ءسىز بەن ءبىز بار بۇل قوعامدا قاشاندا قوزعاۋشى كۇش جاستار بولماق. ال، جاستارعا جاعداي جاساۋ، ولارعا ۇنەمى كوڭىل ءبولۋ – كەزەك كۇتتىرمەيتىن ماسەلە. قاي كەزدە دە مەملەكەت جاستارعا بارلىق ماسەلەدە قولداۋ ءبىلدىرىپ، مۇمكىندىكتەر جاساپ كەلۋدە. جاستار ۇيىمدارى مەن قۇرىلىمدارى دا مولىنان. سونىمەن قوسا، زامان اعىمىنا وراي ولارعا مادەني دەمالىس ورىندارىنىڭ دا قاجەت ەكەندىگى بايقالۋدا. وسى جىلدىڭ قىركۇيەك ايىندا الماتىنىڭ الاتاۋ اۋدانىندا "رۋحاني جاڭعىرۋ" باعدارلاماسى اياسىندا جاستارمەن جۇمىس ىستەيتىن Almaty Zhastary ورتالىعى اشىلعان بولاتىن. الماتى قالاسى اكىمدىگى جاستار ساياساتى ماسەلەلەرى جونىندەگى باسقارماسىنىڭ قولداۋىمەن «الەۋمەتتىك ماڭىزى بار جوبالاردى ىسكە اسىرۋ ورتالىعى» قق اياسىندا قۇرىلىپ وتىر. نەگىزىنەن، الماتى قالاسىنىڭ اكىمى باۋىرجان قىدىرعالي ۇلى بايبەك 2017 جىلدى «جاستار جىلى» دەپ جاريالاعان بولاتىن. ول، مەملەكەت باسشىسىنىڭ تاپسىرماسى بويىنشا جاستارعا قولداۋ كورسەتۋ جانە ولاردىڭ ينتەللەكتۋالدى جانە كاسىبي بىلىكتىلىگىن دامىتۋ ماقساتى اياسىندا ەدى.
اتالعان جاستارعا قىزمەت كورسەتۋ ورتالىعى جاستاردىڭ جۇمىسقا ورنالاسۋىنا، كاسىپتىك باعدار الۋعا، جاستار اراسىندا كاسىپكەرلىكتى جانداندىرۋعا باعىتتالعان. ماسەلەن، «دامۋ» كاسىپكەرلىكتى قولداۋ قورى، تۇرعىنۇيقۇرىلىسجيناقبانكى، جۇمىسپەن قامتۋ ورتالىعى، «اتامەكەن» ۇكپ سىندى مەكەمە قىزمەتتەركەرلەرىنەن ارنايى كونسۋلتاسيالار جانە قۇقىقتىق مەن پسيحولوگيالىق كومەك الا الادى.
ورتالىق ماقساتى - الاتاۋ جاستارىن شىعارماشىلىققا، سالاۋاتتى ءومىر سالتىنا، كاسىپكەرلىككە باۋلۋ. وعان قوسا، جاس ۇرپاقتىڭ رۋحاني دامۋى ءۇشىن جاستاردىڭ الەمدىك جانە ۇلتتىق مادەنيەت قۇندىلىقتارىنا، شەت تىلدەرىنە، ونەرگە، ادەبيەتكە، داستۇرلەرگە قاتىسۋىنا جاعداي جاساۋ ءۇشىن كوپتەگەن ءىس-شارالار وتكىزىپ ءجۇر.
اتالمىش ورتالىقتىڭ جەتەكشىسى بەرىك قاليجان ۇلىنىڭ ايتۋىنشا، «ءبىزدىڭ ورتالىق ەڭ باستىسى، جاستاردىڭ بوس ۋاقىتىن ءتيىمدى وتكىزۋگە، ولاردىڭ جان-جاقتى دامۋى ءۇشىن جۇمىس ىستەمەك. ولاردىڭ سۇرانىستارىنا بايلانىستى، ءتۇرلى سالا ماماندارىمەن ترەنينگتەر وتكىزەمىز. سول ارقىلى تولىققاندى، ءبىلىمدى مامان بولىپ قالىپتاسۋىنا جول اشپاقشىمىز. شاحمات، دومبىرا، اعىلشىن ءتىلى سەكىلدى ۇيىرمەلەردە تۇراقتى جۇمىس ىستەۋدە».
ورتالىق ىشىندە تەگىن بىرنەشە ۇيىرمەلەر جۇمىس ىستەيدى. ماسەلەن، اعىلشىن ءتىلى كۋرسى، دومبىرا، شاحمات سەكىلدى ۇيىرمەلەر، گرافيك بويىنشا تۇراقتى جۇرگىزىلەدى. وسىعان قاتىسۋشى جاستار دا، وڭ باعاسىن بەرۋدە.
«ساباقتان بوس ۋاقىتىمدى وسى ورتالىقتا وتكىزۋ ادەتىمە اينالدى. ۇيىرمەلەردىڭ بارلىعىنا قاتىسىپ ءجۇرمىن. ورتالىق ىشىندەگى «كەڭەس بەرۋ اۋماعى» بولىمىنەن، مامانداردان كەڭەس الىپ، ول دا ءوز كەزەگىندە قاجەتىمە جاراپ ءجۇر. مۇندا وتەتىن ترەنينگتەرگە قاتىسۋ ارقىلى، ءبىلىمىم، قالا بەردى تانىمىم كەڭەيە تۇسۋدە. وسىنداي جاستار ورتالىقتار كوپ جاس بۋىنعا وڭ جولدى سىلتەي بەرسىن دەيمىن» دەيدى – انەل ايان ەسىمدى بويجەتكەن. ءار ءتۇرلى مەملەكەتتىك باعدارلامالاردى ءتۇسىندىرۋ، ودان وزگە دە باعدارلامالار بويىنشا اقپاراتتىق مالىمەت بويىنشا قىزمەت كورسەتەدى. ال، ورتالىق ىشىندەگى شىعارماشىلىق شەبەرحانا الاڭى شاعىن كىتاپحانامەن، مۋزىكالىق قۇرالدارمەن جابدىقتالعان. ينتەللەكتۋالدى جانە شىعارماشىلىق كەزدەسۋلەر، ۆوركشوپ، كوۋچينگ، ت.ب. ۇيىمداستىرۋعا باعىتتالعان. مۇندا بولاشاقتا جاستارعا پايدالى، قىزىقتى، ءارى جاستار قوعامىنداعى وزەكتى ماسەلەلەر اياسىندا سەمينار-ترەنينگتەر مەن ءتۇرلى شارالار وتكىزىلىپ ءجۇر. ايتالىق، قازان ايىندا، «ماماندىق تاڭداۋ جانە جاقسى مامان بولۋ جولدارى» تاقىرىبىندا جۋرناليست بەيسەن قۇرانبەكتىڭ شەبەرلىك ساعاتى ءوتتى. «داۋىس قويۋ جاتتىعۋلارى» تاقىرىبىندا، ارنايى ماماننىڭ جاتتىعۋ ساعاتى ءوتتى. مۇنان وزگە، ءتۇرلى پايدالى شارالار كۇن سايىن وتەدى. الەۋمەتتىك جەلىدەگى ورتالىقتىڭ پاراقشاسى ارقىلى ونى الدىن-الا بىلۋگە بولادى. جاستارمەن جۇمىس جاساۋ ورتالىعى جاستاردى تەك بەلسەندى ءومىردىڭ باعىتى مەن باعدارىن عانا جول سىلتەپ قانا قويماي، ەلىمىزدىڭ ەرتەڭىنە بەلسەندى قىزمەت اتقاراتىن تۇلعالار قالىپتاستىرۋىنا دا جۇمىس جاساي بەرمەك.
ورتالىقتا وسى ۋاقىت ۋاقىت ارالىعىندا، ءانشى، سازگەر وكتەم التايەۆ، جۋرناليست بەيسەن قۇرانبەك، ءانشى جۇبانىش جەكسەن ۇلى، EDTECH-KZ حالىقارالىق ءبىلىم ورتالىعىنىڭ باس ديرەكتورى عاني بەيسەمبايەۆ تاعى دا وزگە ەل ازاماتتارى قوناق بولدى.
سونىمەن قاتار، ورتالىق قىزمەتكەرلەرى قالاداعى تۇرعىن ۇيلەردى ارالاپ، ورتالىققا شاقىرۋ جۇمىستارىنىڭ جۇرگىزىلگەنىنىڭ ارقاسىندا، ورتالىقتى بىلۋشىلەر مەن قىزمەتىن قولدانۋشىلار سانى ارتقان. ورتالىق تەك الاتاۋ اۋدانىنىڭ جاستارىنا ەمەس، سونداي-اق جەتىسۋ مەن اۋەزوۆ اۋداندارىنىڭ جاستارىنا دا قىزمەت كورسەتپەك. الماتى قالاسىنداعى وزگە دە جاستار ورتالىقتارىمەن بىرلەسىپ، جاستار فورۋمدارىن وتكىزۋدە جوسپاردا بار.
جاڭا زامان جاستارىنىڭ جاڭا تالاپتارىن ورىنداۋ ۋاقىت اعىمىنا وراي ورىندى ءىس بولىپ وتىر. سوندىقتان، ەلدىڭ بۇگىنى دە ەرتەڭى دە بولاتىن جاستار قاۋىمىنا جاعداي جاسالا بەرسىن. ال، جاستار ءۇمىتتى اقتاي بەرسىن!
وسىنداعى جاستار ءۇشىن بۇل ورتالىقتا جاقسى جاعداي جاسالعان. سپورت، ونەر، مادەنيەت، عىلىم سەكىلدى سالالارعا قاتىستى دۇنيەلەردى دە وسى جەردەن تابۋعا بولادى ەكەن. ورتالىقتى ارالاپ شىققاندا وسىعان كوز جەتكىزدىم. شىن مانىندە، جاستارعا مادەني دەمالىس ورىندارىنىڭ بولعاندىعىن ءوز باسىم قوس-قولداپ قولدايمىن.
وكتەم التايەۆ، ءانشى، سازگەر
مۇنداي ورتالىقتار سيرەك ەكەندىگى داۋ تۋدىرمايدى. قالا ىشىنەن قوسىلىپ جاتقان جاڭا اۋداندار كوپ. ال، بۇل ءدال سونداي جاڭا اۋماقتا اشىلعان ەكەن. ول جەردە كوپ بولىگى جاس وتباسىلار ەكەنىن ەسكەرسەك، بۇل وتە ءتيىمدى اشىلعان ورتالىق. عىلىم-بىلىمگە، رۋحاني دامۋعا شاقىراتىن ورتالىقتاردىڭ كوپ بولۋى وتە ماڭىزدى. ورتالىق ىشىندەگى ۇيىرمەلەر، شىعارماشىلىق ۇيىمدارى دا ناعىز قاجەتتى دۇنيەلەر. ءاردايىم تابىستى جۇمىس ىستەۋىنە تىلەكتەسپىز.
جۇلدىز ءابدىلدا، جۋرناليست
الاتاۋ اۋداندىق #Almatyzhastary شاعىن الەۋمەتتىك ورتالىعى ىشىندەگى «تاسقىن» شىعارماشىلىق ورتالىعى قازاق جاستارىنا جەتپەي جاتقان رۋحاني كەم-كەتىكتىڭ ورنىن تولتىرادى دەپ ويلايمىن. وسىنداي ورتالىقتار جۇمىس ىستەسە، «بالام نەگە وزگەردى؟» دەمەس ەدىك. «تاسقىننىڭ» ەلەڭ-الاڭ بوپ جۇرگەن جاسوسپىرىمدەر مەن جاستاردىڭ بەتىن بەرى قاراتاتىنداي ورتالىق بولۋىنا تىلەكتەسپىن! بالا قانداي ورتادا جۇرسە، سونداي بولادى. ويتكەنى، ول ورتاق ءتىل تابىسۋ ءۇشىن دە سول ورتاعا بەيىمدەلەدى. جاستاردىڭ پاتريوت بولىپ وسۋىنە ورتانىڭ ىقپالى وراسان زور بولعاندىقتان، وسىنداي ورتالىقتار كوبەيە بەرسە ەكەن دەيمىن.
جادىرا نارماحانوۆا «ۇلان» گازەتىنىڭ شەف-رەداكتورى
