20 قاراشادا، كەشكە باتىس قازاقستان وبلىسىنىڭ (بقو) ءبورىلى اۋدانى، قىزىلتال اۋىلىنداعى №7 مەكتەبىندە 6-سىنىپتىڭ 22 وقۋشىسى ۋلانىپ، اۋداندىق اۋرۋحاناعا ءتۇستى، دەپ Qamshy.kz اقپارات اگەنتتىگى ازاتتىققا سۇيەنە وتىرىپ جازادى. 

بقو دەنساۋلىق ساقتاۋ باسقارماسىنىڭ باسشىسى قانات توسەكبايەۆتىڭ ايتۋىنشا، دارىگەرلەر زەرتحانالىق تەكسەرۋ ناتيجەسى ءازىر دايىن بولماعاندىقتان، وقۋشىلاردىڭ نەدەن ۋلانعانىن بىلە الماي وتىر. توسەكبايەۆتىڭ سوزىنشە، وقۋشىلار ءىشى اۋىرىپ، قۇسقان. بالالار مەكتەپ اسحاناسىنداعى تاماقتان ۋلانعان بولۋى مۇمكىن ەكەنىن ايتادى.

دەنساۋلىق ساقتاۋ باسقارماسىنىڭ باستىعى 21 قاراشا كۇنى تاڭەرتەڭ 17 بالا جاعدايى جاقسارىپ، اۋرۋحانادان شىعارىلعانىن ايتادى. قالعان بەس بالا اۋرۋحانادا جاتىر. ولاردىڭ جاعدايى "قاناعاتتانارلىق" دەپ باعالانىپ وتىر.

دەنساۋلىق ساقتاۋ باسقارماسى "ينفەكسيا قوزدىرعىشتى" انىقتايتىن ساراپتاما ناتيجەلەرىن بۇگىن تۇستەن كەيىن جاريالاۋعا ۋادە بەردى.

بقو دەنساۋلىق ساقتاۋ باسقارماسىنىڭ مالىمەتىنشە، وبلىستا بيىل 10 ايدا 228 ادام جەدەل تۋىندايتىن ىشەك ينفەكسياسىمەن اۋىرعان.