاماق پىسىرگەندە قاسىمدا كومەكتەسىپ جۇرەدى. سونداي-اق ءىس تىگۋ، قولونەر سەكىلدى ءتۇرلى ۇيىرمەلەرگە قاتىسادى. بالالار ءۇشىن مۇندا بارلىق جاعداي جاسالعان. ولار بەس مەزگىل تاماعىن ىشەدى. وقۋ ءبىتىرىپ كەتكەن تۇلەكتەرىم قازاقستاننىڭ ءار قالاسىندا ءبىلىم الۋدا. ايتا كەتسەك، وتكەن جىلى جالپى ورتا ءبىلىم العان الماس ەسىمدى تۇلەگىم الماتى قالاسىندا وقىپ ءجۇر. قىسقى دەمالىستا كەلىپ كەتتى. وقۋ ءبىتىرىپ كەتكەن تۇلەكتەرىم مۇنداعى بالالارعا حابارلاسىپ، كونكۋرستارعا قاتىسسا، اعالىق، اپكەلىك كومەكتەرىن بەرىپ جاتادى. تۇرمىسقا شىققان قىزدار بىر-بىرىنە قوناققا بارادى. مەنى دە مەيرام كۇندەرى «اناشىم» دەپ حابارلاسىپ، قۇتتىقتاپ جاتادى. بالالارىمنىڭ وقۋ ۇلگەرىمدەرى جاقسى، - دەيدى شىنار سامات قىزى.
سول ساتتە انا تاربيەشىسىمەن بىرگە تاماق دايىنداپ جۇرگەن بويجەتكەن قىزعا كوزىمىز ءتۇستى. اقجارقىن قىزدىڭ ەسىمى گۇلجانەل ەكەن. ەكىنشى سىنىپ وقىپ جۇرگەن كەزىندە اناسى قايتىس بولعان. سودان وسى مەكەمەنى جاعالاعان.
- اكەمە ءبىزدى ءوسىرىپ باعۋ قيىنعا سوقتى. انا تاربيەشىمىز بىزگە كىر جۋۋدى، تاماق ءپىسىرۋدى، كيىم تىگۋدى، ۇتىكتەۋدى، بانكا جابۋدى ۇيرەتتى. ۇلكەن اپكەم الماتى قالاسىندا ماگيستراتۋرادا وقىپ ءجۇر. ال اعام م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىن قىزىل ديپلوممەن بىتىرمەكشى. وقۋ بىتىرگەن سوڭ اپكەم مەنى الماتىعا الىپ كەتەدى. بولاشاقتا ءتىلشى بولعىم كەلەدى، - دەيدى گۇلجانەل.
كەزدەسۋ سوڭىندا وبلىستىق ماسليحاتتىڭ دەپۋتاتى ليانا تۇرسىنوۆا اتالمىش مەكەمەنىڭ ديرەكتورى ساعىنىش جامبىلقىزىنا بالالارعا بەرىلەتىن تاعامداردىڭ بەكىتىلگەن مازىرگە ساي دايىندالۋىن ءجىتى قاداعالاۋدى تاپسىردى.
گۇلىم اقاپ،
باتىس قازاقستان وبلىسى
