قىرعىزستاننىڭ پرەزيدەنتتىگىنەن كەتۋگە دايىندالىپ جاتقان المازبەك اتامبايەۆ ءوزىنىڭ قورىتىندى باسپا ءسوز ءماسليحاتى كەزىندە رەنجىتىپ العانداردىڭ بارلىعىنان كەشىرىم سۇرادى، - دەپ حابارلايدى Qamshy.kz اقپارات اگەنتتىگى tengrinews.kz-كە سىلتەمە جاساپ.  

ول ەلدىڭ كەلەسى باسشىسى ۇستامدىراق بولادى دەپ ءۇمىت ءبىلدىردى. 

"قۇرمەتتى جۋرناليستەر، ەگەر قاتتى كەتىپ جاتسام، سىزدەرمەن عانا ەمەس. كەيدە قاتتى ايتىپ جىبەرەتىنىم بار. ەگەر دە بىرەۋدىڭ كوڭىلىنە تيگەن بولسام، مەنىكى دۇرىس بولسا دا، ءبارىبىر كەشىرىم ەتۋلەرىڭىزدى سۇرايمىن"، - دەيدى اتامبايەۆ. 

"مەنىڭ ويىمشا، ءبىزدىڭ كەلەسى پرەزيدەنتتەرىمىز ۇستامدىراق بولادى دەگەن ۇمىتتەمىن. سوڭعى التى جىل تىم اۋىر بولدى، جۇيكەمىز دە تەمىردەن ەمەس"، - دەپ اتاپ ءوتتى ول. 

بۇگىن، 2017 جىلدىڭ 20 قاراشاسىندا ءماجىلىس سپيكەرى نۇرلان نىعماتۋلين المازبەك اتامبايەۆتىڭ مالىمدەمەسىنە قاتىستى پىكىر بىلدىرگەن ەدى. "نۇرسۇلتان ءابىش ۇلى مەملەكەت باسشىسى رەتىندە قىرعىزستان حالقىن ۇنەمى قولداپ، كومەكتەسىپ كەلەدى. قىرعىزستان حالقىنىڭ دا قازاقستان باسشىسىنا العىس بىلدىرەتىنىن بىلەمىن. سوندىقتان دا اتامبايەۆتىڭ وسى ايتىپ جاتقانى "بوس ءسوز"، پوپۋليستىك جانە جاۋاپسىز مالىمدەمەلەرى ءبىزدىڭ حالىقتاردىڭ باۋىرلاستىق قارىم-قاتىناسىنا ەشقاشان دا ەش زالالىن تيگىزە المايدى، - دەدى ءماجىلىس سپيكەرى نۇرلان نىعماتۋلين.

سونداي-اق، ول اتامبايەۆتىڭ قىرعىزستان پرەزيدەنتى بولعان كەزدەگى جۇمىسىنا قاتىستى ويىن ايتتى.

"اتامبايەۆتىڭ ءوزى جايلى ايتاتىن بولساق، ونىڭ وسى پرەزيدەنتتىك جىلدار بويى نە ەكونوميكادا، نە ساياساتتا بىردە-بىردە ناتيجە كورسەتپەگەنىن بارلىعى دا بىلەدى. ال قىزمەتىنەن كەتەر كەزدە ءتىپتى ساياسي جانە ىشكى مادەنيەتتىڭ جوقتىعىن كورسەتتى"، - دەدى نۇرلان نىعماتۋلين. 

مۇنىڭ الدىندا اتامبايەۆ ءوزىنىڭ سوڭعى ءىسساپارىندا قازاقستانمەن قارىم-قاتىناسىن ايتىپ، پۋتينگە شاعىمدانعان بولاتىن. "وزدەرىڭىز بىلەتىن بولارسىزدار، جاقىندا مەن رەسەي پرەزيدەنتى ۆلاديمير ۆلاديميروۆيچ پۋتينمەن كەزدەستىم. وعان اشىق تۇردە "سىزدەرگە ەۋرازيالىق ەكونوميكالىق وداق كەرەك بولسا، ونى بۇزىپ جاتقانداردىڭ ىسىنە ارالاسپاي وسىلاي وتىرا بەرۋگە بولمايدى" دەپ ايتتىم"، - دەدى قىرعىزستان پرەزيدەنتى ەكى ەل اراسىنداعى ىنتىماقتاستىقتى رەتتەۋ تۋرالى سۇراقتارعا جاۋاپ بەرە وتىرىپ.