شقو ءبىلىم باسقارماسى شەمونايحا اۋدانىنداعى مەكتەپتە سىنىپتىڭ توبەسىندەگى سىلاق قۇلاۋى سالدارىنان جاراقات العان وقۋشىلاردىڭ جاعدايى ءبىرقالىپتى ەكەندىگىن حابارلادى. قازىرگى تاڭدا ولاردىڭ ومىرىنە ءقاۋىپ ءتونىپ تۇرعان جوق دەپ جازادى قازاقپارات. «بالالار تاڭعا دەيىن دارىگەرلەردىڭ باقىلاۋىندا بولادى، ودان سوڭ ولار ۇيلەرىنە جىبەرىلەدى. ال وقۋ باسقا سىنىپقا اۋىستىرىلدى» دەلىنگەن حابارلامادا.

ەسكە سالا كەتەيىك، شەمونايحا اۋدانى ۋست-تالوۆ اۋىلى استافيەۆ اتىنداعى ورتا مەكتەپتە كۇندىز سىنىپتىڭ توبەسىندەگى سىلاق قۇلاپ تۇسكەن. وقيعا سالدارىنان 3-سىنىپتىڭ ءتورت وقۋشىسى زارداپ شەكتى: ەكەۋى - قىز بالا، ەكەۋى - ۇل. ۇشەۋىنىڭ ميىنا زاقىم كەلگەن، بىرەۋىنىڭ قولى سىنعان. وقۋشىلار ورتالىق اۋداندىق اۋرۋحاناعا جاتقىزىلدى. سىلاقتىڭ قالىڭدىعى 10 سم بولعان. كەسەك سىلاقتار قۇلاپ تۇسكەن ساتتەگى سوققىنىڭ كۇشتى بولعاندىعى سونداي، پارتالاردىڭ ءبىرىنىڭ بەتى قاق ءبولىنىپ تۇسكەن.