باقىتتى دا تاتۋ وتباسى – قوعامنىڭ بايلىعى. وسى ورايدا «نۇر وتان» پارتياسى باتىس قازاقستان وبلىستىق فيليالىنىڭ وكىلدەرى «باقىتتى وتباسى – باقىتتى بالالىق شاق» جوباسى اياسىندا الەۋمەتتىك قولداۋدى قاجەتسىنەتىن وتباسىندا تاربيەلەنىپ جاتقان بالالارعا الەۋمەتتىك كومەك كورسەتتى.
بيىل باتىس قازاقستان وبلىسى بويىنشا اتالمىش جوبا اياسىندا كىرىسى از وتباسىندا تاربيەلەنىپ جاتقان بالالاردىڭ جاعدايىن ءبىلۋ ماقساتىندا ارنايى رەيد ۇيىمداستىرىلىپ، مونيتورينگ جۇمىستارى جۇرگىزىلگەن ەدى. رەيد بارىسىندا ورال قالاسىنىڭ وتىز ءبىر جاسار ناتاليا كوجيەۆنيكوۆا ءتورت پەرزەنتىنىڭ كيىم-كەشەكتەن قينالىپ جۇرگەنىن جەتكىزگەن ەدى.بۇل جولى وبلىستىق ءماسليحاتتىڭ دەپۋتاتى ليانا تۇرسىنوۆا ءتورت بالاعا قاجەتتى كۇرتەشەلەر، اياق كيىمدەر سىيلادى. سونداي-اق جۇمىسسىز قالعان ناتالياعا جۇمىس ۇسىنىپ، ورال قالالىق №26 جالپى ءبىلىم بەرەتىن ورتا مەكتەبىندە وقيتىن ەكى بالاسىن تەگىن تاماقپەن قامتاماسىز ەتەتىنىن ايتتى. ءبىر ساتتە كول-كوسىر قۋانىشتىڭ يەسى بولعان جاس انا شەكسىز العىسىن ءبىلدىردى. حالىق قالايلىلارىنىڭ ماڭداي تىرەگەن كەلەسى اسكەري قىزمەتكەرلەردىڭ جانۇياسىندا جەتى پەرزەنت ءوسىپ كەلەدى. اق داستارحانىن جايىپ، قارسى العان كوپ بالالى انا ءمادينا اقىلبايەۆا بۇگىنگى كۇنىنە شۇكىرشىلىك ايتادى.
- جۇبايىم – اسكەري قىزمەتكەر. ءوزىم دە وسى اسكەري سالادا قىزمەت جاسادىم. ازىرگە بالا كۇتىمىمەن ۇيدە وتىرمىن. قىزمەت بابىمەن اقتاۋ قالاسىنان كوشىپ كەلدىك. جەتى بالامنىڭ ۇلكەنى ون بەستە، كىشىسى ءۇش جاستا. قازاقتا «باي بولىپ كورگەن جوقپىن، كەدەي بولىپ ولگەن جوقپىن» دەگەن جاقسى ءتامسىل بار. سول ايتقانداي، بىرەۋدەن ىلگەرى، بىرەۋدەن كەيىن ءومىر سۇرۋدەمىز. بالالى ءۇي قاشان دا بازارلى. بالالارىمنىڭ دەنى ساۋ بولىپ، اۋىرماي ءوسىپ كەتسە، سونىڭ ءوزى بىزگە ۇلكەن دەمەۋ. بۇگىن ءبىزدىڭ جاعدايىمىزدى ءبىلىپ، ءحال سۇراي كەلگەن جاندارعا العىسىم زور،- دەيدى كوپ بالالى انا. رەيد بارىسىندا بۇل وتباسىنىڭ پەرزەنتتەرى دە كيىم-كەشەكپەن قامتاماسىز ەتىلدى.
قازاقتا «قۋانتساڭ بالانى قۋانت» دەگەن ءسوز بار. قامكوڭىل بالالاردىڭ قۋانىشىنا نە جەتسىن؟! مۇنداي باعىتتاعى ساۋابى تيەر شاراپاتتى ءىس اق جايىق وڭىرىندە جالعاسا بەرمەك.
گۇلىم اقاپ،
باتىس قازاقستان وبلىسى
