شقو-دا «رۋحاني جاڭعىرۋ» مەملەكەتتىك باعدارلاماسىن جۇزەگە اسىرۋ اياسىندا وسكەمەن قالاسىنداعى «ءۇمىت» بالالار ءۇيىنىڭ تاربيەلەنۋشىلەرى زىريان، زايسان جانە گلۋبوكوە اۋداندارىنىڭ تاريحىمەن، تابيعاتى جانە مادەنيەتىمەن تانىسىپ، كوشپەلى كونسەرتتەر قويدى، دەپ حابارلايدى Qamshy.kz اقپارات اگەنتتىگى.

گلۋبوكوە اۋدانىنداعى كونسەرتتى بالالار ءۇيىن تانىتقان «ۇمىتتىكتەر»، «ح-فاكتور» كونكۋرسىنىڭ جەڭىمپازى ەۆگەنيي ۆىبلوۆ انمەن اشىپ، كونسەرتتىڭ تولىق جۇرگىزۋشىسى بولدى. سونداي-اق، كونسەرتكە «تى سۋپەر!» اتتى رەسەيلىك جوبانىڭ قاتىسۋشىسى ۆلاد لوسكۋتوۆ پەن باسقا دا كوپتەگەن ءان انسامبلدەرى مەن توپتارى قاتىستى.

-«ءۇمىت» بالالار ءۇيىن شىعىسقازاقستاندىق جۇلدىزدار فابريكاسى دەپ ايتسا دا بولادى. بۇل جەردەن وتە دارىندى جانە زەرەك بالالار تاربيەلەنىپ شىعادى، ولاردىڭ جەتىستىكتەرىنە بارلىعىمىز كۋى بولىپ وتىرمىز. بۇگىندە رەسپۋبليكالىق «رۋحاني جاڭعىرۋ» باعدارلاماسىن جۇزەگە اسىرۋ اياسىندا ءبىزدىڭ ۇمىتتىك دوستارىمىز اۋدانىمىزعا كونسەرتپەن كەلىپ وتىر. سەنبى كۇنى ولارعا دوستىق كەرەۋەنى جىبەرىلەدى. وسىنداي يگى ىستەر ارقىلى ءبىز قوعامدىق سانانى بىرگە جاڭارتا الامىز، بۇل كىشكەنە بالالار وتانىنا دەگەن سۇيىسپەنشىلىك پەن قىزىعۋشىلىقتىڭ ايقىن ۇلگىسىن كورسەتىپ وتىر، - دەدى شقو گلۋبوكوە اۋدانىنىڭ اكىمى قاليقان بايعونىسوۆ.

بالالار اۋداندار مەن جەرلەردى ارالاۋ كەزىندەگى العان اسەرلەرىمەن قۋانا بولىسۋدە.

- بارلىق اۋدانداردا ءبىزدى اسا قوناقجايلىلىقپەن قارسى الدى، ول ءۇشىن العىس ايتامىز. زىريانداعى مۇراجايدى كورىپ قايتتىق، زايساننىڭ تاريحىمەن، مادەنيەتىمەن تانىستىق، تابيعات زەرتتەۋشىلەرىنىڭ كلۋبىن، جىلىجايلاردى جانە باسقا دا كوپتەگەن تانىمدىق ورىنداردى كوردىك. ەندى ءوز شىعارماشىلىعىمىزبەن گلۋبوكوە اۋدانىنىڭ تۇرعىندارىن ءتانتى ەتكىمىز كەلەدى، - دەيدى توعىزىنشى سىنىپ وقۋشىسى، بالالار ءۇيىنىڭ تاربيەلەنۋشىسى ايگەرىم تۇرعامبايەۆا.